ରାଜ୍ୟର ବିଭିନ୍ନ ଶିକ୍ଷାନୁଷ୍ଠାନରେ ନୂଆ ଓ ଯୁବ ଓଡିଶା, ନବୀନ ଓଡିଶା କାର୍ଯ୍ୟକ୍ରମ

କଣ୍ଟାବାଞ୍ଜି: ଆଜି ମହିଳା ସ୍ନାତକ ମହାବିଦ୍ୟାଳୟ କଣ୍ଟାବାଞ୍ଜି ପରିସରରେ ନୂଆ ଓ ଯୁବ ଓଡିଶା, ନବୀନ ଓଡିଶା ଅନ୍ତର୍ଗତ କ୍ରୀଡା ଓ ଖେଳ ପ୍ରତିଯୋଗିତାର ଶୁଭ ଉଦଘାଟନ ମହାବିଦ୍ୟାଳୟର ଅଧ୍ୟକ୍ଷ ରାଜେନ୍ଦ୍ର ପୁରୋହିତଙ୍କ ସଭାପତିତ୍ୱରେ ସମ୍ପନ୍ନ ହୋଇଯାଇଛି। ଏହି ଉଦଘାଟନ ଉତ୍ସବରେ କଣ୍ଟାବାଞ୍ଜି ବିଜ୍ଞାପିତ ଅଞ୍ଚଳ ପରିଷଦର ଉପ-ନଗରପାଳ ମନୋରମା ରାଉତ ମୁଖ୍ୟ ଅତିଥି ଭାବେ ଯୋଗଦାନ କରି କ୍ରୀଡା ଓ ଖେଳ ମହୋତ୍ସବକୁ ପତାକା ଉତ୍ତୋଳନ ଓ ଫିତା କାଟି ଉଦଘାଟନ କରିଥିଲେ। ମହାବିଦ୍ୟାଳୟର ଛାତ୍ରୀ ମାନେ ଶ୍ରୀରାମ ମନ୍ଦିରରୁ ମଶାଲ ଆଣି ମୁଖ୍ୟ ଅତିଥିଙ୍କୁ ପ୍ରଦାନ କରି ତାଙ୍କରି ହାତରେ ମଶାଲ ସ୍ଥାପନ କରିଥିଲେ। ଏହି ଅବସରରେ ମହାବିଦ୍ୟାଳୟର ପରିଚାଳନା କମିଟିର ସଭାପତି ବୃନ୍ଦାବନ ନାଗ ମହୋଦୟ ମଧ୍ୟ ସମ୍ମାନିତ ଅତିଥି ଭାବେ ଯୋଗଦାନ କରି କ୍ରୀଡା ଓ ଖେଳ ପ୍ରତିଯୋଗିତା ପାଇଁ ସମସ୍ତ ଛାତ୍ରୀମାନଙ୍କୁ ଶୁଭେଚ୍ଛା ଜଣାଇଥିଲେ। ମୁଖ୍ୟ ଅତିଥି ଏକ ସୁସ୍ଥ ମନ ସୁସ୍ଥ ଶରୀରରେ ଅବସାନ କରେ। ତେଣୁ ପାଠ ପାଇଁ ସୁସ୍ଥ ମନ ଦରକାର ଓ ସୁସ୍ଥ ମାନସିକ ଅବସ୍ଥା ପାଇଁ ସୁସ୍ଥ ସ୍ୱାସ୍ଥ୍ୟ ନିହାତି ଆବଶ୍ୟକ ଓ ଏହା ଖେଳ କୁଦ ମାଧ୍ୟମରେ ହିଁ ସମ୍ଭବ ବୋଲି ଛାତ୍ରୀମାନଙ୍କୁ ସମ୍ବୋଦିତ କରି ମୁଖ୍ୟ ଅତିଥି ମନୋରମା ରାଉତ କହିଥିଲେ।

ପ୍ରଥମ ଦିନରେ ସଟଫୁଟ, ଡ଼ିସକସ, ଜାଭେଲିନ, ଲମ୍ବ ଡିଆଁ, ଉଚ୍ଚ ଡିଆଁ, ବାଡ଼ମୀଣ୍ଟନ ଇତ୍ୟାଦି ଖେଳ ପ୍ରତିଯୋଗିତା ଆୟୋଜିତ ହୋଇଛି। ପ୍ରକାଶଥାଉକି ସାଂସ୍କୃତିକ, କ୍ରୀଡା ଓ ସାମାଜିକ କାର୍ୟ୍ୟକ୍ରମର ବିଭିନ୍ନ ପ୍ରତିଯୋଗିତାରେ ଉନ୍ନୀତ ହୋଇଥିବା ପ୍ରତିଯୋଗୀମାନଙ୍କୁ ଉଦଯାପନୀ ଦିବସରେ ମାନପତ୍ର ପ୍ରଦାନ କରାଯିବ।

