ଜି.ଉଦୟଗିରି : କନ୍ଧମାଳ ଜିଲା ରାଇକିଆ ବ୍ଳକର ପଞ୍ଚାୟତ ସାହିରେ ଅସମୟରେ ଜଣେ ପୁଲିସ ଅଧିକାରୀଙ୍କ ମାନବିକତା ଆଲୋଚନାର ବିଷୟ ପାଲଟିଛି। ଏକ ଆତ୍ମହତ୍ୟା ଘଟଣାର ତଦନ୍ତ ପାଇଁ ଗାଁକୁ ଆସିଥିବା ରାଇକିଆ ଥାନାର ସେକେଣ୍ଡ ଅଫିସର ଶେଷରେ ନିଜେ ଶବକୁ କାେନ୍ଧଇ ଶ୍ମଶାନକୁ ନେବା ଘଟଣା ସାଧାରଣରେ ଚର୍ଚ୍ଚାର ବିଷୟ ପାଲଟିଛି।
ପଞ୍ଚାୟତସାହିର ବିଶିକେଶନ ନାୟକଙ୍କ ପୁଅ ବାଟ ନାୟକ କିଛିଦିନ ତଳେ ବିବାହ କରିଥିଲେ। କିନ୍ତୁ ବିବାହର କିଛିଦିନ ପରେ କୋଣସି କାରଣରୁ ପ୍ରତିଦିନ ବାଟ ଓ ତାଙ୍କ ସ୍ତ୍ରୀ ମଧ୍ୟରେ ଝଗଡା ଲାଗି ରହୁଥିଲା। ଶନିବାର ରାତିରେ ବଟ ଓ ତାଙ୍କ ସ୍ତ୍ରୀ ମଧ୍ୟରେ ପୁଣି ଥରେ ଝଗଡ଼ା ହୋଇଥିଲା । ଏଥିରେ ମାନସିକ ଭାରସାମ୍ୟ ହରାଇ ବାଟ ରବିବାର ସକାଳୁ ଘର ପାଖ ଜଙ୍ଗଲରେ ବେକରେ ଲୁଗା ଦେଇ ଆତ୍ମହତ୍ୟା କରିଥିଲେ। ଘରର ସଦସ୍ୟମାନେ ବହୁ ଖୋଜା ଖୋଜି କରିବା ପରେ ଏକ ଗଛରେ ବାଟ ନାୟକଙ୍କ ମୃତଦେହ ଝୁଲୁଥିବା ଦେଖିବାକୁ ପାଇଥିଲେ। ବାଟ ଆତ୍ମହତ୍ୟା କରିଥିବା ସମ୍ପର୍କରେ ପରିବାରବର୍ଗ ରାଇକିଆ ଥାନାକୁ ସୂଚନା ଦେଇଥିଲେ। ଏ ସମ୍ପର୍କରେ ଥାନାରେ ଏତଲା ହେବା ପରେ ରବିବାର ପୂର୍ବାହ୍ନରେ ଥାନାର ସେକେଣ୍ଡ ଅଫିସର ରାଜେଶକୁମାର ଶ୍ରୀଚନ୍ଦନ ଘଟଣାସ୍ଥଳରେ ପହଞ୍ଚି ମାମଲାର ତଦନ୍ତ ଆରମ୍ଭ କରିଥିଲେ। ତେବେ ବାଟଙ୍କ ଶବକୁ ଶ୍ମଶାନକୁ ନେବା ପାଇଁ ତାଙ୍କ ଘରେ ମାତ୍ର ୩ଜଣ ପୁରୁଷ ସଦସ୍ୟ ଥିବାରୁ ଶବ ନେବାରେ ସମସ୍ୟା ହୋଇଥିଲା। ଶେଷରେ ସେକେଣ୍ଡ ଅଫିସର ଶ୍ରୀଚନ୍ଦନ ମାନବିକତା ଦେଖାଇ ନିଜେ ଶବକୁ କାନ୍ଧ ଦେଇ ବୋହି ନେଇଥିଲେ। ପୁଲିସ ଏ ସଂକ୍ରାନ୍ତରେ କେଶ୍ ନଂ ୧/୨୧ରେ ଏକ ମାମଲା ରୁଜୁ କରିଛି। ଏଏସଆଇ ଲଡୁ କିଶୋର ତ୍ରିପାଠୀ ମାମଲାର ତଦନ୍ତ କରୁଛନ୍ତି। ସେକେଣ୍ଡ ଅଫିସରଙ୍କ ଏଭଳି ମାନବିକତା ସାଧାରଣରେ ଚର୍ଚ୍ଚାର ବିଷୟ ପାଲଟିଛି।
Comments are closed.