ବରିଷ୍ଠ ଆଇନଜୀବୀ ବିପିନ ବିହାରୀ ରଥଙ୍କ ପରଲୋକ

କଟକ: ବରିଷ୍ଠ ଆଇନଜୀବୀ, ବିଶିଷ୍ଟ ସ୍ବାଧୀନତା ସଂଗ୍ରାମୀ ତଥା ସମାଜସେବୀ ବିପିନ ବିହାରୀ ରଥଙ୍କର ଶନିବାର ପରଲୋକ ଘଟିଛି। ସେ କିଛିଦିନ ହେବ ବାର୍ଦ୍ଧକ୍ୟଜନିତ ରୋଗରେ ପୀଡ଼ିତ ଥାଇ କଟକ ବଡ଼ ଡାକ୍ତରଖାନାରେ ଚିକିତ୍ସିତ ହେଉଥିଲେ। ଶନିବାର ପୂର୍ବାହ୍ନ ପ୍ରାୟ ସାଢ଼େ ୧୧ଟାରେ ଡାକ୍ତରଖାନାରେ ତାଙ୍କର ଦେହାନ୍ତ ହୋଇଯାଇଛି। ମୃତ୍ୟୁ ବେଳକୁ ତାଙ୍କୁ ୯୦ ବର୍ଷ ହୋଇଥିଲା।

୧୯୩୦ ନଭେମ୍ବର ୨୯ରେ ଗଞ୍ଜାମ ଜିଲା କୃପାସିନ୍ଧୁପୁର ଶାସନରେ ଜନ୍ମିତ ଶ୍ରୀ ରଥ ଜଣେ ଲେଖକ ମଧ୍ୟ ଥିଲେ। ମାତ୍ର ୧୦ ବର୍ଷ ବୟସରେ ସେ ଗାନ୍ଧିଜୀଙ୍କ ତତ୍ଵାବଧାନରେ ସେବାଗ୍ରାମସ୍ଥିତ ଗାନ୍ଧୀ ଆଶ୍ରମରେ ‘ବାନର ସେନା’ ପ୍ରଶିକ୍ଷଣ ନେବା ସହିତ ସ୍ବାଧୀନତା ସଂଗ୍ରାମରେ ଯୋଗଦେଇଥିଲେ। ୧୯୪୨ ଅଗଷ୍ଟ ୧୦ ତାରିଖରେ ବ୍ରହ୍ମପୁର ପୋଷ୍ଟ ଅଫିସଠାରେ ଭାରତ ଛାଡ଼ ଆନ୍ଦୋଳନର ନେତୃତ୍ଵ ନେଇ ପିକେଟିଂ କରିବା ସମୟରେ ବ୍ରିଟିଶ ପୁଲିସ ଦ୍ବାରା ଗିରଫ ହୋଇଥିଲେ। ୧୯୬୧ରେ ଶ୍ରୀ ରଥ ଆଡ୍‌ଭୋକେଟ ଭାବେ କାର୍ଯ୍ୟ ଆରମ୍ଭ କରିଥିଲେ। ଓକିଲାତି ବ୍ୟତୀତ ସେ ରାଜନୀତିରେ ମଧ୍ୟ ସକ୍ରିୟ ଅଂଶଗ୍ରହଣ କରିଥିଲେ। ୧୦୬୮ରୁ ୧୯୭୭ ପର୍ଯ୍ୟନ୍ତ ସେ ଫରୱାର୍ଡ ବ୍ଲକ ଓଡ଼ିଶା ଶାଖାର ସଭାପତି ଭାବେ କାର୍ଯ୍ୟ କରିଥିଲେ। ଏହା ସହିତ ସେ ୧୯୯୦-୯୫ ପର୍ଯ୍ୟନ୍ତ ବିଜେପିର ରାଜ୍ୟ ଉପସଭାପତି ଏବଂ ୧୯୯୯-୨୦୧୦ ପର୍ଯ୍ୟନ୍ତ ବିଶ୍ଵ ହିନ୍ଦୁ ପରିଷଦର କାର୍ଯ୍ୟକାରୀ ସଭାପତି ଥିଲେ। ଶ୍ରୀ ରଥଙ୍କ ପୁଅ ବିଶ୍ଵନାଥ ରଥ ବର୍ତ୍ତମାନ ହାଇକୋର୍ଟର ବିଚାରପତି ଅଛନ୍ତି।

Comments
Loading...