ଚାପରେ ରଣବୀର

ରଣବୀର ସିଂଙ୍କ ହାତରେ ଏବେ କିଛି ନାହିଁ, ଯେତେ ବ୍ୟସ୍ତବିବ୍ରତ ହେଲେ ବି ସେ କିଛି କରିପାରୁନାହାନ୍ତି। କରୋନା ମହାମାରୀ କାରଣରୁ କେବଳ ବଲିଉଡ ନୁହେଁ, ହଲିଉଡ ମଧ୍ୟ ପ୍ରଭାବିତ ହୋଇଛି। ଏ ପର୍ଯ୍ୟନ୍ତ ଲୋକେ ସିନେମା ହଲ୍ ଯିବାକୁ ସୁରକ୍ଷିତ ମଣୁନାହାନ୍ତି। ବର୍ତ୍ତମାନ ପରିସ୍ଥିତିରେ ଚଳଚ୍ଚିତ୍ର ହଲ୍‌ରେ ମୁକ୍ତିଲାଭ କରି ପ୍ରଯୋଜନ ଆଉ ଅଧିକ କ୍ଷତି ସହିବାକୁ ଚାହୁଁନାହାନ୍ତି। କବୀର ଖାନ୍ ନିର୍ଦେଶିତ ‘୮୩’ର ମୁକ୍ତିଲାଭକୁ ନେଇ ବିବାଦ ବଢ଼ିଚାଲିଛି।

କ୍ରିକେଟ୍ ଜଗତର ମହାନାୟକ ଭାବେ ଜଣାଯାଉଥିବା କପିଲ୍ ଦେବଙ୍କ ଜୀବନୀକୁ ନେଇ ନିର୍ମିତ ଏହି ଚଳଚ୍ଚିତ୍ରରେ ମୁଖ୍ୟ ଭୂମିକାରେ ରଣବୀର ସିଂ, ଦୀପିକା ପାଦୁକୋନ, ତାହିର୍ ରାଜ୍ ଭସିନ୍ ଅଭିନୟ କରିଛନ୍ତି। ପ୍ରଥମେ ‘୮୩’ ଚଳଚ୍ଚିତ୍ର ୨୦୨୦ ଏପ୍ରିଲ୍ ୨୦ରେ ମୁକ୍ତିଲାଭ ହେବାର ନିଷ୍ପତ୍ତି ଥିଲା, ପରେ ଲକ୍-ଡାଉନ୍ କାରଣରୁ ବଡ଼ଦିନ ପର୍ଯ୍ୟନ୍ତ ଏହାର ତାରିଖ ଘୁଞ୍ଚିଲା। ହେଲେ ବଡ଼ଦିନବେଳକୁ ମଧ୍ୟ ସ୍ଥିତି ସୁଧୁରିନଥିବାରୁ ପ୍ରଯୋଜକ ମହଲ ୨୦୨୧ ମାର୍ଚ୍ଚ ପର୍ଯ୍ୟନ୍ତ ସ୍ଥଗିତ ରହିଲା, କିନ୍ତୁ ବ୍ରିଟେନ୍ ଲକ୍-ଡାଉନ୍ କାରଣରୁ ଏବେ ପୂରା ୟୁନିଟ୍ ଚିନ୍ତାରେ ପଡ଼ିଗଲାଣି। କାରଣ ଗୋଟିଏ ତାରିଖରେ ବିଶ୍ବସ୍ତରରେ ‘୮୩’ ମୁକ୍ତିଲାଭ କରିବ ବୋଲି ସେମାନେ ନିଷ୍ପତ୍ତି ନେଇଥିଲେ, ଏହା କିନ୍ତୁ ସମ୍ଭବପର ହେଉନାହିଁ। ସବୁଠୁ ବେଶୀ ଅଥୟ ରଣବୀର ସିଂ ହେଉଛନ୍ତି, ଏଇ ବଡ଼ ବଜେଟ୍‌ର ଚଳଚ୍ଚିତ୍ର ମୁକ୍ତିଲାଭ କଲେ ତାଙ୍କ କ୍ୟାରିୟର ପାଇଁ ମାଇଲ୍‌ଷ୍ଟୋନ୍ ହେବାର ସେ ଆଶା ରଖିଛନ୍ତି।

Comments
Loading...