MEllora 950×100

ଆସନ୍ତାକାଲି ରାଜ୍ୟସ୍ତରୀୟ ପରେଡ ଉତ୍ସବ, ତ୍ରିସ୍ତରୀୟ ସୁରକ୍ଷା ବଳୟରେ ଗାନ୍ଧୀମାର୍ଗ

ଭୁବନେଶ୍ବର: ସାଧାରଣତନ୍ତ୍ର ଦିବସ ଚଳିତ ବର୍ଷ କଟକଣାମୁକ୍ତ ଭାବେ ପାଳନ ହେବାକୁ ଯାଉଛି। ଏଥିପାଇଁ ମଙ୍ଗଳବାର ଗାନ୍ଧୀମାର୍ଗରେ ଫୁଲଡ୍ରେସ ଅଭ୍ୟାସ ପରେଡ ପୁଲିସ ମହାନିର୍ଦେଶକ (ଡିଜିପି) ସୁନିଲ ବଂଶଲଙ୍କ ଉପସ୍ଥିତିରେ ଶେଷ ହୋଇଛି। ୪୪ ଟ୍ରୁପ ଅଭ୍ୟାସ ପରେଡ କରିଥିଲେ। ପୁଲିସ, ସଶସ୍ତ୍ର ବାହିନୀ, କମାଣ୍ଡୋ, ଆନ୍ଧ୍ର ପୁଲିସର ଗୋଟିଏ ଟ୍ରୁପ, ସିଭିଲିଆନ ଅଂଶଗ୍ରହଣ କରିଥିଲେ। ମଟରସାଇକଲରେ ଡେୟାରଡେଭିଲ ଦୁଃସାହସିକ କଳା ପ୍ରଦର୍ଶନ ସମେତ ଓଡିଶା ସ୍କେଟିଂ ଏକାଡେମୀ ପକ୍ଷରୁ ସ୍କେଟିଂ ପରେଡ କରାଯାଇଥିଲା। ଏଥିରେ ରାଜ୍ୟର ଲୋକକଳା, ପାରମ୍ପରିକ ବାଦ୍ୟ, ବାଘନାଚ, ଭାଲୁ ନାଚ ପ୍ରଦର୍ଶନ ହେବ ବୋଲି ଜଣାପଡିଛି। ଏହାକୁ ଦୃଷ୍ଟିରେ ରଖି ଗାନ୍ଧୀମାର୍ଗ ତ୍ରିସ୍ତରୀୟ ସୁରକ୍ଷା ବଳୟରେ ରହିଛି। ପୁରା ରାଜ୍ୟ ହାଇଆଲର୍ଟରେ ରହିବ ବୋଲି ଡିଜିପି ଶ୍ରୀ ବଂଶଲ କହିଛନ୍ତି।

