ସର୍ଭେ ହେବାର ୩ ମାସ ବିତିଲା: ନିର୍ମାଣ ହେଲାନି ରାସ୍ତା, ଜିଲାପାଳଙ୍କୁ ଦାବିପତ୍ର ପ୍ରଦାନ

ଫୁଲବାଣୀ:କନ୍ଧମାଳ ଜିଲା ବାଲିଗୁଡ଼ା ବ୍ଳକ ଅନ୍ତର୍ଗତ ରେବିଙ୍ଗିଆ ଠାରୁ ଗଡ଼େଲପଦର , ଗଡ଼ା ପିଞ୍ଜାରି, ମଟକଡ଼ି ଭଳି ବିଭିନ୍ନ ଗ୍ରାମ ସହିତ ବାଲିଗୁଡ଼ାକୁ ଯୋଗାଯୋଗ କରିବା ପାଇଁ ରାସ୍ତା ନିର୍ମାଣ କରାଯିବା ଆବଶ୍ୟକ। ସ୍ୱାଧୀନତାର ୭୪ ବର୍ଷ ପରେ ମଧ୍ୟ ଏହି ସବୁ ଗ୍ରାମ ସହିତ ବାଲିଗୁଡ଼ାକୁ ଗମନା ଗମନା ସୁବିଧା ନଥିବା ଯୋଗୁଁ ଉପରୋକ୍ତ ଗ୍ରାମରେ ବସାବାସ କରୁଥିବା ଅଧିବାସୀ ମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଯେଉଁ ମାଟି ରାସ୍ତା ଅଛି ତାହା ଦୀର୍ଘବର୍ଷ ତଳେ ନିର୍ମାଣ ହୋଇଥିଲା। ଉକ୍ତ ରାସ୍ତା ଉପରେ ୩ଗୋଟି ପଂଚାୟତ ବାସୀ ନିର୍ଭର କରିଥାନ୍ତି। ଗତ ଦିନରେ ଉକ୍ତ ରାସ୍ତା ନିର୍ମାଣ ପାଇଁ ସର୍ଭେ କରାଯାଇଥିଲା କିନ୍ତୁ ପରବର୍ତ୍ତି ସମୟରେ ଆଉ କିଛି ହୋଇନାହିଁ। ସର୍ଭେ ହେବାର ତିନିବର୍ଷ ବିତିଯାଇଥିଲେ ମଧ୍ୟ ରାସ୍ତା ନିର୍ମାଣ ହେବା ନାମ କେହି ଧରୁନାହାନ୍ତି। ରାସ୍ତା ନଥିବା ଯୋଗୁଁ ଏହି ସବୁ ଅଞ୍ଚଳ ଗୁଡ଼ିକରେ ବିକାଶ ଆଜି ପର୍ଯ୍ୟନ୍ତ ପହଞ୍ଚିପାରିନାହିଁ ବୋଲି ଅଭିଯୋଗ କରି ରେବିଙ୍ଗିଆ, ପଡ଼ିଗାଁ, ଗଡ଼ାପିଞ୍ଜା, ଗୁଡ଼େଲପଦର, ଚିଖିରିଗାଁ ଆଦି ଗ୍ରାମର ଅଧିବାସୀମାନେ ଲିଖିତ ଭାବେ ଆଜି କନ୍ଧମାଳ ଜିଲାପାଳଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି। ଏନେଇ ସେମାନେ ବାଲିଗୁଡ଼ା ନିର୍ବାଚନ ମଣ୍ଡଳିର ବିଧାୟକ, ବାଲିଗୁଡ଼ା ଉପଜିଲାପାଳ, ବାଲିଗୁଡ଼ା ବି.ଡ଼ି.ଓଙ୍କ ସମେତ ମୁଖ୍ୟମନ୍ତ୍ରୀଙ୍କୁ ମଧ୍ୟ ଦାବିପତ୍ର ପ୍ରଦାନ କରି ଅବଗତ କରିଛନ୍ତି। ରେବିଙ୍ଗିଆ ସରପଞ୍ଚ ରଞ୍ଜିତ ମଲିକଙ୍କ ନେତୃତ୍ୱରେ ଗ୍ରାମର ୱାର୍ଡ଼ ମେମ୍ବର ନଙ୍ଗରା ମଲିକ, ଉମାଚରଣ ଦିଗାଲ, ସଲାଗୁଡ଼ା ସରପଞ୍ଚ ନବୀନ ମଲିକ, କୁଇ ସମାଜ ସଭାପତି ସାମସିଂ ମଲିକ, ଅବକାଶ ମଲିକ, ଜୟମା ମଲିକ, ପ୍ରଫୁଲ ମଲିକ, ସୁବାଷ ମଲିକ, ମନନ୍ତି ମଲିକ, ଉମେଶ ମଲିକ ଓ ଅନ୍ୟମାନେ ଦାବିପତ୍ର ପ୍ରଦାନ କରିଛନ୍ତି।

Comments
Loading...