ଅକ୍ଲାଣ୍ଡ : ଜ୍ୟାକବ ଡୁଫିଙ୍କ ଘାତକ ବୋଲିଂ ପରେ ଟିମ୍ ସେଫର୍ଟଙ୍କ ଅର୍ଦ୍ଧଶତକ ବଳରେ ଘରୋଇ ନ୍ୟୁଜିଲାଣ୍ଡ ପ୍ରଥମ ଟ୍ବେଣ୍ଟି୨୦ ମ୍ୟାଚରେ ୫ ୱିକେଟରେ ପାକିସ୍ତାନକୁ ପରାସ୍ତ କରିଛି। ଏହି ବିଜୟ ସହ ନ୍ୟୁଜିଲାଣ୍ଡ ୩ ମ୍ୟାଚ ବିଶିଷ୍ଟ ଟ୍ବେଣ୍ଟି୨୦ ସିରିଜ୍ରେ ୧-୦ରେ ଆଗୁଆ ରହିଛି।
ଅକ୍ଲାଣ୍ଡରେ ଶୁକ୍ରବାର ଖେଳାଯାଇଥିବା ମ୍ୟାଚରେ ପାକିସ୍ତାନ ଟସ୍ ଜିଣି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ଦଳ ପ୍ରାରମ୍ଭରୁ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ୮.୨ ଓଭରରେ ୩୯ରନରେ ୫ଟି ୱିକେଟ ହରାଇଥିଲା। ମହମ୍ମଦ ରିଜୱାନ ୧୭,ହାଇଦର ଅଲ୍ଲୀ ୩, ଖୁସ୍ଦିଲ୍ ସେହୋସ୍ ୧୬ରନ କରିଥିବାବେଳେ ଅବଦୁଲ୍ଲା ସାଫିକ୍ ଓ ମହମ୍ମଦ ହାଫିଜ୍ ବିନା ରନ୍ରେ ଆଉଟ୍ ହୋଇଥିଲେ। ୬ଷ୍ଠ ୱିକେଟରେ ଅଧିନାୟକ ସାହାଦେବ୍ ଖାନ ଓ ଇମାଦ୍ ୱାସିମ୍ ୪୦ରନ ଯୋଗ କରି ଦଳୀୟ ସ୍କୋରକୁ ୭୯ରନରେ ପହଞ୍ଚାଇଥିଲେ। ଇମାଦ୍ ୧୯ରନ କରି ଆଉଟ୍ ହୋଇଥିଲେ। ଶେଷ ଆଡକୁ ସାହାଦେବ୍ ଖାନଙ୍କ ୪୨ ଓ ଫାହିମ୍ ଆସରଫଙ୍କ ୩୧ରନ ବଳରେ ୨୦ ଓଭରରେ ୯ ୱିକେଟ ହରାଇ ୧୫୩ରନ କରିବାକୁ ସକ୍ଷମ ହୋଇଥିଲା। ଅନ୍ୟମାନଙ୍କ ମଧ୍ୟରେ ୱାହାବ୍ ରିଆଜ୍ ୯ରନ କରି ଆଉଟ୍ ହୋଇଥିବାବେଳେ ସାହିନ୍ ଆଫ୍ରିଦି ୧୦ ରନ କରି ଅପରାଜିତ ରହିଥିଲେ। ନ୍ୟୁଜିଲାଣ୍ଡ ପକ୍ଷରୁ ଜ୍ୟାକବ ଡୁଫି ୪ଟି, ସ୍କଟ୍ କୁଗିଲିନ୍ ୩ଟି ୱିକେଟ ନେଇଥିଲେ। ନ୍ୟୁଜିଲାଣ୍ଡ ୧୮.୫ ଓଭରରେ ୫ ୱିକେଟ ହରାଇ ୧୫୬ରନ କରି ବିଜୟୀ ହୋଇଥିଲା। ଟିମ୍ ସେଫର୍ଟ ୫୭,ମାର୍କ ଚାମ୍ପମ୍ୟାନ ୩୪, ଗ୍ଲେନ ଫିଲିପ୍ସ ୨୩ ରନ କରି ଆଉଟ୍ ହୋଇଥିବାବେଳେ ଜିମ୍ମି ନଶିମ୍ ୧୫ ଓ ଅଧିନାୟକ ମାଇକେଲ ସାଣ୍ଟନର ୧୨ରନ କରି ଅପରାଜିତ ରହିଥିଲେ। ପାକିସ୍ତାନ ପକ୍ଷରୁ ହାରିସ୍ ରୌଫ ୩ଟି,ସାହିନ୍ ଆଫ୍ରିଦି ୨ଟି ୱିକେଟ ନେଇଥିଲେ। ସିରିଜ୍ର ଦ୍ବିତୀୟ ମ୍ୟାଚ ୨୦ରେ ହାମିଲଟନରେ ଖେଳାଯିବ।
Comments are closed.