ହତ୍ୟାକାରୀ ଜେଲ୍‍ ଗଲା

ପିପିଲି:ବକେୟା ଦରମା ଟଙ୍କାକୁ କେନ୍ଦ୍ରକରି ଗତକାଲି ମାଲିକକୁ ହାତୁଡିରେ ପିଟି ହତ୍ୟା କରିଥିବା ଅଭିଯୁକ୍ତ ହିରଣ୍ୟ ସାହୁ (୬୪)କୁ ଆଜି ପିପିଲି ପୁଲିସ କୋର୍ଟ ଚାଲାଣ କରିଛି। ଜାମିନ ଆବେଦନ ଖାରଜ ହୋଇଯିବାରୁ ଅଭିଯୁକ୍ତକୁ ୧୪ ଦିନ ପାଇଁ ନିମାପଡା ସ୍ଥିତ ବିଚାର ବିଭାଗୀୟ ଜେଲ୍‍ ହାଜତକୁ ପଠାଇ ଦିଆଯାଇଛି ।
ପିପିଲି ଥାନା ଅନ୍ତର୍ଗତ ଯଶୁଆପୁର ପଞ୍ଚାୟତର ସାତଶଙ୍ଖ ବଜାର ଉପରେ ଏକ ଭଡାଘରେ କାଗଜ ଥାଳି ଓ ଧୂପକାଠି ପ୍ରସ୍ତୁତ ସଂସ୍ଥା କରିଥିବା ଖୋର୍ଦ୍ଧା ଜିଲା ଟାଙ୍ଗି ଥାନା ଅନ୍ତର୍ଗତ ଗୌଡପୁଟ ଅଞ୍ଚଳର ଦୀପକ ପାଟ୍ଟଶାଣୀ (୩୫)କୁ ଗୁରୁବାର ଦ୍ୱିପହର ସମୟରେ ଉକ୍ତ ଘର ମଧ୍ୟରେ ହିରଣ୍ୟ ହାତୁଡିରେ ପିଟି ହତ୍ୟା କରିଥିଲା। ହିରଣ୍ୟ ଉକ୍ତ ସଂସ୍ଥାରେ ଶ୍ରମିକ ଭାବେ କାର୍ଯ୍ୟ କରୁଥିବା ବେଳେ ଉଭୟଙ୍କ ମଧ୍ୟରେ ବକେୟା ପ୍ରାପ୍ୟକୁ ନେଇ ପୂର୍ବରାତିରେ ଗଣ୍ଡଗୋଳ ଘଟିଥିଲା। ହତ୍ୟାକାଣ୍ଡ ପରେ ରକ୍ତଲଗା ହାତୁଡିକୁ ଅଭିଯୁକ୍ତ ରାସ୍ତା କଡରେ ଥିବା ଏକ ବୁଦାମୂଳରେ ଲୁଚାଇ ରଖିଥିବା ବେଳେ ପୁଲିସ ଉକ୍ତ ହାତୁଡିକୁ ପରେ ଜବତ କରିଥିଲା। ପିପିଲି ଆଇଆଇସି ତଥା ତଦନ୍ତକାରୀ ଅଧିକାରୀ ଗୌରାଙ୍ଗ ଚରଣ ପୃଷ୍ଟି ଅଭିଯୁକ୍ତକୁ ଗତକାଲି ଗିରଫ କରିଥିବା ବେଳେ ଆଜି ତାକୁ ପିପିଲି କୋର୍ଟକୁ ଚାଲାଣ କରିଥିଲେ। ଅଭିଯୁକ୍ତ ହିରଣ୍ୟର ଘର କଟକ ଜିଲା ବଡମ୍ବା ଥାନା ଅନ୍ତର୍ଗତ ମାନପୁର ଅଞ୍ଚଳରେ ହୋଇଥିବା ବେଳେ ସେ ଦୀର୍ଘମାସ ହେଲା ସାତଶଙ୍ଖ ସ୍ଥିତ ଉକ୍ତ ସଂସ୍ଥାରେ ମାଲିକଙ୍କ ସହ ଏକାଠି ଗୋଟିଏ ଘରେ ରହୁଥିବା ସୂଚନା ମିଳିଛି।

Comments are closed.