ଲାଞ୍ଜିଗଡ଼: ଲାଞ୍ଜିଗଡ଼ ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟରେ ଦୁଇ ଦିନ ଧରି ଚାଲିଥିବା ବାର୍ଷିକ କ୍ରୀଡା ପ୍ରତିଯୋଗିତା ଉଦଯାପିତ ହୋଇଯାଇଛି। ପ୍ରଥମ ଦିନରେ ସ୍କୁଲର ଶତାଧିକ ଛାତ୍ରଛାତ୍ରୀ ଏକ ବିଶାଳ ଶୋଭାଯାତ୍ରାରେ ବାହାରି ଲାଞ୍ଜିଗଡ଼ ସ୍ଥିତ ଭୈରବ ପୀଠକୁ ଯାଇ ପୂଜାର୍ଚ୍ଚନା କରିବା ପରେ ଭୈରବ ପୀଠରୁ ମଶାଲ ନେଇ ନିଜ ସ୍କୁଲ ଖେଳ ପଡିଆକୁ ଫେରିଥିଲେ। ସ୍କୁଲର ପ୍ରଧାନ ଶିକ୍ଷକ ପାର୍ଥବ ତାଣ୍ଡିଙ୍କ ସଭାପତିତ୍ୱରେ ଅନୁଷ୍ଠିତ ଏହି ବାର୍ଷିକ କ୍ରୀଡ଼ା ଉତ୍ସବରେ ଲାଞ୍ଜିଗଡ଼ ସରପଞ୍ଚ ସରସ୍ୱତୀ ମୁଣ୍ଡା ମୁଖ୍ୟ ଅତିଥି ଭାବେ ଯୋଗ ଦେଇ କାର୍ୟ୍ୟକ୍ରମର ଶୁଭାରମ୍ଭ କରିଥିଲେ। ଏହି ପ୍ରତିଯୋଗିତାରେ ସ୍କୁଲର ୨୮୬ ଜଣ ଛାତ୍ରଛାତ୍ରୀ ଅଂଶଗ୍ରହଣ କରିଥିବା ବେଳେ ଏଥିରେ ଫୁଟବଲ, ଭଳିବଲ, କ୍ରିକେଟ, ଖୋକୋ, ଦୌଡ, ଉଚ୍ଚ ଡିଆଁ, ଲମ୍ବ ଡିଆଁ, ସଟଫୁଟ, ଡିସ କସ ଥ୍ରୋ, ଜାଭଲିନ ଥ୍ରୋ ଆଦି ୨୦ ଟି ବିଭିନ୍ନ ପ୍ରତିଯୋଗିତା ଅନୁଷ୍ଠିତ ହୋଇଥିଲା। କ୍ରୀଡା ପ୍ରତିଯୋଗିତାକୁ ସ୍କୁଲର ଖେଳ ଶିକ୍ଷକ ଜୟଲାଲ ଭୋଇ, ମମତା ମାଝୀ,ବିଭୁ ପ୍ରସାଦ ସାମନ୍ତରାୟ, ଦେବେନ୍ଦ୍ର ଧଙ୍ଗଡାମାଝୀ, ଆଲୋକ ସାହୁ, ଭବେଶ ପାଟଯୋଶୀ, ସୁଶାନ୍ତ ମାଝୀ, ମଧୁସୂଦନ ବାଗ, ଜଗମୋହନ ସାହୁ, ଶୀମାଞ୍ଚଳ କାଟ୍ରାକା, କେ.ଏସ୍ ଆଚାରି,ସୁମନ ସା ପ୍ରମୁଖ ପରିଚାଳନା କରିଥିଲେ।

ଗୁରୁଡ଼ିଝାଟିଆ: ଖୁଣ୍ଟୁଣୀସ୍ଥିତ ରାଧାନାଥ ରଥ ବିଜ୍ଞାନ ଉଚ୍ଚ ମାଧ୍ୟମିକ ବିଦ୍ୟାଳୟରେ ନୃତ୍ୟ ଓ ସଂଗୀତ ପ୍ରତିଯୋଗିତା ଅନୁଷ୍ଠିତ ହୋଇଛି। ସମନ୍ୱିତ ଯୁବ ପ୍ରତିଭା ଯୋଜନା ଆନୁକୂଲ୍ୟରେ ଅନୁଷ୍ଠିତ ଏହି ପ୍ରତିଯୋଗିତାରେ ଯୁବନେତା ନୃସିଂହ ଚରଣ ସାହୁ ମୁଖ୍ୟ ଅତିଥି ଭାବରେ ଯୋଗଦେଇ ଯୁବଶକ୍ତିଙ୍କ ସର୍ବାଙ୍ଗୀନ ବିକାଶ ଦେଶ ପାଇଁ ମଙ୍ଗଳଦାୟକ। ଏହି ଆଭିମୁଖ୍ୟକୁ ଚରିତାର୍ଥ କରିବା ପାଇଁ ସରକାର ନୂଆ ଓ ଯୁବଓଡ଼ିଶା ଓ ନବୀନ ଓଡ଼ିଶା ଯୋଜନା ପ୍ରଣୟନ କରିଛନ୍ତି। ଅନୁଷ୍ଠାନର ଅଧ୍ୟକ୍ଷ ରବି ନାରାୟଣ ଦାସଙ୍କ ଅଧ୍ୟକ୍ଷତାରେ ଆୟୋଜିତ କାର୍ଯ୍ୟକ୍ରମରେ ସାଂସ୍କୃତିକ ବିଭାଗ ସଂଯୋଜକ ଭାସ୍କର ଚନ୍ଦ୍ର ପଟ୍ଟନାୟକ, ଚକ୍ରଧର ସାହୁ, ରମାକାନ୍ତ ମାଝି, ବଟକୃଷ୍ଣ ବେହେରା ଓ ଆକାଶ ବେଜ ପ୍ରମୁଖ ସହଯୋଗ କରିଥିଲେ। କାର୍ଯ୍ୟକ୍ରମର ବିଚାରକ ଭାବେ ପ୍ରକାଶ ବାରିକ, ବିକାଶ କୁମାର ସାହୁ ଓ ରତ୍ନପ୍ରଭା ଯତି ଉପସ୍ଥିତ ରହିଥିଲେ।