MEllora 950×100

୨୮ରୁ ଓୟୁଏଟି ପ୍ରବେଶିକା ପରୀକ୍ଷା

ଭୁବନେଶ୍ୱର:ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ(ଓୟୁଏଟି)ର ସ୍ନାତକ(ୟୁଜି) ପାଠ୍ୟକ୍ରମ ନାମଲେଖା ପାଇଁ ଚଳିତ ମାସ ୨୮ ତାରିଖରୁ ପ୍ରବେଶିକା ପରୀକ୍ଷା ଆରମ୍ଭ ହେବ। ଛାତ୍ରଛାତ୍ରୀଙ୍କର ପ୍ରବେଶପତ୍ର(ଆଡମିଟ୍‍ କାର୍ଡ) ଓୟୁଏଟି ୱେବ୍‍ସାଇଟ୍‍ରୁ ଡାଉନଲୋଡ୍‍(ସଂଗ୍ରହ) କରିପାରିବେ।
ଓୟୁଏଟି ଅଧୀନରେ ଥିବା ୯ ମହାବିଦ୍ୟାଳୟର ପ୍ରାୟ ୬୫୦ ସ୍ନାତକ ଆସନ(ସିଟ୍‍) ପାଇଁ ପରୀକ୍ଷା ହେବ। ପରୀକ୍ଷା ୨୮ ତାରିଖରୁ ଆରମ୍ଭ ହୋଇ ୩୦ରେ ସରିବ। ଚଳିତ ବର୍ଷ ୨୫ ହଜାର ୮୭୧ ଛାତ୍ରଛାତ୍ରୀ ପରୀକ୍ଷା ଦେବେ। ରାଜ୍ୟର ୨୫ ଜିଲାରେ ୫୨ କେନ୍ଦ୍ର ଏବଂ ଦିଲ୍ଲୀର ଏକ କେନ୍ଦ୍ରରେ ମଧ୍ୟ ପରୀକ୍ଷା ହେବ।
କରୋନା ଯୋଗୁଁ ଭିଡ ଏଡ଼ାଇବାକୁ ଦୁଇଟି ପର୍ଯ୍ୟାୟରେ ପରୀକ୍ଷା କରାଯିବ। ପୂର୍ବାହ୍ନ ୧୦ଟା୩୦ରୁ ୧୨ଟା୩୦ ମଧ୍ୟରେ ପ୍ରଥମ ଓ ଅପରାହ୍ନ ୨ଟାରୁ୪ଟା ଭିତରେ ଦ୍ୱିତୀୟ ପର୍ଯ୍ୟାୟ ପରୀକ୍ଷା ଅନୁଷ୍ଠିତ ହେବ। ଅନ୍ୟପକ୍ଷରେ ୧୭ ତାରିଖରୁ ଫର୍ମ-ବି ଦାଖଲ ଆରମ୍ଭ ହୋଇଛି।

 

ଏହି ଫର୍ମରେ ଛାତ୍ରଛାତ୍ରୀ ସେମାନଙ୍କ ସବୁ ପାଠପଢ଼ା ସମ୍ବନ୍ଧୀୟ ପ୍ରମାଣପତ୍ର ସହ ଆବଶ୍ୟକ କାଗଜପତ୍ର ଦାଖଲ କରିବେ। ଆସନ୍ତା ମାସ ୭ ତାରିଖ ସୁଦ୍ଧା ବିଦ୍ୟାର୍ଥୀ ଫର୍ମ-ବି ଦାଖଲ କରିବେ। ଫର୍ମ-ବି ଦାଖଲ କରି ନ ଥିବା ବିଦ୍ୟାର୍ଥୀ ନାମଲେଖାରୁ ବାଦ ପଡ଼ିବେ ବୋଲି ବିଶ୍ୱବିଦ୍ୟାଳୟ ପକ୍ଷରୁ କୁହାଯାଇଛି। ସେହିପରି ସ୍ନାତକୋତ୍ତର(ପିଜି), ପିଏଚ୍‍ଡି, ସିପିଜିଏସ୍‍ ଭଳି ପାଠ୍ୟକ୍ରମରେ ନାମଲେଖା ପାଇଁ ଆସନ୍ତା ସପ୍ତାହରୁ ଆବେଦନ ଆରମ୍ଭ ହେବ। ଏନେଇ ଆସନ୍ତା ସପ୍ତାହରେ ବିଶ୍ୱବିଦ୍ୟାଳୟ ପକ୍ଷରୁ ବିଜ୍ଞପ୍ତି ପ୍ରକାଶ କରାଯିବ। ଛାତ୍ରଛାତ୍ରୀ ଅନ୍‍ଲାଇନ୍‍(ସଞ୍ଚାର ଜରିଆରେ) ଆବେଦନ କରିବେ। ଖୁବ୍‍ଶୀଘ୍ର ଏନେଇ ତାରିଖ ଘୋଷଣା ହେବ ବୋଲି ଜଣାପଡ଼ିଛି।

Comments are closed.