ରାଜ୍ୟର ବିଭିନ୍ନ ସ୍ଥାନକୁ ଅମ୍ଳଜାନ ଯୋଗାଣ

ଭୁବନେଶ୍ୱର : କିଛି ଦିନ ଧରି ଓଡ଼ିଶାରୁ ବିଭିନ୍ନ ରାଜ୍ୟକୁ ଅମ୍ଳଜାନ ଯୋଗାଣ କାର୍ଯ୍ୟ ଜାରି ରହିଛି। ଅଦ୍ୟାବଧି ୧୮୩ ଟି ଟ୍ୟାଙ୍କର୍ ଯୋଗେ ୩୪୧୧.୦୩୨ ଟନରୁ ଅଧିକ ଅମ୍ଳଜାନ  ବିଭିନ୍ନ ରାଜ୍ୟକୁ ପଠାଯାଇଛି। ଅନୁଗୁଳ, ରାଉରକେଲା, ଢେଙ୍କାନାଳ ଏବଂ ଯାଜପୁର ଜିଲ୍ଲାରୁ ଆନ୍ଧ୍ରପ୍ରଦେଶ, ତେଲେଙ୍ଗାନା, ମଧ୍ୟପ୍ରଦେଶ, ତାମିଲନାଡ଼ୁ, ମହାରାଷ୍ଟ୍ର, ଉତରପ୍ରଦେଶ, ହରିୟାଣାକୁ ଅମ୍ଳଜାନ ପଠାଯାଇଛି। ଅକ୍ସିଜେନ୍ ନେଇ ଯାଉଥିବା ଟ୍ୟାଙ୍କର ଗୁଡିକର ସହଜ ଯାତାୟତ ନିମନ୍ତେ ଏକ ସ୍ୱତନ୍ତ୍ର ଗ୍ରୀନ୍ କରିଡ଼ର୍ ପ୍ରସ୍ତୁତ କରାଯାଇଛି। ରାଜ୍ୟ ତଥା ରାଜ୍ୟ ଦେଇ ବାହାରକୁ ଅମ୍ଳଜାନ ନେଇ ଯାଉଥିବା ଟ୍ୟାଙ୍କର ଗୁଡିକର ଯାତାୟତରେ କିଛି ଅସୁବିଧା ନ ଉପୁଜିବ ସେ ନେଇ ରାଜ୍ୟ ପୁଲିସ ତରଫରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି।
ଅନୁଗୁଳ ଜିଲ୍ଲାରୁ ୨୨ଟି ଟ୍ୟାଙ୍କର୍ ଯୋଗେ ୩୬୩.୬୨ ଟନ୍, ଢେଙ୍କାନାଳ ଜିଲ୍ଲାରୁ ୩୩ଟି ଟ୍ୟାଙ୍କର୍ ଯୋଗେ ୫୧୭.୩୨ଟନ୍ , ଯାଜପୁର ଜିଲ୍ଲାରୁ୫୬ଟି ଟ୍ୟାଙ୍କର୍ ଯୋଗେ ୧୧୫୨.୫୧ ଟନ୍ ଏବଂ ରାଉରକେଲାରୁ ୭୨ଟି ଟ୍ୟାଙ୍କର୍ ଯୋଗେ ୧୩୭୭.୫୮୨ ଟନ୍ ଅମ୍ଳଜାନ ବିଭିନ୍ନ ରାଜ୍ୟକୁ ପଠାଯାଇଛି।
୫୭ଟି ଟ୍ୟାଙ୍କରେ ଆନ୍ଧ୍ରପ୍ରଦେଶକୁ ୧୨୧୫.୪୩ ଟନ୍, ୪୬ଟି ଟ୍ୟାଙ୍କର୍ ଯୋଗେ ତେଲେଙ୍ଗାନାକୁ ୭୬୬.୦୫୯ ଟନ୍, ତାଲିମନାଡୁକୁ ୫ଟି ଟ୍ୟାଙ୍କର୍ ଯୋଗେ ୯୮.୫୪ ଟନ୍, ହରିୟାଣାକୁ ୧୮ଟି ଟ୍ୟାଙ୍କର୍ରେ ୩୭୪.୭୫୨ ଟନ୍, ମହାରାଷ୍ଟ୍ରକୁ ୧୦ଟି ଟ୍ୟାଙ୍କରେ ୧୬୪.୫୬ ଟନ୍, ଛତିଶଗଡ଼କୁ ୯ଟି ଟ୍ୟାଙ୍କରେ ୧୩୬.୨୪୧ ଟନ୍,ଉତରପ୍ରଦେଶକୁ ୧୫ଟି ଟ୍ୟାଙ୍କର୍ ଯୋଗେ ୨୭୭.୯୩ ଟନ, ୨୩ଟି ଟ୍ୟାଙ୍କର୍ ଯୋଗେ ୩୭୭.୫୨ ଟନ୍ ଅମ୍ଳଜାନ ମଧ୍ୟପ୍ରଦେଶକୁ ଯୋଗାଇ ଦିଆଯାଇଛି।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ରାଜ୍ୟ ପୁଲିସ ପକ୍ଷରୁ ଏକ ସ୍ୱତନ୍ତ୍ର ସେଲ୍ ଗଠନ କରାଯାଇଛି। ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ (ଆଇନ୍ ଓ ଶୃଙ୍ଖଳା) ଯଶୋୱନ୍ତ ଜେଠୱାଙ୍କ ପ୍ରତ୍ୟକ୍ଷ ତତ୍ୱାବଧାନରେ ଅମ୍ଳଜାନ ଯୋଗାଣ କାର୍ଯ୍ୟକ୍ରମକୁ ତ୍ୱରାନ୍ୱିତ କରାଯାଉଛି। ଜିଲ୍ଲାର ସମସ୍ତ ଏସ୍ପି/ଡିସିପି/ରେଂଜ ଡିଆଇଜି/ଆଇଜିଏବଂ ପୁଲିସ କମିଶନର ନିଜ ନିଜ ଅଂଚଳରେ ଏହି କାର୍ଯ୍ୟକୁ ତ୍ୱରାନ୍ୱିତ କରିବାକୁ ନିର୍ଦ୍ଦେଶ ଦିଆଯାଇଛି।
ଅମ୍ଳଜାନ ଅଭାବର ସମ୍ମୁଖୀନ ହେଉଥିବା ରାଜ୍ୟଗୁଡ଼ିକରେ ଟ୍ୟାଙ୍କରକୁ ସୁରକ୍ଷିତ ଭାବେ ନିର୍ଦ୍ଧାରିତ ସ୍ଥାନରେ ପହଁଚାଇବାକୁ ରାଜ୍ୟ ପୁଲିସ ସଦାସର୍ବଦା ପ୍ରତିଶ୍ରୁତିବଦ୍ଧ ରହିଛି।

Comments
Loading...