MEllora 950×100

ଆତ୍ମହତ୍ୟା କରିବାକୁ ଆସିଥିବା ମହିଳା ସେବାୟତଙ୍କ ଦ୍ୱାରା ଉଦ୍ଧାର

ବଡ଼ମ୍ବା: ଦଳାଚକଟା ଘଟଣା ଲୋକଙ୍କ ମନରୁ ଯାଇନଥିବା ବେଳେ ପୁଣି ବଡ଼ମ୍ବାର ପ୍ରସିଦ୍ଧ ସିଂହନାଥ ପୀଠ ଅସୁରକ୍ଷିତ ଥିବା ଚର୍ଚ୍ଚାକୁ ଆସିଛି। ବୁଧବାର ସଂଧ୍ୟାରେ ମନ୍ଦିର ପରିସରରେ ଥିବା ବଣପାହାଡ଼ରୁ ଆତ୍ମହତ୍ୟା କରିବାକୁ ଆସିଥିବା ଜଣେ ବିବାହିତ ମହିଳାଙ୍କୁ ମନ୍ଦିର ସେବାୟତ ଉଦ୍ଧାର କରି ପୁଲିସକୁ ହସ୍ତାନ୍ତର କରିଥିବା ଜଣାଯାଇଛି। ତେବେ ଉଦ୍ଧାର ପରେ ସଂପୃକ୍ତ ମହିଳାଙ୍କୁ ବାପଘର ଲୋକଙ୍କୁ ପୁଲିସ ଜିମାନାମାରେ ଦିଆଯାଇଥିବା ମନ୍ଦିର ସେବାୟତ ଭାଗିରଥି ରଣା ଗଣମାଧ୍ୟମକୁ ସୂଚନା ଦେଇଛନ୍ତି।

