ଚେନ୍ନାଇ: ଚୀନ ରାଷ୍ଟ୍ରପତି ସି ଜିନପିଙ୍ଗଙ୍କ ୨ ଦିନିଆ ଭାରତ ଗସ୍ତ ଶନିବାର ଶେଷ ହେଉଛି। ଅପରାହ୍ନରେ ସେ ନେପାଳ ଅଭିମୁଖେ ଯାତ୍ରା କରିବେ। ତେବେ ଏହା ପୂର୍ବରୁ ଜିନପିଙ୍ଗ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମଧ୍ୟରେ ୨ଟି ଅନୌପଚାରିକ ବୈଠକ ଶେଷ ହୋଇଛି। ଶନିବାର ମାମଲାପୁରମଠାରେ ତାଜ୍ କୋଭ୍ ରିସର୍ଟରେ ଦୁଇ ନେତାଙ୍କ ମଧ୍ୟରେ ପ୍ରତିନିଧିସ୍ତରୀୟ ବୈଠକ ଅନୁଷ୍ଠିତ ହୋଇଥିଲା। ଭାରତ ଆତିଥ୍ୟକୁ ଚୀନ ରାଷ୍ଟ୍ରପତି ଖୁବ୍ ପ୍ରଶଂସା କରିବା ସହିତ ଏଥିରେ ସେ ଅଭିଭୂତ ହୋଇପଡ଼ିଥିବା କହିଥିଲେ। ବୈଠକ ଶେଷ ହେବା ପରେ ମୋଦୀ ଜିନପିଙ୍ଗଙ୍କୁ ଏକ ସ୍ବତନ୍ତ୍ର ଉପହାର ପ୍ରଦାନ କରିଥିଲେ। ଉପହାରସ୍ବରୂପ ମୋଦୀ ଏକ ଶାଲ୍ ଜିନପିଙ୍ଗଙ୍କୁ ଦେଇଥିଲେ। ଶାଲଟି ସ୍ବତନ୍ତ୍ର ଏଇଥିପାଇଁ ଯେ, ସେଥିରେ ଜିନପିଙ୍ଗଙ୍କ ଏକ ପ୍ରତିଛବି ରହିଛି। ଏହି ଶାଲ୍ଟିକୁ କୋଏମ୍ବାଟୁର ଜିଲାର ଶ୍ରୀରାମଲିଙ୍ଗ ସୋବନ୍ଦବିଗଇ ହ୍ୟାଣ୍ଡଲୁମ ୱିଭର୍ସ କୋଅପରେଟିଭ ସୋସାଇଟିର ବୁଣାକାରମାନେ ପ୍ରସ୍ତୁତ କରିଛନ୍ତି। ଚେନ୍ନାଇ ସିଲ୍କ କପଡ଼ା ବଜାରରେ ବହୁତ ଲୋକପ୍ରିୟ ଅଟେ। ମୋଦୀ ଉପହାର ଦେଇଥିବା ଶାଲ୍କୁ ଏପରି ତିଆରି କରାଯାଇଛି ଯେ, ସେଥିରେ ରାଷ୍ଟ୍ରପତି ଜିନପିଙ୍ଗଙ୍କ ପ୍ରତିଛବି ଜୀବନ୍ତ ପ୍ରତିଫଳିତ ହେଉଛି।
Comments are closed.