ସଟ୍ଟା ଚଢ଼ାଉ, ୪ ଗିରଫ

ମୁଖୀଗୁଡା: କଳାହାଣ୍ଡି ଜିଲ୍ଲା ଜୟପାଟଣା ଥାନାଞ୍ଚଳରେ ବ୍ୟାପକ ସଟ୍ଟା ଖେଳ ଚାଲୁଥିବା ବେଳେ ଗତ କାଲି ରାତିରେ ଜୟପାଟଣା ପୋଲିସ ବଡ଼କୁଟୁରୁ ଏବଂ ବିଜମରା ଗ୍ରାମରେ ଚଢ଼ାଉ କରି ସଟ୍ଟା ଡନ ସହ ତାର ୩ ସହଯୋଗୀଙ୍କୁ ଗିରଫ କରିଛି।

ଗତକାଲି ରାତିରେ ଜୟପାଟଣା ପୋଲିସ ସଟ୍ଟା ଖେଳ ସମ୍ପର୍କରେ ସୂଚନା ପାଇ ବଡକୁଟୁରୁ ଏବଂ ବିଜମରାରେ ଚଢ଼ାଉ କରାଯାଇଥିଲା । ମୁଖୀଗୁଡାରେ ରହୁଥିବା ଉପେନ୍ଦ୍ର ସାଗର(୪୨), ବଡକୁଟୁରୁ ଗ୍ରାମର ଦାଶରଥି ମାଝୀ (୪୧) ଓ ମିଲନ ବାରିକ(୨୧) ଏବଂ ବିଜମରା ଗ୍ରାମର କ୍ଷେତ୍ରମୋହନ ନାଏକ(୩୯)ଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ସେମାନଙ୍କଠାରୁ ନଗଦ ୧୬,୧୩୦ ଟଙ୍କା, ୫ଟି ମୋବାଇଲ ଫୋନ, ସଟ୍ଟାରେ ବ୍ୟବହୃତ ହେଉଥିବା ଚିଟ ଜବତ କରାଯାଇଛି। ପୋଲିସର ଏହି ପଦକ୍ଷେପକୁ ସାଧାରଣରେ ପ୍ରଶଂସା କରାଯାଇଛି। ହେଲେ ଜୟପାଟଣା ରାଜରାସ୍ତା କଡରେ ଏକ ସଟ୍ଟା କାର୍ୟ୍ୟାଳୟ ଖୋଲାଯାଇଛି। ସେଠାକୁ ଲୋକେ ଖୋଲା ଖୋଲି ସଟ୍ଟାଖେଳ ପାଇଁ ଟଙ୍କା ବାନ୍ଧିବା ପାଇଁ ଯାଉଛନ୍ତି ଏବଂ ଟଙ୍କା ଆଣିବା ପାଇଁ ମଧ୍ୟ ଯାଉଛନ୍ତି । ହେଳେ ଏହି କାର୍ୟ୍ୟାଳୟ ସମ୍ପର୍କରେ ପୁଲିସ କିପରି ଟେର ପାଇ ପାରୁନାହିଁ ତାହା ସମସ୍ତଙ୍କୁ ଆଶ୍ଚର୍ୟ୍ୟ କରୁଛି । ଜୟପାଟଣାରେ ଖୋଲା ଖୋଲି ଭାବେ ଚାଲୁଥିବା ସଟ୍ଟାଖେଳ ବନ୍ଦ କରିବା ପାଇଁ ସାଧାରଣରେ ଦାବି ହେଉଛି।

Comments
Loading...