କାଲି କମଲନାଥଙ୍କ ଫ୍ଲୋର ଟେଷ୍ଟ, ସୁପ୍ରିମକୋର୍ଟ ଦେଲେ ନିର୍ଦେଶ

ଭୋପାଳ: ମଧ୍ୟପ୍ରଦେଶରେ ଜାରି ରହିଥିବା ରାଜନୈତିକ ସଙ୍କଟରେ ଶୁକ୍ରବାର ପୂର୍ଣ୍ଣଚ୍ଛେଦ ପଡ଼ିବ। କାରଣ ମୁଖ୍ୟମନ୍ତ୍ରୀ କମଲନାଥଙ୍କୁ ଶୁକ୍ରବାର ବହୁମତ ପରୀକ୍ଷା ଦେବାକୁ ପଡ଼ିବ। ଏ ନେଇ ଗୁରୁବାର ସୁପ୍ରିମକୋର୍ଟ ନିର୍ଦେଶ ଦେଇଛନ୍ତି। କାଲି ହିଁ କମଲନାଥ ଫ୍ଲୋର ଟେଷ୍ଟର ସମ୍ମୁଖୀନ ହେବେ। ବିଧାନସଭାରେ ହେବାକୁ ଥିବା ଏହି ଫ୍ଲୋର ଟେଷ୍ଟ ସମୟର ଦୃଶ୍ୟକୁ ଭିଡିଓଗ୍ରାଫି କରିବା ଲାଗି ସୁପ୍ରିମକୋର୍ଟ ନିର୍ଦେଶ ଦେଇଛନ୍ତି। ସୂଚନାଯୋଗ୍ୟ, କମଲନାଥଙ୍କ ସରକାରରୁ ୧୬ ବିଧାୟକ ଇସ୍ତଫା ଦେଇ ସାରିଛନ୍ତି। ଏହି ବିଦ୍ରୋହୀ ବିଧାୟକ ଏବେ କର୍ଣ୍ଣାଟକର ଏକ ହୋଟେଲରେ ରହିଛନ୍ତି। ବିଧାୟକମାନଙ୍କ ଇସ୍ତଫା ପରେ ସରକାର ସଂଖ୍ୟା ଗରିଷ୍ଠତା ହରାଇଥିବା ବିଜେପି ଅଭିଯୋଗ କରି ବହୁମତ ପରୀକ୍ଷା ଦାବି କରିଥିଲା। ଗତ ସୋମବାର ବହୁମତ ପରୀକ୍ଷା ହେବ ବୋଲି ଆଶା କରାଯାଉଥିଲା। କିନ୍ତୁ ବାଚସ୍ପତି ମାର୍ଚ୍ଚ ୨୬ ପର୍ଯ୍ୟନ୍ତ ବିଧାନସଭାକୁ ସ୍ଥଗିତ କରିଦେବାରୁ କମଲନାଥଙ୍କୁ କିଛିଟା ଅଶ୍ଵସ୍ତି ମିଳିଥିଲା। ମାତ୍ର ବିଜେପି ନେତା ଶିବରାଜ ସିଂହ ଚୌହ୍ବାନ ସୁପ୍ରିମକୋର୍ଟଙ୍କ ଦ୍ବାରସ୍ଥ ହେବା ସହିତ ଫ୍ଲୋର ଟେଷ୍ଟ ପାଇଁ ନିର୍ଦେଶ ଦେବା ଲାଗି ନିବେଦନ କରିଥିଲେ।

ଅନ୍ୟପଟେ ଯଦି ୧୬ ବିଦ୍ରୋହୀ ବିଧାୟକ ଫ୍ଲୋର ଟେଷ୍ଟରେ ଭାଗନେବାକୁ ଚାହାଁନ୍ତି, ତେବେ କର୍ଣ୍ଣାଟକ ଏବଂ ମଧ୍ୟପ୍ରଦେଶ ପୁଲିସ ସେମାନଙ୍କୁ ପର୍ଯ୍ୟାପ୍ତ ସୁରକ୍ଷା ଯୋଗାଇଦେବା ଜରୁରୀ ବୋଲି ସୁପ୍ରିମକୋର୍ଟ କହିଛନ୍ତି।

Comments
Loading...