ମୋଦୀଙ୍କୁ ବିଜେପି ସାଂସଦ ପ୍ରାର୍ଥୀଙ୍କ ଚେତାବନୀ; ନାଗରିକତା ସଂଶୋଧନ ବିଲ୍‌ କାର୍ଯ୍ୟକାରୀ ହେଲେ ତୁମ ସାମ୍ନାରେ ଆତ୍ମହତ୍ୟା କରିବି

ନୂଆଦିଲ୍ଲୀ: ବିଜେପି କ୍ଷମତାକୁ ଆସିଲେ ନାଗରିକତା ସଂଶୋଧନ ବିଲ୍‌ କାର୍ଯ୍ୟକାରୀ ହେବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିର୍ବାଚନ ପୂର୍ବରୁ ଘୋଷଣା କରିଛନ୍ତି। ବିଜେପି ଇସ୍ତାହାରରେ ମଧ୍ୟ ଏ ନେଇ ପ୍ରତିଶ୍ରୁତି ଦିଆଯାଇଛି। କିନ୍ତୁ ଏହାକୁ ନେଇ ନିଜର ଦଳର ନେତାଙ୍କ ମଧ୍ୟରେ ଅସନ୍ତୋଷ ରହିଛି। ଯଦି ନାଗରିକତା ବିଲ୍‌ କାର୍ଯ୍ୟକାରୀ ହୁଏ, ତା’ହେଲେ ମୋଦୀଙ୍କ ସାମ୍ନାରେ ଆତ୍ମହତ୍ୟା କରିବି ବୋଲି ମେଘାଳୟର ପୂର୍ବତନ ବାଚସ୍ପତି ତଥା ଶିଲଂର ବିଜେପି ସାଂସଦ ପ୍ରାର୍ଥୀ ସାନବର ସୁଲାଇ ଚେତାବନୀ ଦେଇଛନ୍ତି। ସେ କହିଛନ୍ତି, ମୁଁ ମରିଯିବି ପଛେ ମେଘାଳୟ ଏବଂ ଅନ୍ୟ ଉତ୍ତରଭାରତୀୟ ରାଜ୍ୟରେ ନାଗରିକତା ସଂଶୋଧନ ବିଲ୍‌ କାର୍ଯ୍ୟକାରୀ ହେବାକୁ ଦେବିନାହିଁ। ବିଲ୍‌ରେ ଆହୁରି ସଂଶୋଧନ ଜରୁରୀ ବୋଲି ସେ କହିଛନ୍ତି।

ସାନ୍‌ବର ସୁଲାଇ ଗତ ଗୁରୁବାର ମତଦାନ କରିବା ପରେ ଏଭଳି ଚେତାବନୀ ଦେଇଛନ୍ତି। ତେବେ ଦେଶର ଅନ୍ୟାନ୍ୟ ରାଜ୍ୟରେ ଏହି ବିଲ୍‌ କାର୍ଯ୍ୟକାରୀ ହେଲେ ତାଙ୍କର କୌଣସି ଅସୁବିଧା ନାହିଁ ବୋଲି ସାନବର କହିଛନ୍ତି। ସେ କହିଛନ୍ତି, ମୁଁ ନିକଟରେ ଏ ସମ୍ପର୍କରେ ପ୍ରଧାନମନ୍ତ୍ରୀ ମୋଦୀ, ବିଜେପି ନେତୃବୃନ୍ଦ ଏବଂ ଏନଜିଓଗୁଡ଼ିକୁ ଚିଠି ଦେଇଛି। ମେଘାଳୟ ଏବଂ ଅନ୍ୟାନ୍ୟ ଉତ୍ତର ଭାରତୀୟ ରାଜ୍ୟଗୁଡ଼ିକୁ ଏଥିରୁ ବାଦ୍‌ ଦେବାକୁ ସେ ଦାବି କରିଛନ୍ତି।

Comments
Loading...