ଭୁବନେଶ୍ୱର : ଓଡ଼ିଶା କୃଷି ଓ ବୈଷୟିକ ବିଶ୍ବବିଦ୍ୟାଳୟ (ଓୟୁଏଟି)ର ବିକାଶ କାର୍ଯ୍ୟ ଅଟକି ରହିଛି। ଏନେଇ ବିଶ୍ବବିଦ୍ୟାଳୟ ଅଧୀନରେ ଥିବା ସମସ୍ତ ମହାବିଦ୍ୟାଳୟର ଛାତ୍ର ସଂସଦର ପ୍ରତିନିଧି ଲିଖିତ ଭାବେ କୁଳପତିଙ୍କ ଦୃଷ୍ଟି ଆକର୍ଷଣ କରିଛନ୍ତି।
ମୁଖ୍ୟତଃ ହଷ୍ଟେଲ ସମସ୍ୟାର ସମାଧାନ ପାଇଁ ଦୃଷ୍ଟି ଆକର୍ଷଣ କରିଛନ୍ତି। ପୁରୁଣା ହଷ୍ଟେଲର ମରାମତି ହେଉ ନାହିଁ କିମ୍ବା ମହାବିଦ୍ୟାଳୟର ଭିତ୍ତିଭୂମି ବିକାଶ କାର୍ଯ୍ୟ ତଦାରଖ ହେଉନାହିଁ। ସ୍ମାର୍ଟ କ୍ଲାସ୍ରୁମ୍ ଓ ଲାବ୍ର ଆଧୁନିକୀକରଣ, ପାଠାଗାର ଓ ଖେଳ ପଡ଼ିଆର ଉନ୍ନତୀକରଣ ଦିଗରେ ଦୃଷ୍ଟି ଦିଆଯାଉନି। ସ୍ପୋର୍ଟସ୍ କମ୍ପ୍ଲେକ୍ସର ଉନ୍ନୟନ ପାଇଁ ଯୋଜନା ହୋଇଥିଲେ ମଧ୍ୟ ତାହା କାର୍ଯ୍ୟକାରୀ କରାଯାଉନି।
ବିଧାନସଭାରେ ୧୫୦ କୋଟି ବିଶ୍ବବିଦ୍ୟାଳୟ ପାଇଁ ମଞ୍ଜୁର କରାଯାଇଥିଲା। ତେବେ ଏପର୍ଯ୍ୟନ୍ତ କୌଣସି ଉନ୍ନୟନମୂଳକ କାମ ଆରମ୍ଭ ହୋଇନି। ପୁରୀ ଶ୍ରୀମନ୍ଦିର, ଲିଙ୍ଗରାଜ ମନ୍ଦିର, ବରମୁଣ୍ଡା ବସଷ୍ଟାଣ୍ଡର ଉନ୍ନତୀକରଣ ଆରମ୍ଭ ହୋଇଥିବା ବେଳେ ଓୟୁଏଟିର ଭିତ୍ତିଭୂମି ବିକାଶ କେବେ ହେବ ବୋଲି ବିଦ୍ୟାର୍ଥୀ ପ୍ରଶ୍ନ କରିଛନ୍ତି। ଯଥାଶୀଘ୍ର ଅନୁମୋଦିତ ଟଙ୍କାକୁ ଉପଯୋଗ କରି ନୂତନ ରୂପରେଖ ପ୍ରଦାନ କରିବାକୁ ଓୟୁଏଟି ଛାତ୍ର ସଂସଦ ପକ୍ଷରୁ ଦାବି କରୁଛି।
ସୂଚନାଯୋଗ୍ୟ ଯେ, କିଛି ମାସ ପୂର୍ବେ ୫-ଟି ସଚିବ ଭି.କେ ପାଣ୍ଡିଆନ୍ ଅଚାନକ ଗସ୍ତରେ ଆସି ବିଶ୍ବବିଦ୍ୟାଳୟ ଭିତ୍ତିଭୂମି ଯାଞ୍ଚ କରିଥିଲେ। ବିଶ୍ବବିଦ୍ୟାଳୟ କର୍ତ୍ତୃପକ୍ଷ, ଛାତ୍ରଛାତ୍ରୀ ଓ ଅଧ୍ୟାପକଙ୍କ ସହ ଆଲୋଚନା ମଧ୍ୟ କରିଥିଲେ। ଏହି ଅବସରରେ ଭିତ୍ତିଭୂମି ବିକାଶ ପାଇଁ ସେ ମଧ୍ୟ ପ୍ରତିଶ୍ରୁତି ଦେଇଥିଲେ। କୁଳପତି ପ୍ରଫେସର ପୱନ ଅଗ୍ରୱାଲ କହିଛନ୍ତି ବିଶ୍ବବିଦ୍ୟାଳୟ ପକ୍ଷରୁ ଭିତ୍ତିଭୂମି ବିକାଶ କାମ ଜାରି ରହିଛି। ସରକାର ସମସ୍ତପ୍ରକାର ସହଯୋଗ କରୁଛନ୍ତି।