ସୁରକ୍ଷା ବ୍ୟବସ୍ଥାର ସମୀକ୍ଷା କରିବା ସହ ଶ୍ରୀ ବଂଶଲ କହିଛନ୍ତି ଯେ, କରୋନା କଟକଣା ଯୋଗୁ ଗତ ଦୁଇ ବର୍ଷ ଭଲ ଭାବେ ପରେଡ ହୋଇ ପାରି ନ ଥିଲା। ଚଳିତ ବର୍ଷ ବିନା କଟକଣାରେ ପରେଡ ହେବ। ପରେଡରେ ୧୯ଟି ୟୁନିଫର୍ମ ଦଳ ଭାଗନେବେ। କେସିଙ୍ଗା ଏସଡିପିଓ ୟସ ପ୍ରତାପ ଶ୍ରିମାଲ ପରେଡ କମାଣ୍ଡ ନେତୃତ୍ବ ନେବେ। ସେ ମଧ୍ୟରେ ଟ୍ରାଫିକ ପୁଲିସ, ୭ମ ଓ ୬ଷ୍ଠ ବାଟାଲିୟନ, ହୋମଗାର୍ଡ, ଓଡ୍ରାଫ, ଅଗ୍ନିଶମ ସହ ସ୍ୱତନ୍ତ୍ର ବାଟାଲିୟନ ଓ ଆନ୍ଧ୍ରପ୍ରଦେଶ ପୁଲିସର ଏକ ‌ଦଳ। ଏଥିସହ ନାଭାଲ ବ୍ୟାଣ୍ଡ ସହ ପୁଲିସ ବ୍ୟାଣ୍ଡ ମଧ୍ୟ ରହିବେ। ୨୫ଟି ବିଦ୍ୟାଳୟର ଛାତ୍ରଛାତ୍ରୀ ମଧ୍ୟ ଭାଗନେବେ। ସେହିପରି ପୁଲିସ ଆୟୁକ୍ତ ସୌମେନ୍ଦ୍ର ପ୍ରିୟଦର୍ଶୀ କହିଛନ୍ତି ଯେ, ଗୁଇନ୍ଦା ନଜରରେ ପରେଡ ଅଞ୍ଚଳ ରହିବ। ସିସିଟିଭି ବି ଜଗିବ। ବନ୍ଧୁକଧାରୀ ପୁଲିସ ତୟାର ରହିବେ। ଗାନ୍ଧୀମାର୍ଗ ସମେତ ଭୁବନେଶ୍ୱରରେ ୩୦ ପ୍ଲାଟୁନ ଫୋର୍ସ ମୁତୟନ ହେବେ। ୫ ଜଣ ଏସିପିଙ୍କ ସମେତ ୨୦୦ ଅଧିକାରୀ ନିୟୋଜିତ ରହିବେ। ବିମାନବନ୍ଦର ଠାରୁ ରେଳ ଷ୍ଟେସନ ଓ ବସଷ୍ଟାଣ୍ଡରେ ଗୁଇନ୍ଦାକର୍ମୀ ସଜାଗ ରହିବେ। ହୋଟେଲ ଓ ଲଜରେ ଏବେଠୁ ଯାଞ୍ଚ ପ୍ରକ୍ରିୟା ଜାରି ରହିଛି। ବ୍ଲକିଂ ଓ ଚେକିଂକୁ ଜୋରଦାର କରାଯାଇଛି। ଏଥିସହ ଗାନ୍ଧି ମାର୍ଗ ତଥା ସଂଲଗ୍ନ ରାସ୍ତାରେ ଗାଡି ମଟର ଯାତାୟାତ ଉପରେ କଟକଣା ରହିବ। ୭ଟି ସ୍ଥାନରେ ପାର୍କିଂ ବ୍ୟବସ୍ଥା କରାଯାଇଛି। ଟ୍ରାଫିକ କଟକଣା ନେଇ ବିଜ୍ଞପ୍ତି ଜାରି ହେବ। ଏଥିସହ ଡଗ୍‌ସ୍କ୍ବାଡ, ବମ୍‌ସ୍କ୍ବାଡ ଓ ଆମ୍ବୁଲାନ୍ସ ସମେତ ଫାୟାର ସର୍ଭିସ ମଧ୍ୟ ସଜାଗ ରହିବେ।

ଏହି ଉତ୍ସବରେ ମହର୍ଷି ଡେୟାରଡେଭିଲ ଦଳ ସହ ଓଡ଼ିଶା ସ୍କେଟିଂ ଓ ପାରମ୍ପରିକ ବାଦ୍ୟ ନୃତ୍ୟରେ ରାୟଗଡ଼ା, ଗଞ୍ଜାମ ଓ ବୌଦ୍ଧର ୪ଟି ଦଳ ନିଜ ନିଜର ପାରଦର୍ଶିତା ଦେଖାଇବେ। କୃଷି ବିଭାଗ ସମେତ ସ୍ବାସ୍ଥ୍ୟ, ଶିକ୍ଷା, ପଞ୍ଚାୟତିରାଜ, ବୟନ ତଥା ହସ୍ତତନ୍ତ, ପୂର୍ତ୍ତ ବିଭାଗ ଓ ପର୍ଯ୍ୟଟନ ବିଭାଗ ବିକାଶର ଚିତ୍ରକୁ ପ୍ରଜ୍ଞାପନ ମେଢ ଭାବେ ପ୍ରଦର୍ଶିତ କରିବେ। ଓଏମସିର ସାମାଜିକ ସଶକ୍ତୀକରଣର ପ୍ରଜ୍ଞାପନ ମେଢ଼ ମଧ୍ୟ ପ୍ରଦର୍ଶିତ ହେବ ବୋଲି ସୂଚନା ମିଳିଛି।

Comments are closed.