MEllora 950×100

ଶ୍ରଦ୍ଧାଞ୍ଜଳି…ସାହସୀ ସାମ୍ବାଦିକ ଅରିନ୍ଦମ

ରାଜ୍ୟରେ ସମ୍ବାଦ ପରିବେଷଣ କ୍ଷେତ୍ରରେ ନିଜର ଅଧ୍ୟବସାୟ ଓ ନିର୍ଭିକ ସାମ୍ବାଦିକତା ପାଇଁ ସାଧାରଣ ଜନମାନସଙ୍କ ନିକଟବର୍ତ୍ତୀ ହୋଇପାରିଥିବା ଓଡିଶା ଟିଭିର ମୁଖ୍ୟ ସାମ୍ବାଦିକ ଅରିନ୍ଦମ ଦାସଙ୍କର ବିୟୋଗ ଘଟିଛି। କଟକ ନରାଜ ମୁଣ୍ଡଳୀ ଠାରେ ନଦୀ ମଝିରେ ଅଟକି ରହିଥିବା ଏକ ହାତୀକୁ ଉଦ୍ଧାର ପାଇଁ ଯାଇଥିବା ଓଡ୍ରାଫ ଦଳ ସହ ବୋଟରେ ଓଡିଶା ଟିଭିର ଉଦୀୟମାନ ସାମ୍ବାଦିକ ଅରିନ୍ଦମ ଦାସ ଓ କ୍ୟାମେରାମ୍ୟାନ ପ୍ରଭାତ ସିହ୍ନା ଯାଇଥିଲେ। ତେବେ ଓଡ୍ରାଫ ଟିମ ହାତୀର ନିକଟତର ହେଉଥିବା ବେଳେ ଜଳ ସ୍ରୋତର ପ୍ରଖର ସୁଅରେ ବୋଟଟି ଭାରସାମ୍ୟ ହରାଇ ଥିଲା ଓ ମୁଣ୍ଡଳୀ ପୋଲ ତଳକୁ ଖସିଯାଇ ପୋଲର ଏକ ଖୁଣ୍ଟ ପାଖରେ କିଛି ସମୟ ଧରି ଘୁରି ବୁଲିଥିଲା।

ବୋଟକୁ ଅକ୍ତିଆରକୁ ଆଣିବା ପାଇଁ ଓଡ୍ରାଫ ଟିମ ସଦସ୍ୟ ଅନେକ ଚେଷ୍ଟା କରିଥିଲେ ମଧ୍ୟ ଶେଷ ମୁହୂର୍ତ୍ତରେ ବୋଟଟି ଓଲଟି ପଡିଥିଲା। ଏହି ବିଷୟ ପ୍ରଚାରିତ ହେବା ମାତ୍ରେ ସେମାନଙ୍କୁ ଉଦ୍ଧାର କରିବା ପାଇଁ ପଦକ୍ଷେପ ନିଆଯାଇଥିଲା। ଅରିନ୍ଦମ, ପ୍ରଭାତ ଓ ଓଡ୍ରାଫର ଅନ୍ୟ ସଦସ୍ୟମାନଙ୍କୁ ଉଦ୍ଧାର କରି ଏସସିବି ମେଡିକାଲକୁ ଅଣାଯାଇଥିଲା। କିନ୍ତୁ ବିଧିର ବିଧାନ କିଛି ଅଲଗା ଥିଲା, ଏସସିବିର ଜରୁରୀକାଳୀନ ଅଧିକାରୀ ଭୁବନାନନ୍ଦ ମହାରଣାଙ୍କ ସୂଚନା ଅନୁଯାୟୀ, ଅରିନ୍ଦମଙ୍କୁ ଉଦ୍ଧାର କରାଯାଇ ମେଡିକାଲ ଆଣିବା ଭିତରେ ତାଙ୍କର ମୃତ୍ୟୁ ଘଟି ସାରିଥିଲା। ବରିଷ୍ଠ ଡାକ୍ତର ଓ ଅନ୍ୟ କର୍ମଚାରୀମାନେ ପ୍ରାୟ ଏକ ଘଣ୍ଟା ଧରି ଅକ୍ଲାନ୍ତ ପରିଶ୍ରମ କରିଥିଲେ ତାଙ୍କୁ ବଞ୍ଚାଇବା ପାଇଁ ହେଲେ ତାହା ସଫଳ ହୋଇ ପାରିନଥିଲା।

୧୯୮୨ ମସିହାରେ ଜନ୍ମଗ୍ରହଣ କରିଥିବା ଅରିନ୍ଦମଙ୍କର ମାତ୍ର ୩୮ ବର୍ଷ ବୟସରେ ଅକାଳ ବିୟୋଗ ଘଟିଛି। କିଛି ବର୍ଷ ପୂର୍ବେ ଅରିନ୍ଦମଙ୍କ ପିତାଙ୍କର ଏକ ସଡକ ଦୁର୍ଘଟଣାରେ ମୃତ୍ୟୁ ଘଟିଥିଲା। ଅରିନ୍ଦମଙ୍କ ଘରେ ତାଙ୍କ ପତ୍ନୀ ଓ ପୁଅ ଅଛନ୍ତି। ଆମ ‘ସମାଜ’ ପରିବାର ପକ୍ଷରୁ ଅରିନ୍ଦମଙ୍କ ପ୍ରତି ଗଭୀର ଶ୍ରଦ୍ଧାଞ୍ଜଳି, ତାଙ୍କ ଆତ୍ମାର ସଦଗତି ନିମନ୍ତେ ଈଶ୍ୱରଙ୍କ ନିକଟରେ ପ୍ରାର୍ଥନା।

Comments are closed.