MEllora 950×100

ବିଜୁସେତୁ ନିର୍ମାଣ ପରେ ଆନ୍ଧ୍ରକୁ ଆଦିବାସୀଙ୍କ କଡା ଜବାବ

ପାତ୍ରପୁର: ଗଞ୍ଜାମ ଜିଲ୍ଲା ପାତ୍ରପୁର ବ୍ଲକର ବହୁ ଗ୍ରାମ ଆନ୍ଧ୍ର ପ୍ରଦେଶ ସୀମାନ୍ତରେ ରହିଛି। ସେହି ସବୁ ଗ୍ରାମ ମଧ୍ୟରୁ ଦୁଇଟି ପଞ୍ଚାୟତର କୋଡିଏରୁ ଅଧିକ ଆଦିବାସୀ ଗ୍ରାମକୁ ଯିବାକୁ ହେଲେ ଏକାଧିକ ସ୍ଥାନରେ ନଦୀ ପାର ହୋଇ ଆନ୍ଧ୍ର ପଥରେ ଯିବାକୁ ପଡୁଛି। ଓଡ଼ିଶାର ଏହି ଆଦିବାସୀ ଗ୍ରାମ ମଧ୍ୟରୁ ଚାରିଗୋଟି ଗ୍ରାମ ଗୁଡିଖଳା, କୁଲାଡି, ସାତପୁରୀ, ବାବନା ସାହି ଲୋକଙ୍କ ସରଳତାର ସୁଯୋଗ ନେଇ ଆନ୍ଧ୍ରପ୍ରଦେଶ ସରକାର ନିଜର ଉପସ୍ଥିତ ଜାହିର ପାଇଁ ଦୀର୍ଘବର୍ଷ ହେଲା ଅହରହ ଉଦ୍ୟମ ଜାରି ରଖିଛନ୍ତି। ଗ୍ରାମକୁ ବିଜୁଳି ପାଣି ରାସ୍ତା ସହିତ ଲୋକଙ୍କୁ ବିଭିନ୍ନ ସହାୟତା ପ୍ରଦାନ ସହିତ ନିଜର କରିବା ଉଦ୍ୟମ ଜାରି ରଖିଛି।