ଘଟଣାରୁ ପ୍ରକାଶ ବୁଧବାର ସଂଧ୍ୟାପରେ ମନ୍ଦିର ଶୂନଶାନ ଥିବାରୁ ଜଣେ ମହିଳା ନିକଟସ୍ଥ ରଘୁନାଥ ମନ୍ଦିର ପାହାଡ଼ ଉପରେ ବୁଲୁଥିବା ସେବାୟତମାନେ ଜାଣିବାକୁ ପାଇଥିଲେ। ମନ୍ଦିର ବେଢ଼ାରେ କର୍ତ୍ତବ୍ୟରତ ଜଣେ ସ୍ଥାନୀୟ ମହିଳା ଏନେଇ ସେବାୟତଙ୍କୁ ସୂଚନା ଦେବାସହ ଉକ୍ତ ମହିଳାଙ୍କୁ କୌଶଳ କ୍ରମେ ବୁଝାସୁଝା କରି ସେବାତଙ୍କ ନିକଟକୁ ଆଣିଥିଲେ। ପରେପରେ ସଂପୃକ୍ତ ମହିଳାଙ୍କୁ ସେବାୟତମାନେ ଠାକୁରଙ୍କ ପ୍ରସାଦ ଯାଚିବାରୁ ସେ କହିଥିଲେ, ମୁଁ ତ ମରିବାକୁ ଆସିଛି, ମୋର ପ୍ରସାଦ କଣ ହେବ। ଏହା ଜାଣିବା ପରେ ସେବାୟତମାନେ ସଙ୍ଗେସଙ୍ଗେ ବଡ଼ମ୍ବା ଥାନକୁ ଖବର କରିଥିଲେ। ପୁଲିସ ଘଟଣାସ୍ଥଳରେ ପହଞ୍ଚିଥିଲେ। ଖବରନେବାରେ ସଂପୃକ୍ତ ମହିଳା ବଡ଼ମ୍ବା ଥାନା ଅନ୍ତର୍ଗତ କଙ୍କଡ଼ାଯୋଡ଼ି ନିକଟସ୍ଥ ବିମ୍ବଳପାଟଣା ଗ୍ରାମର ବୋଲି ଜଣାପଡ଼ିଥିଲା। ସେ ଜଣେ ବିବାହିତ ଏବଂ ଉଚ୍ଚଶିକ୍ଷିତା ମହିଳା ବୋଲି ଜଣାପଡ଼ିଥିଲା। ତାଙ୍କର ଗୋଟେ ୮ବର୍ଷର ପୁଅ ଅଛି ଏବଂ ଅତୀତରେ ବଡ଼ମ୍ବାର ଏକ ଘରୋଇ କଲେଜରେ ସେ କାର୍ଯ୍ୟ କରୁଥିବା କହିଥିଲେ। ତେବେ ବିବାହ ପରେ ଶଶୁର ଘର ଲୋକେ ତାଙ୍କୁ ଅସହ୍ୟ ନିର୍ଯ୍ୟାତନା ଦେଉଥିବା ଏବଂ ସେ ଏଥିରେ ଅତିଷ୍ଟ ହୋଇ ଆତ୍ମହତ୍ୟା କରିବାକୁ ଏହି ପୀଠକୁ ଆସିଥିବା ପୁଲିସ ତଦନ୍ତ ବେଳେ ଜାଣିବାକୁ ପାଇଥିବା ସେବାୟତ ଶ୍ରୀ ଭାଗିରଥି ଗଣମାଧ୍ୟମକୁ ଦେଇଥିବା ସୂଚନାରୁ ପ୍ରକାଶ। ଖବରପାଇ ଉଦ୍ଧାର ପାଇଥିବା ମହିଳାଙ୍କ ବାପା, କକା ଏବଂ ଖୁଡ଼ି ଘଟଣାସ୍ଥଳରେ ପହଞ୍ଚିଥିଲେ। ସମସ୍ତ ପାରିପାର୍ଶ୍ବିକ ତଦନ୍ତ ପରେ ପୁଲିସ ସଂପୃକ୍ତ ମହିଳାଙ୍କୁ ପରିବାର ଲୋକଙ୍କୁ ହସ୍ତାନ୍ତର କରିଥିବା ମନ୍ଦିର ସେବାୟତଙ୍କଠୁ ପ୍ରକାଶ।

ସୂଚନାଥାଉକି ବିଳମ୍ବିତ ରାତ୍ରି ହୋଇଥିବାରୁ ଏହି ଘଟଣା ସମ୍ପର୍କରେ ଅଧିକ ଖବର ନେବାନେଇ ପୁଲିସ ସହିତ ଯୋଗାଯୋଗ ସମ୍ଭବ ହୋଇନାହିଁ ଏବଂ ଖବର ସ୍ପର୍ଶକାତର ତଥା ସମ୍ବେଦନଶୀଳ ଥିବାରୁ ଉଦ୍ଧାରପାଇଥିବା ମହିଳାଙ୍କ ପରିଚୟ ଗୋପନ ରଖାଯାଇଛି। ଅନ୍ୟପକ୍ଷରେ ଏହି ପୀଠକୁ ସେତୁ ସଂଯୋଗ ପରେ ବିଦ୍ୟୁତ୍‌‌ ସେବା ନଥିବାରୁ ସନ୍ଧ୍ୟାପରେ ଏହା ଅସୁରକ୍ଷିତ ରହୁଥିବା ନେଇ ସେବାୟତମାନେ ନାନା ଅସୁବିଧାର ସମ୍ମୁଖୀନ ହେଉଥିବା ଜଣାଇଛନ୍ତି। ରାଜ୍ୟ ସରକାର ତୁରନ୍ତ ଏ ଦିଗରେ ପ୍ରତିକାର ବ୍ୟବସ୍ଥା ଆପଣାଇବାକୁ ସେବାୟତ ତଥା ସ୍ଥାନୀୟ ବାସିନ୍ଦା ଦାବି କରିଛନ୍ତି।

Comments are closed.