ଟିକା ଅନୁମୋଦନ ପରେ ଶେୟାର ବଜାରରେ ଅଭିବୃଦ୍ଧି, ୪୮ ହଜାର ଟପିଲା ସେନ୍ସେକ୍ସ
ମୁମ୍ବଇ: ଦେଶରେ କରୋନା ଟିକାର ଜରୁରିକାଳୀନ ବ୍ୟବହାରକୁ ଅନୁମୋଦନ ମିଳିବା ପରେ ନିବେଶକଙ୍କ ମଧ୍ୟରେ ଉତ୍ସାହ ବୃଦ୍ଧି ପାଇଛି। ଏହାର ପ୍ରତିଫଳନ ଆଜି ସପ୍ତାହର ପ୍ରଥମ ଦିନରେ ଦେଖିବାକୁ ମିଳିଛି। ସୋମବାର ଶେୟାର ବଜାରରେ ଦ୍ରୁତ ଅଭିବୃଦ୍ଧି ଘଟିବା ସହିତ ସର୍ବୋଚ୍ଚ ସ୍ତରରେ କାରବାର ବନ୍ଦ ହୋଇଛି।
ବମ୍ବେ ଷ୍ଟକ୍ ଏକ୍ସଚେଞ୍ଜର ସୂଚକାଙ୍କ ସେନ୍ସେକ୍ସ ୦.୬୪ ପ୍ରତିଶତ (୩୦୭.୮୨ ପଏଣ୍ଟ) ବୃଦ୍ଧି ପାଇ ୪୮,୧୭୬.୮୦ ସ୍ତରରେ ବନ୍ଦ ହୋଇଛି। ସେହିପରି ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜର ନିଫ୍ଟି ୧୧୪.୪୦ ପଏଣ୍ଟ ବୃଦ୍ଧି ପାଇ (୦.୮୨ ପ୍ରତିଶତ) ୧୪୧୩୨.୯୦ ସ୍ତରରେ ବନ୍ଦ ହୋଇଛି।
ଗତ ସପ୍ତାହରେ ସେନ୍ସେକ୍ସରେ ୮୯୫.୪୪ ପଏଣ୍ଟ ଅର୍ଥାତ ୧.୯୦ ପ୍ରତିଶତ ବୃଦ୍ଧି ଦେଖିବାକୁ ମିଳିଥିଲା। ଶେୟାର ବଜାର ଆଗକୁ ଅସ୍ଥିର ରହିବା ସମ୍ଭାବନା ରହିଛି। ତେଣୁ ନିବେଶକମାନେ ସତର୍କ ରହି କାରବାର କରିବାକୁ ଅର୍ଥନୈତିକ ବିଶ୍ଳେଷକମାନେ କହିଛନ୍ତି।
ସୂଚନାଯୋଗ୍ୟ, ଦେଶରେ ଦୁଇଟି କରୋନା ଟିକା କୋଭାକ୍ସିନ ଏବଂ କୋଭିଶିଲ୍ଡକୁ ସରକାର ଜରୁରିକାଳୀନ ବ୍ୟବହାର ଲାଗି ଅନୁମୋଦନ କରିଛନ୍ତି। ଏଥିଲାଗି ନିବେଶକଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଥିବା କୁହାଯାଉଛି।