MEllora 950×100

‘ସମାଜ’ ପ୍ରଭାବ: ଶହେ ବର୍ଷ ପରେ ଗାଁରେ ପହଞ୍ଚିଲେ ବିଡ଼ିଓ

ଲାଞ୍ଜିଗଡ଼: କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଳକ ମେରାଙ୍ଗପଦର ଗାଁ ବସିବା ଇତିମଧ୍ୟରେ ଶହେବର୍ଷ ଟପି ସାରିଲାଣି। ତଥାପି ଆଜିଯାଏ ଗାଁରେ ବିଭିନ୍ନ ଯୋଜନା ବାଟବଣା ହୋଇ ରହିଛି। ଏ ସମ୍ପର୍କରେ ବୁଧବାର ‘ସମାଜ’ରେ ପ୍ରକାଶ ପାଇବା ପରେ ପ୍ରଶାସନ ପକ୍ଷରୁ ଲାଞ୍ଜିଗଡ଼ ବିଡ଼ିଓ ଜିତେନ୍ଦ୍ର କୁମାର ମିଶ୍ର ଗାଁରେ ପହଞ୍ଚି ଗାଁ ଲୋକଙ୍କ ସହିତ ବିଭିନ୍ନ ସମସ୍ୟା ନେଇ ଆଲୋଚନା କରିବା ସହ ଗାଁ ବିକାଶରେ ତୁରନ୍ତ ପଦକ୍ଷେପ ନିଆଯିବ ବୋଲି କହିଛନ୍ତି। ଶହେ ବର୍ଷ ପରେ ପ୍ରଥମ ବିଡ଼ିଓ ଭାବେ ଗାଁରେ ପହଞ୍ଚିଥିବା ଯୋଗୁଁ ଗାଁ ଲୋକଙ୍କ ମୁହଁରେ ହସ ଫୁଟିଛି। ଏପଟେ ଗାଁରେ ଆଜି ନଳକୂପ ଗାଡି ପହଞ୍ଚି ଖୋଳା ଚାଲିଥିବା ଗାଁ ଲୋକେ ପ୍ରକାଶ କରିଛନ୍ତି।

ପ୍ରକାଶ ଯେ ଲାଞ୍ଜିଗଡ ବ୍ଲକ କୁମଖାଲ ପଞ୍ଚାୟତ କୁଟିଆ କନ୍ଧଙ୍କ ମେରାଙ୍ଗପଦର। ‘ସମାଜ’ ତଥ୍ୟ ସଂଗ୍ରହ କରିବା ପରେ ଗାଁର ବିଭିନ୍ନ ସମସ୍ୟା ସମ୍ପର୍କରେ ସାମ୍ନାକୁ ଆସିଥିଲା। ଗାଁରେ ରହୁଛନ୍ତି ୩୦ଟି କୁଟିଆ କନ୍ଧ ପରିବାର। କୁମଖାଲ ପଞ୍ଚାୟତ ମୁଖ୍ୟାଳୟ ଠାରୁ ୮ କିମି ଦୂରରେ ରହିଛି ଏହି ଗାଁ। ଗାଁ ଲୋକଙ୍କ ସହିତ ଆଲୋଚନା କରିବା ପରେ ଜଣା ପଡିଥିଲା ଯେ ସରକାରଙ୍କ ସବୁ ଯୋଜନା ଏଠି ବାଟବଣା। ଏଠାକାର ମୁଖ୍ୟ ସମସ୍ୟା ଗମନାଗମନ। ରାସ୍ତା ନଥିବାରୁ ଗ୍ରାମବାସି ନାନା ଅସୁବିଧା ଭୋଗିଥାନ୍ତି।ଗର୍ଭବତୀଙ୍କୁ ବା ଗୁରୁତର ରୋଗୀଙ୍କୁ ଖଟିଆରେ ୨ କିମି ବୋହିକି ମୁଖ୍ୟ ରାସ୍ତା ନେବାକୁ ପଡିଥାଏ।ବହୁ କଷ୍ଟରେ ଗ୍ରାମର ୭ ଜଣ ଆବାସ ଯୋଜନାରେ ଘର ନିର୍ମାଣ କରିଛନ୍ତି। ଘଞ୍ଚ ଜଙ୍ଗଲ ଯୋଗୁଁ ରାସ୍ତା ନଥିବାରୁ ଗାଁ ପିଲା ପାଠ ପଢ଼ାରୁ ବଞ୍ଚିତ ହୋଇ ଗାଈ ଚରାଉ ଥିବା ଦେଖିବାକୁ ମିଳିଥିଲା।

