MEllora 950×100

ଗୋପବନ୍ଧୁ ମହିଳା ସ୍ନାତକ କଲେଜରେ ଏଡ୍‌‌ସ ସଚେତନତା

ଆଠଗଡ଼: ଆଠଗଡ଼ସ୍ଥିତ ଗୋପବନ୍ଧୁ ମହିଳା ସ୍ନାତକ କଲେଜର ଯୁବରେଡକ୍ରସ ଆନୁକୂଲ୍ୟରେ ଏଡ୍‌‌ସ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଯୁବ ରେଡକ୍ରସ ପରାମର୍ଶଦାତ୍ରୀ ଅଧ୍ୟାପିକା ଟ୍ୱିଙ୍କିଲ ମିଶ୍ରଙ୍କ ସଂଯୋଜନାରେ ଆୟୋଜିତ ବିଭିନ୍ନ ସଚେତନତା ଭିତ୍ତିକ କାର୍ଯ୍ୟକ୍ରମରେ ଯୁବ ରେଡକ୍ରସ ଓ ଏନଏସଏସର ସ୍ୱେଚ୍ଛାସେବୀ ଯୋଗଦାନ କରି ଏଡସ ସଚେତନତା ବାର୍ତ୍ତା ପ୍ରଚାର କରିଥିଲେ। ଏହି ଉପଲକ୍ଷେ ଆୟୋଜିତ ଏକ ସଚେତନତା ଶୋଭାଯାତ୍ରାକୁ କଲେଜର ଅଧ୍ୟକ୍ଷା ସଂଗୀତା ମହାପାତ୍ର ରେଡକ୍ରସ ପତାକା ଦେଖାଇ ଉଦ୍‌‌ଘାଟନ କରିଥିଲେ। ଯୁବ ରେଡକ୍ରସ ସ୍ୱେଚ୍ଛାସେବୀ ଛାତ୍ରୀମାନେ ନିଜେ ରେଡ ରିବନ ପରିଧାନ କରିବା ସହ ସମସ୍ତ ଅଧ୍ୟାପିକା, କର୍ମଚାରୀ ଏବଂ ସାଧାରଣ ଲୋକଙ୍କୁ ରେଡ ରିବନ ବାନ୍ଧି ଏଡସ୍‌‌ ରୋଗର ଭୟାବହତା ସଂପର୍କରେ ବୁଝାଇବା ସହ ସତର୍କତା ଅବଲମ୍ବନ କରିବା ପାଇଁ ପରାମର୍ଶ ଦେଇଥିଲେ।

ଶୋଭାଯାତ୍ରା ସହର ପରିକ୍ରମା କରି ଫେରିବା ପରେ କଲେଜର ଅଧ୍ୟକ୍ଷା ଶ୍ରୀମତୀ ମହାପାତ୍ରଙ୍କ ପୌରୋହିତ୍ୟରେ ଅନୁଷ୍ଠିତ ସଚେତନତା ସଭାରେ ଆଠଗଡ଼ ଡାକ୍ତରଖାନାର ଏଚଆଇଭି ଓ ଏଡସ୍‌‌ ପରାମର୍ଶ କେନ୍ଦ୍ରର ପରାମର୍ଶଦାତ୍ରୀ ଗୀତାଞ୍ଜଳି ନାୟକ ମୁଖ୍ୟବକ୍ତା ଭାବେ ଯୋଗଦେଇ ଏଚଆଇଭି ଓ ଏଡସରୋଗର ଭୟାବହତା, ଏହାର କାରଣ, ଲକ୍ଷଣ, ନିରାକରଣ ଓ ଚିକିତ୍ସା ସଂପର୍କରେ ବିସ୍ତୃତଭାବେ ଆଲୋକପାତ କରିବା ସହ ଏହି ରୋଗରୁ କିପରି ରକ୍ଷା ମିଳିବ ସେଥିପାଇଁ କଣ ସବୁ ସତର୍କତା ଅବଲମ୍ବନ କରାଯାଇପାରିବ ସେ ସଂପର୍କରେ ବୁଝାଇଥିଲେ। ଏଥି ସହିତ ସରକାରଙ୍କର ଏହି ମାରତ୍ମକ ରୋଗରେ ପୀଡିତଙ୍କ ପାଇଁ ଚିକିତ୍ସା ବ୍ୟବସ୍ଥା ଓ ବିଭିନ୍ନ ଯୋଜନା ବିଷୟରେ ଅବତାରଣା କରିଥିଲେ। ଏଡସ୍‌‌ ଦିବସ ଉପଲକ୍ଷେ ଆୟୋଜିତ ବିଭିନ୍ନ ପ୍ରତିଯୋଗିତାର କୃତି ପ୍ରତିଯୋଗୀଙ୍କୁ ଏହି ଅବସରରେ ପୁରସ୍କୃତ କରାଯାଇଥିଲା। ଏହି କାର୍ଯ୍ୟକ୍ରମ ପରିଚାଳନାରେ କଲେଜର ସମସ୍ତ ଅଧ୍ୟାପିକା ଓ କର୍ମଚାରୀ ସହଯୋଗ କରିଥିବାବେଳେ ଶେଷରେ ବରିଷ୍ଠ ଅଧ୍ୟାପିକା ବବିତା ସାହୁ ଧନ୍ୟବାଦ ଅର୍ପଣ କରିଥିଲେ।

Comments are closed.