MEllora 950×100

ପଦ୍ମପୁର​ରେ ଚଢ଼ଉ ରାଜନୀତି

ବିଜେଡି ସମର୍ଥକଙ୍କ ବିରୋଧରେ ଆୟକର ଓ ବିଜେପି ବିରୋଧରେ ଜିଏସ୍‌ଟି

ପଦ୍ମପୁର : ପଦ୍ମପୁର ଉପନିର୍ବାଚନ ପୂର୍ବରୁ ଏଠାରେ ସରକାରୀ କଳର ବ୍ୟବହାର କରି ଚଢ଼ଉ ରାଜନୀତି ଆରମ୍ଭ ହୋଇଯାଇଛି। ଆଜି ସକାଳେ କେନ୍ଦ୍ର ଅଧୀନ ଆୟକର ବିଭାଗ ଚାରି ବ୍ୟବସାୟୀଙ୍କ ଘରେ ଚଢ଼ଉ କରିଥିବାବେଳେ ସନ୍ଧ୍ୟାରେ ରାଜ୍ୟ ଅଧୀନରେ କାର୍ଯ୍ୟରତ ଜିଏସଟି ବିଭାଗ ବିଭିନ୍ନ ଦୋକାନ‌େ‌ର ଚଢ଼ଉ କରିଥିଲା। ବିଜେଡି ସମର୍ଥକଙ୍କ ଘରେ ଆୟକର ଏବଂ ବିଜେପି ସମର୍ଥକଙ୍କ ଘରେ ଜିଏସଟି ବିଭାଗ ଚଢ଼ଉ ହୋଇଥିବା ଜଣାପଡିଛି। ଅପରପକ୍ଷରେ ଏହି ଆକ୍ରୋଶମୂଳକ ରାଜନୀତିକୁ ନେଇ ପଦ୍ମପୁର ଅଞ୍ଚଳବାସୀ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ବଣିକ ସଂଘ ପକ୍ଷରୁ ଆସନ୍ତାକାଲି ଦିଆଯାଇଥିବା ୧୨ ଘଣ୍ଟିଆ ପଦ୍ମପୁର ବନ୍ଦ ଡାକରାକୁ ଶେଷରେ ପ୍ରତ୍ୟାହାର କରିନିଆଯାଇଛି। ପୁଲିସ, ପ୍ରଶାସନିକ ଅଧିକାରୀ ଓ ବଣିକ ସଂଘର ବିଳମ୍ବିତ ରାତିରେ ଆଲୋଚନା ପରେ ଏହା ସ୍ଥିର ହୋଇଛି।
ସୂଚନାଯୋଗ୍ୟ ଯେ, ଆସନ୍ତା ୫ତାରିଖରେ ହେବାକୁ ଥିବା ପଦ୍ମପୁର ଉପନିର୍ବାଚନ ପୂର୍ବରୁ ତିନି ପ୍ରମୁଖ ଦଳ ତାଙ୍କର ପୂର୍ଣ୍ଣ ଶକ୍ତିର ଉପଯୋଗ ଆରମ୍ଭ କରିଛନ୍ତି। ରବିବାର କେନ୍ଦ୍ରମନ୍ତ୍ରୀ ଅଶ୍ବିନୀ ବୈଷ୍ଣବ ଓ ନରେନ୍ଦ୍ର ସିଂ ତୋମାର ପଦ୍ମପୁରକୁ ଆସି ଭୋଟରକୁ ବିଜେପି ସପକ୍ଷରେ ଭୋଟ ପ୍ରଚାର କରିିଥିଲେ। ଅଞ୍ଚଳବାସୀଙ୍କ ଦୁଃଖ ଦୁର୍ଦ୍ଦଶା କଥା କହିଥିଲେ। ଏହି ଅଞ୍ଚଳରେ କୃଷିର ବିକାଶ ଏବଂ ରେଳପଥ ସଂଯୋଗୀକରଣ ନେଇ ପ୍ରତିଶ୍ରୁତି ଦେଇ ଯାଇଥିଲେ। ତେବେ ଆଜି ସକାଳୁ ହଠାତ୍‌ କେନ୍ଦ୍ରୀୟ ଆୟକର ବିଭାଗ ପକ୍ଷରୁ ବିଜେଡି ସମର୍ଥିତ ତିନି ପ୍ରତିଷ୍ଠିତ ବ୍ୟବସାୟୀଙ୍କ ବାସଗୃହରେ ଚଢଉ ଆରମ୍ଭ ହୋଇଥିଲା। ସ୍ଥାନୀୟ ବହିଦାରପଡାର ମହମ୍ମଦ ସାଜିଦ୍, ସାହୁପଡ଼ାର ମାନଭଞ୍ଜନ ସାହୁ, ଶାସ୍ତ୍ରୀ ଛକ ନିକଟରେ ରହୁଥିବା ଗଜାନନ୍ଦ ଅଗ୍ରୱାଲ ଏବଂ ନେହେରୁ ଗଳିର ମହମ୍ମଦ ଜାଭେଦଙ୍କ ଘରେ ଏହି ଚଢ଼ଉ କରାଯାଇଥିଲା। ଅପରପକ୍ଷରେ ଗଣ୍ଡଗୋଳ ଆଶଙ୍କାରେ ଅଞ୍ଚଳକୁ ସିଆରପିଏଫ ଯବାନ ଛାଉଣୀ କରି ରଖାଯାଇଥିଲା। କେନ୍ଦ୍ରୀୟ ଆୟକର ଦଳ ସ୍ଥାନୀୟ ଆଇନଜୀବୀ କିମ୍ବା ପୁଲିସକୁ ମଧ୍ୟ ଚଢଉ ସ୍ଥଳକୁ ଯିବାକୁ ଦେଇ ନ ଥିଲେ। ମହମ୍ମଦ ସାଜିଦ୍‌ଙ୍କ ଘରକୁ ଓକିଲ ଯିବାକୁ ଚେଷ୍ଟା କରିଥିବାବେଳେ ସିଆରପିଏଫ ପକ୍ଷରୁ ତାଙ୍କୁ ଭିତରକୁ ଛଡ଼ାଯାଇ ନଥିଲା। କେନ୍ଦ୍ରୀୟ ଅର୍ଦ୍ଧ ସାମରିକ ବଳ, ସ୍ଥାନୀୟ ପୁଲିସ, ଉପଖଣ୍ତ ଆରକ୍ଷୀ ଅଧିକ୍ଷକଙ୍କୁ ମଧ୍ୟ ଚଢ଼ଉ ନେଇ କୌଣସି ପୂର୍ବ ସୂଚନା ଦିଆଯାଇ ନ ଥିବାରୁ ପୁଲିସ ମଧ୍ୟ ଅସହାୟ ହୋଇ ପଡିଥିଲା। ଘଟଣାସ୍ଥଳକୁ ଯିବା ପାଇଁ ଅନୁମତି ଦିଆନଯିବା ଘଟଣାରେ ସାଜିଦ୍‌ଙ୍କ ଓକିଲ ପ୍ରଶାନ୍ତ ମହାନ୍ତି ପଦ୍ମପୁର ଥାନାରେ ଏକ ଏତଲା ଦେଇଛନ୍ତି। ପରେ ପଦ୍ମପୁର ଥାନା ଆଇଆଇସି ଓ ଏସ୍‌ଡିପିଓ ସାଜିଦ୍‌ଙ୍କ ଘରକୁ ଯାଇ ଆୟକର ଅଧିକାରୀଙ୍କ ସହ ଆଲୋଚନା କରିଥିଲେ। ଯେଉଁ ଚାରି ଜଣଙ୍କ ଘରେ ଆୟକର ଚଢ଼ଉ ହୋଇଛି ସେମାନେ ସମସ୍ତେ ଦିବଙ୍ଗତ ବିଧାୟକ ବିଜୟରଂଜନ ସିଂ ବରିହାଙ୍କ ଅନୁଗତ ଥିଲେ ବୋଲି କୁହାଯାଉଛି। ମହମ୍ମଦ ସାଜିଦ୍‌ଙ୍କ ରାଇସ୍ ମିଲ୍ ସହ ଟ୍ରାନସ୍ପୋର୍ଟ ବ୍ୟବସାୟ ମଧ୍ୟ ରହିଛି । ମାନଭଞ୍ଜନ ସାହୁ ସାଜିଦଙ୍କ ବ୍ୟବସାୟିକ ସହଯୋଗୀ। ଚଢ଼ଉ ହୋଇଥିବା ଅନ୍ୟତମ ବିଜେଡି ନେତା ଗଜାନନ୍ଦ ଅଗ୍ରୱାଲଙ୍କର ରାଇସ୍ ମିଲ୍ ରହିଛି। ମହମ୍ମଦ ସାଜିଦ୍‌ ସୁଶାନ୍ତ ସିଂହଙ୍କର ମଧ୍ୟ ସେମାନେ ଅନୁଗତ ବୋଲି ଜଣାପଡିଛି। ମହମ୍ମଦ ଜାଭେଦ ସାଜିଦଙ୍କ ସହଯୋଗୀ ବୋଲି ଜଣାପଡିଛି।
ତେବେ ଉପନିର୍ବାଚନ ଅବ୍ୟବହତି ପୂର୍ବରୁ ହଠାତ୍‌ ଚଢ଼ଉକୁ ସାଧାରଣରେ ସହଜରେ ଗ୍ରହଣ କରାଯାଇ ପାରୁନାହିଁ। ନିର୍ଦ୍ଧିଷ୍ଟ ଭାବେ ବିଜେଡି ନେତାଙ୍କୁ ଟାର୍ଗେଟ କରି ଆୟକର ବିଭାଗର ଚଢ଼ଉ ହୋଇଥିବାରୁ ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି। ଅପରପକ୍ଷରେ ଚଢ଼ଉ ହୋଇଥିବା ସଂପୃକ୍ତ ତିନି ଜଣ ଆୟକର ଫାଙ୍କି କରିଥିଲେ ନା ଦଳୀୟ ପାଣ୍ଠି ଗଚ୍ଛିତ ରଖିଥିଲେ ତାହା ମୁଖ୍ୟ ଆଲୋଚନାର ପ୍ରସଙ୍ଗ। ଭୋଟ୍‌ରେ ବିଜେପିର ଶଙ୍କାଥିବାରୁ ଏହି ଚଢ଼ଉ ବୋଲି ଅଭିଯୋଗ କରିଛି ବିଜେଡି। ଜବାବରେ ବିଜେପି କହିଛି ନିର୍ବାଚନ ଆଳରେ ଆୟକର ଫାଙ୍କିଥିବା ବ୍ୟକ୍ତିଙ୍କୁ ସୁରକ୍ଷା ଆଦୌ ନ୍ୟାୟସଂଗତ ନୁହେଁ। କଂଗ୍ରେସ ବି ଏଭଳି ଚଢଉକୁ ସମାଲୋଚାନ କରିଛି।
ଆଜି ସକାଳେ ୩ ଜଣ ସ୍ଥାନୀୟ ବିଜେଡି ନେତାଙ୍କ ଘରେ ଆୟକର ବିଭାଗର ଚଢ଼ଉ ହୋଇଥିବାବେଳେ ସନ୍ଧ୍ୟାରେ ବିଜେପି ନେତାଙ୍କ ଦୋକାନରେ ଜିଏସ୍‌ଟି ଚଢ଼ଉ ହୋଇଛି । ବିଜେପି ନେତାଙ୍କ ମାଲିକାନାରେ ଥିବା କିଛି ବ୍ୟବସାୟିକ ସଂସ୍ଥାରେ ଆଜି ରାଜ୍ୟ ସରକାରଙ୍କ ଅଧୀନରେ ଥିବା ଜିଏସ୍‌ଟି ବିଭାଗ ପକ୍ଷରୁ ଏହି ଚଢ଼ଉ ହୋଇଥିବା କୁହାଯାଉଛି। ପଦ୍ମପୁରରେ ଥିବା ଲୁଗା ଦୋକାନ, ପେଟ୍ରୋଲ ପମ୍ପ ସମେତ ପାଇକମାଳ ଓ ଝାରବନ୍ଧରେ ଥିବା ବ୍ୟବସାୟିକ ପ୍ରତିଷ୍ଠାନରେ ଏହି ଚଢ଼ଉ ହୋଇଛି। ପଦ୍ମପୁରରେ ଚଢ଼ଉ ହୋଇଥିବା ଜଗଦମ୍ବା ଲୁଗା ଦୋକାନ ହେଉଛି ସ୍ଥାନୀୟ ନଗର ବିଜେପି ସଭାପତି ସୁନୀଲ ଅଗ୍ରୱାଲଙ୍କର। ସୁନୀଲଙ୍କ ବାପା ହେଉଛନ୍ତି ପୂର୍ବତନ ପଦ୍ମପୁର ନଗରପାଳ। ତେଣୁ ବିଜେପି ସମର୍ଥକଙ୍କୁ ଟାର୍ଗେଟ କରି ଏହି ଚଢ଼ଉ ହୋଇଥିବା ବିଜେପି ପକ୍ଷରୁ ପାଲଟା ଅଭିଯୋଗ କରାଯାଇଛି। ଚଢ଼ଉ ସ୍ଥଳରେ ବିଜେପି କର୍ମୀ ପହଞ୍ଚିବା ସହ ଜିଏସ୍‌ଟି ଅଧିକାରୀଙ୍କ ଏଭଳି ଚଢ଼ଉକୁ ନେଇ ପ୍ରଶ୍ନ ଉଠାଇଛନ୍ତି । ଦୋକାନ ବନ୍ଦ ନ କରି ଖୋଲାମେଲାରେ ଏବଂ ଗଣମାଧ୍ୟମକୁ ଡାକି ଏଭଳି ଯାଞ୍ଚ କରିବା ପଛର ଉଦ୍ଦେଶ୍ୟ କଣ ବୋଲି ବିଜେପି ନେତାମାନେ ପ୍ରଶ୍ନ କରିଛନ୍ତି। ତେବେ ଉଭୟ ଚଢ଼ଉ କ୍ଷେତ୍ରରେ ଅଧିକାରୀମାନଙ୍କ ମତାମତ ବା ପ୍ରତିକ୍ରିୟା ମିଳି ପାରି ନାହିଁ। ଉଭୟ ସଂସ୍ଥା ‌ଗଣମାଧ୍ୟମ ପ୍ରଶ୍ନକୁ ଏଡାଇ ଯାଇଛନ୍ତି।

Comments are closed.