ଗାଁର ଅନ୍ୟତମ ସମସ୍ୟା ହେଇଥିଲା ପିଇବା ପାଣି। ଗାଁରେ ଦୁଇ ଗୋଟି ନଳକୁଅ ରହିଥିବା ବେଳେ ଠିକ ଭାବରେ ପାଣି ବାହାରୁନଥିଲା। ଫଳରେ ଗାଁ ନିକଟସ୍ଥ ଚାଷ ଜମି କଡରେ ଏକ ଚୁଆଁ କରି ସେହି ଖୁଲା ଆକାଶରେ ଥିବା ପାଣି ଉପରେ ଗାଁ ଲୋକେ ଭରସା କରୁଥିଲେ। ରାସ୍ତା ନଥିବା କାରଣରୁ ସରକାରୀ କର୍ମଚାରୀ ମାନେ ଉକ୍ତ ଅଞ୍ଚଳର ଦୁଃଖସୁଖ ବୁଝିବା ପାଇଁ ଗାଁକୁ ଯିବାକୁ ଇଛା ପ୍ରକାଶ କରୁନଥିଲେ। ଦୁଃଖର ବିଷୟ ଯେ ଗାଁ ବସତିର ୧୦୦ ବର୍ଷରୁ ଉର୍ଦ୍ଧ୍ବ ସମୟ ବିତି ଯାଇଥିଲେ ମଧ୍ୟ ଏକ ମାତ୍ର ଗାଁର କଲେଜ ପାଠୁଆ ପିଲା ଫକୀର ମାଝୀ ରହିଛନ୍ତି। ହେଲେ ଗାଁ ସମସ୍ୟାକୁ ନେଇ ବାରମ୍ବାର ଅଭିଯୋଗ ପରେ ମଧ୍ୟ କୌଣସି ଅଧିକାରୀ ସେମାନଙ୍କ ଦୁଃଖ ବୁଝୁନଥିବା ଗ୍ରାମବାସୀ ପ୍ରକାଶ କରିଥିଲେ। ଏହାପରେ ଲାଞ୍ଜିଗଡ଼ ବିଡ଼ିଓ ଜିତେନ୍ଦ୍ର କୁମାର ମିଶ୍ର ଆଜି ଗାଁକୁ ଗସ୍ତ କରିବା ପରେ ବର୍ତ୍ତମାନ କିଛି ପରିବର୍ତ୍ତନ ହେବ ବୋଲି ଗ୍ରାମବାସୀ ଆଶା କରିଛନ୍ତି। ମେରାଙ୍ଗପଦର ଗ୍ରାମବାସୀ ଫକୀର ମାଝୀ, ପିଣ୍ଟୁ ମାଝୀ, ଅରଖିତ ମାଝୀ, ରୁଙ୍କୁ ମାଝୀ, ଦାସେ ମାଝୀ, ଲଚନ ମାଝୀ, ତୁଳସୀରାମ ମାଝୀ, ଘୁରୁନା ମାଝୀ ସମେତ ମହିଳା କହ୍ନେଇ ମାଝୀ, ସୀତା ମାଝୀ, ଦୂତା ବେଭା ‘ସମାଜ’ ପ୍ରତିନିଧିଙ୍କ ସମ୍ମୁଖରେ ପ୍ରକାଶ କରିଛନ୍ତି।

Comments are closed.