ଏହି ଚାରିଗୋଟି ଗ୍ରାମର ଲୋକଙ୍କ ପାଖରେ ଉଭୟ ରାଜ୍ୟର ଭୋଟ ପରିଚୟପତ୍ର ରହିଥିବା ବେଳେ ଦୁଇ ରାଜ୍ୟରେ ଅନୁଷ୍ଠିତ ନିର୍ବାଚନରେ ଲୋକମାନେ ମତାଅଧିକାର ସାବ୍ୟସ୍ତ କରିଥାଆନ୍ତି। ଗୁଡିଖଳା ଗ୍ରାମଟି ପାତ୍ରପୁର ବ୍ଲକର ବୁରାତାଲ ପଂଚାୟତ ସହିତ ଗଜପତି ଜିଲ୍ଲା ରାୟଗଡ ବ୍ଲକ ଏବଂ ଆନ୍ଧ୍ର ମଞ୍ଜୁସା ମଣ୍ଡଳ ଅଧୀନରେ ରହିଛି। ଅନ୍ୟ ତିନୋଟି ଗ୍ରାମ ପାତ୍ରପୁର ବ୍ଲକ ତୁମ୍ବା ପଞ୍ଚାୟତ ସହିତ ଆନ୍ଧ୍ର ବୁଡାରସିଂ ପଞ୍ଚାୟତ ଅଧୀନରେ ରହିଛି। ଏଥି ମଧ୍ୟରୁ ବାବନା ସାହି ଆଦିବାସୀ ଗ୍ରାମକୁ ଓଡ଼ିଆ ସରକାରଙ୍କ ପକ୍ଷରୁ ସାମଗ୍ରୀକ ବିକାଶ ଉଦ୍ୟମଜାରି ରହିଥିବା ବେଳେ ରାସ୍ତାରେ ପଡୁଥିବା ନଦୀ ଉପରେ ବିଜୁସେତୁ ଯୋଜନାରେ ପୋଲ ନିର୍ମାଣ ହେବାପରେ ଆଦିବାସୀ ମାନେ ଆନ୍ଧ୍ରରୁ ମୁହଁ ଫେରାଇ କଡା ଜବାବ ଦେଇଥିବା ଦେଖିବାକୁ ମିଳିଛି। ତୁମ୍ବା ପଞ୍ଚାୟତର ବାବନା ସାହି ଗ୍ରାମଟି ପଞ୍ଚାୟତ ଠାରୁ ପ୍ରାୟ ଛଅ କିଲୋମିଟର ଜଙ୍ଗଲ ପାଦଦେଶରେ ରହିଛି। ଗ୍ରାମରେ ସତର ଆଦିବାସୀ ପରିବାର ବସବାସ କରୁଥିବା ବେଳେ ବିଭିନ୍ନ ସମୟରେ ଓଡ଼ିଶା ପଥରେ ଆସିବା ବେଳେ ରାସ୍ତାରେ ମହେନ୍ଦ୍ର ତନୟା ନଦୀ ସହିତ ଏକ ନାଳ ପାର ହେବାକୁ ପଡୁଥିଲା। ଫଳରେ ରୋଗୀ ଗର୍ଭବତୀଙ୍କୁ ଡାକ୍ତର ଖାନାକୁ ନେବା ଅସୁବିଧା ହେଉଥିଲା। ଗ୍ରାମର ବହୁ ପିଲା ଆନ୍ଧ୍ର ବିଦ୍ୟାଳୟରେ ପାଠପଢା ପଢ଼ୁଥିବା ବେଳେ ପଡିକାର୍ଡରେ ଜିନିଷ ଭତା ସଂଗ୍ରହ ପାଇଁ ଆନ୍ଧ୍ର ଯାଉଥିଲେ।

ଆନ୍ଧ୍ର ସହିତ ଓଡ଼ିଶା ନିର୍ବାଚନରେ ଲୋକମାନେ ନିଜ ମତାଧିକାର ସାବ୍ୟସ୍ତ କରୁ ଥିବା ବେଳେ ଆନ୍ଧ୍ର ପଂଚାୟତ ପାଇଁ ଗ୍ରାମର ଜଣେ ୱାର୍ଡ ସଭ୍ୟ ମଧ୍ୟ ନିର୍ବେଚିତ ହୋଇ ଥିଲେ। ତେବେ ଗତ କିଛି ବର୍ଷ ହେଲା ପ୍ରଶାସନ ପକ୍ଷରୁ ଗ୍ରାମରେ ନଳକୁଅ ସ୍ଥାପନ ସହିତ ବିଜୁଳୀ ଓ ଆବାସ ଯୋଜନାରେ ଘର ଭଳି ବହୁ ସୁବିଧା ଯୋଗାଇବା ଥିବା ବେଳେ ଜଙ୍ଗଲ ନାଳରେ କୂଅ କରି ସେହି ଠାରୁ ପାଇପ ସଂଯୋଗ କରି ଗ୍ରାମକୁ ପାଣି ଯୋଗାଯାଉଛି। ତେବେ ଆନ୍ଧ୍ର ପାର୍ଶ୍ୱରେ ଜଙ୍ଗଲ ରାସ୍ତା ପାର ହେବାକୁ ପଡୁଥିବା ବେଳେ ଓଡ଼ିଶାର ରାସ୍ତା ପାଇଁ ମାତ୍ର ଦୁଇ କିଲୋମିଟର ନଦୀ ପାର ହୋଇ ଯିବାକୁ ପଡୁଥିଲା। ଲୋକଙ୍କ ଏହି ଅବସ୍ଥା ଦେଖି ଗ୍ରାମକୁ ଯିବା ପଥରେ ପଡୁଥିବା ମହେନ୍ଦ୍ର ତନୟା ନଦୀ ଉପରେ ବିଜୁ ସେତୁ ଯୋଜନାରେ ଛଅ କୋଟି ଟଙ୍କା ବ୍ୟୟରେ ୧୦୦ମିଟର ଲମ୍ବା ୭.୫୦ମିଟର ଚଉଡାରେ ପୋଲ କାର୍ଯ୍ୟ ସମ୍ପୂର୍ଣ୍ଣ ହୋଇ ସଂଯୋଗ ପଥ ଉନ୍ନତି କାର୍ଯ୍ୟ ଚାଲିଛି।

