ପୂର୍ବତନ ପୁଲିସ ଡିଜି ପ୍ରକାଶ ମିଶ୍ରଙ୍କ ଅଭିଯୋଗ: ପୁଲିସ ବ୍ୟବସ୍ଥାରେ ସ୍ୱଚ୍ଛତା ନାହିଁ, ଉପକୂଳ ଜିଲ୍ଲାରେ ନିଯୁକ୍ତ ହେଉଛନ୍ତି ଶାସକ ଦଳର ଅନୁଗତ

ପୂର୍ବତନ ପୁଲିସ ଡିଜି ତଥା ବିଜେପି ନେତା ପ୍ରକାଶ ମିଶ୍ର ଆଜି ଏକ ପ୍ରେସମିଟରେ ପୁଲିସ ପ୍ରଶାସନ ବିରୋଧରେ ସଂଗୀନ ଅଭିଯୋଗ ଆଣିଛନ୍ତି। ସେ କହିଛନ୍ତି ଯେ ବିଶେଷ କରି ରାଜ୍ୟର ଉପକୂଳ ଜିଲ୍ଲାର ବିଭିନ୍ନ ଥାନାରେ ନିଯୁକ୍ତ ହେଉଥିବା ପୁଲିସ ଅଧିକାରୀମାନେ ଶାସକ ଦଳର ଅନୁଗତ ତେଣୁ ତଦନ୍ତ ବାଟବଣା ହେଉଛି। ମାହାଙ୍ଗା କୁଳମଣି ବରାଳ ହତ୍ୟାକାଣ୍ଡ ମାମଲାରେ ଆଜି ବିଜେପି ରାଜ୍ୟ ପ୍ରଭାରୀ ଡ଼ି. ପୁରନ୍ଦେଶ୍ୱରୀଙ୍କ ସହ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ଅନ୍ୟତମ ମୃତକ ଦିବ୍ୟସିଂହ ବରାଳ ମୃତ୍ୟୁ ପୂର୍ବରୁ ଦେଇଥିବା ବୟାନ ଭିତ୍ତିରେ ପୁଲିସ ତଦନ୍ତ କରୁନାହିଁ।

ସେ କହିଛନ୍ତି ଯେ ମୃତ୍ୟୁ ପୂର୍ବରୁ ସେ ଦେଇଥିବା ବୟାନକୁ ପୁଲିସ ମୃତ୍ୟୁକାଳୀନ ଘୋଷଣା ଭାବେ ଗ୍ରହଣ କରି ତଦନ୍ତ କରିଆ ଆବଶ୍ୟକ ଥିବା ବେଳେ ତାହା ହେଉନାହିଁ। ପ୍ରକାଶ ମିଶ୍ର କହିଛନ୍ତି,’ଏଠି ଯେଉଁ ପୁଲିସ କାର୍ଯ୍ୟ କରୁଛନ୍ତି, ବିଶେଷ କରି ଉପକୂଳ ଅଂଚଳରେ ଥିବା ଥାନାଗୁଡିକରେ ଯେଉଁ ପୋଷ୍ଟିଙ୍ଗ ହେଉଛି, ସେମାନେ ଶାସକ ଦଳର ଅନୁଗତ ନ ହେଲେ ପୋଷ୍ଟିଙ୍ଗ କରାଯାଉ ନାହିଁ। ଏହା ଲୋକଙ୍କ ଧନ ଜୀବନ ପ୍ରତି ଏବଂ ଆଇନ ଶୃଙ୍ଖଳା ପ୍ରତି ଅତ୍ୟନ୍ତ ବିପଦଜନକ ପରିସ୍ଥିତି ସୃଷ୍ଟି କରିଛି। ଏବେ ପୁଲିସ ବ୍ୟବସ୍ଥାରେ ସ୍ୱଚ୍ଛତା ନାହିଁ।’

Comments
Loading...