ସମ୍ବଲପୁର: ସମ୍ବଲପୁର ଜିଲା ବିଶେଷତଃ ମୁଖ୍ୟ ସହରରେ ବିଗତ କିଛି ମାସ ହେବ ଅହେତୁକ ଭାବରେ ଅପରାଧିକ ଘଟଣା ବୃଦ୍ଧି ପାଉଥିବା ବେଳେ ଏହା ପଛରେ ବେଆଇନ ନିଶା କାରବାର ପ୍ରମୁଖ କାରଣ ହୋଇଥିବାର ଅଭିଯୋଗ ସହରବାସୀ କରିଆସୁଛନ୍ତି। ଏଣୁ କିଛି ଦିନ ହେବ ସମ୍ବଲପୁର ଡ୍ରଗ ବିଭାଗ ପକ୍ଷରୁ ସହର ମଧ୍ୟରେ ରହିଥିବା ବିଭିନ୍ନ ଔଷଧ ହୋଲସେଲର, ଦୋକାନ ଆଦିରେ ଚଢ଼ଉ ଅଭିଯାନ ଆରମ୍ଭ କରିଛି। ଜିଲା ଡ୍ରଗ ବିଭାଗ ପକ୍ଷରୁ ମିଳିଥିବା ସୂଚନାନୁଯାୟୀ, ଅଭିଯୋଗ ମିଳିବା ପରେ ସ୍ୱତନ୍ତ୍ର ଅଭିଯାନ ଚଳାଯାଇ ଜିଲା ମଧ୍ୟକୁ ଆସୁଥିବା ଔଷଧ ବିଶେଷ କରି ନିଶା ବଟିକା, ଔଷଧ ଆଦିର କଡା ଯାଞ୍ଚ କରାଯାଉଛି।
ସମସ୍ତ ଔଷଧ ଗୁଡିକର କିଣାବିକା ବିଲ ଓ ଅନ୍ୟାନ୍ୟ ଟିକସ ପଇଠ କାଗଜପତ୍ର ଯାଞ୍ଚ ଜୋରସୋରରେ ଚାଲିଛି। ବିଗତ ୧୯ ତାରିଖରେ ବୀର ସୁରେନ୍ଦ୍ର ସାଏ ମାର୍ଗ ଠାରେ କିଛି ଔଷଧ ଦୋକାନ ଗୁଡିକର କାଗଜପତ୍ର ଏବଂ ଔଷଧ ଯାଞ୍ଚ କରାଯାଇଥିବା ବେଳେ ଏକ ପ୍ରମୁଖ ଔଷଧ ଦୋକାନକୁ ନୋଟିସ ଦିଆଯାଇ ସମସ୍ତ କାଗଜପତ୍ର ୧୦ ଦିନ ମଧ୍ୟରେ ପ୍ରଦାନ କରିବାକୁ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି। ସେହିଭଳି ମଙ୍ଗଳବାର ମଧ୍ୟ ବୀର ସୁରେନ୍ଦ୍ର ସାଏ ମାର୍ଗ ସ୍ଥିତ ରେମେଡି, ଅମୃତ ମେଡିକାଲ, ଇଲାଜ ମେଡିକାଲ, ଶ୍ରୀ ଶକ୍ତି ଏନ୍ଟପ୍ରାଇଜ ସମେତ ଅନ୍ୟ ଔଷଧ ଦୋକାନ ଏବଂ ସହରରେ ଥିବା କିଛି ହୋଲସେଲର ଦୋକାନ ଗୁଡିକରେ ଚଢ଼ଉ କରାଯାଇ ଯାଞ୍ଚ କରାଯାଇଛି। ଦିନ ତମାମ ଚାଲିଥିବା ଏହି ଅଭିଯାନରେ ଜିଲା ଡ୍ରଗ, ଅବକାରୀ ଓ ପୁଲିସ ବିଭାଗର ଅଧିକାରୀ ଏବଂ କର୍ମଚାରୀ ମାନେ ସାମିଲ ରହିଥିଲେ।
Comments are closed.