ବିଭିନ୍ନ ଯୋଜନା କାର୍ଯ୍ୟକୁ ଦେଖି ଗ୍ରାମର ଲୋକମାନେ ଆନ୍ଧ୍ରକୁ ସମ୍ପୁର୍ଣ୍ଣ ନା କହି ବିଗତ ପଞ୍ଚାୟତ ନିର୍ବାଚନରେ ଓଡ଼ିଶା ଭାଗ ନେବା ସହିତ ଆନ୍ଧ୍ର ସହାୟତାକୁ ପ୍ରତ୍ୟାଖ୍ୟାନ କରିଥିବା ଗ୍ରାମର ପୂର୍ବତନ ୱାର୍ଡ ସଭ୍ୟ ରାମଚନ୍ଦ୍ର କାର୍ଜି ପ୍ରକାଶ କରିଛନ୍ତି। ଏପରିକି ଆନ୍ଧ୍ରରେ ପଢ଼ୁଥିବା ପିଲାଙ୍କ ସାର୍ଟିଫିକେଟ ଆଣି ଓଡ଼ିଶାର ବିଭିନ୍ନ ବିଦ୍ୟାଳୟରେ ନାମ ଲେଖାଇ ଥିବା ସେ କହିଛନ୍ତି। ଗ୍ରାମର ଉପେନ୍ଦ୍ର କାର୍ଜି, ଯଦୁମଣି ଶବର, ଗଣେଶ ଶବର ପ୍ରମୁଖ ବ୍ୟକ୍ତି କାମ କରିବାକୁ ଅନ୍ୟ ରାଜ୍ୟକୁ ଚାଲି ଯାଇଛନ୍ତି। ପାର୍ବତୀ ଶବରଙ୍କ ସହିତ କିଛି ବିଧବାଙ୍କୁ ଭତା ମିଳିପାରି ନାହିଁ। ଗ୍ରାମରେ ଏ ନରେଗା ଯୋଜନା କାମ ଯୋଗାଣ ସହିତ ମିନି ଅଙ୍ଗନବାଡି କେନ୍ଦ୍ର ସ୍ଥାପନ କରିବାକୁ ଗ୍ରାମବାସୀ ଦାବୀ କରିଛନ୍ତି। ଏହି ସେତୁ ନିର୍ମାଣ ପରେ ଅନ୍ୟ ଦୁଇଟି ଦୁର୍ଗମ ଘଞ୍ଚଜଙ୍ଗଲ ମଧ୍ୟରେ ଥିବା ଆଦିବାସୀ ଗ୍ରାମ ତବୁଡ଼ିଆ, ବାଲିଗାଁ ପ୍ରଭୁତି ଗ୍ରାମର ଲୋକମାନେ ଉପକୃତ ହୋଇପାରିବେ। ତେବେ ଓଡ଼ିଶା ପ୍ରଶାସନ ପକ୍ଷରୁ ସରକାରଙ୍କ ବିଭିନ୍ନ ଯୋଜନା ବାବନା ସାହି ଗ୍ରାମରେ ପହଞ୍ଚାଇବା ପରେ ସେତୁ ନିର୍ମାଣ କାର୍ଯ୍ୟ ଆରମ୍ଭ ପରେ ଲୋକଙ୍କ ଆନ୍ଧ୍ରକୁ ନା ଜବାବ ମିଳିଛି।

Comments are closed.