ସଡକ ଦୁର୍ଘଟଣାରେ ୨ବାଇକ ଆରୋହୀଙ୍କ ମୃତ୍ୟୁ

ରାଜକିଶୋରନଗର : କିଶୋରନଗର ଥାନା ଅନ୍ତର୍ଗତ ଘୋଷର-ହିମିତିରା ପୁର୍ତ୍ତ ବିଭାଗ ରାସ୍ତାର ଶାଳବଣି ନିକଟରେ ସୋମବାର ସନ୍ଧ୍ୟାରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟି ଦୁଇ ଜଣ ବାଇକ୍ ଆରୋହୀଙ୍କ ଶୋଚନୀୟ ମୃତ୍ୟୁ ହୋଇଛି। ଦୁର୍ଘଟଣାରେ ମୃତ୍ୟୁବରଣ କରିଥିବା ସମ୍ବଲପୁର ଜିଲ୍ଲା ରେଢାଖୋଲ ଥାନା ଚାରବାଟି ଗ୍ରାମର ବିନୋଦ କୁମାର ସ୍ୱାଇଁ(୨୫)ଙ୍କ ଘଟଣା ସ୍ଥଳରେ ମୃତ୍ୟୁ ହୋଇଥିବାବେଳେ ଲାଣ୍ଡିମାଳ ଗ୍ରାମର ବୁଲୁ ରାଉଳ(୨୩)ଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଚିକିତ୍ସା ପାଇଁ କିଶୋରନଗର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ସ୍ୱାସ୍ଥ୍ୟ କେନ୍ଦ୍ରରେ ବୁଲୁ ରାଉଳଙ୍କ ମୃତ୍ୟୁ ହୋଇଥିବା ଜଣାଯାଇଛି। କିଶୋରନଗର ପୁଲିସ ଦୁର୍ଘଟଣା ସମ୍ପର୍କରେ ଖବର ପାଇବା ପରେ ଘଟଣା ସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ପିକଅପ୍ ଓ ବାଇକ୍ ଜବତ କରିଛନ୍ତି। କିଶୋରନଗର ପୁଲିସ ମୃତଦେହକୁ ଜବତ କରିବା ସହିତ ଥାନାରେ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି। ବିନୋଦ ଓ ବୁଲୁ ଏକ ବାଇକରେ କିଶୋରନଗର ପଟରୁ ହିମିତିରା ଗ୍ରାମ ଅଭିମୂଖେ ଯାଉଥିବାବେଳେ ଏକ ପିକଅପ୍ ସହିତ ଧକ୍କା ହେବାରୁ ଦୁର୍ଗଟଣା ଘଟିଥିବା କୁହାଯାଉଛି। ଦୁର୍ଘଟଣା ଘଟିବା ପରେ ପିକଅପ୍ ଚାଳକ ଗଟଣା ସ୍ଥଳରୁ ଫେରାର ହୋଇଯାଇଛି।

Comments
Loading...