କବି ଡ.ମନୋରମା ମହାପାତ୍ରଙ୍କ ବିୟୋଗରେ ଶୋକସଭା

ବଡ଼ମ୍ବା: ବିଶିଷ୍ଟ ସାହିତ୍ୟିକା, ଶିକ୍ଷାବିତ୍‍, ସମାଜସେବୀ ତଥା ଦୈନିକ ଖବରକାଗଜ ସମାଜ’ର ପୂର୍ବତନ ସମ୍ପାଦିକା କବି ଡ.ମନୋରମା ମହାପାତ୍ରଙ୍କ ବିୟୋଗରେ ବଡ଼ମ୍ବାରେ ଏକ ଶୋକସଭା ଅନୁଷ୍ଠିତ ହୋଇଯାଇଛି। ଶିବଶକ୍ତି ଅନୁଷ୍ଠାନ ଆନୁକୂଲ୍ୟରେ ସ୍ଥାନୀୟ ହାଟବଜାର ନିକଟସ୍ଥ ନୀଳକଣ୍ଠେଶ୍ୱର ମନ୍ଦିର ପରିସରରେ ଶନିବାର ଅନୁଷ୍ଠିତ ଏହି ଶୋକସଭାରେ ବଡ଼ମ୍ବାର ବିଭିନ୍ନ ବର୍ଗର ବ୍ୟକ୍ତି ବିଶେଷ ଯୋଗଦେଇ ଦିବଂଗତ ସାରସ୍ୱତ ସାଧିକା ସ୍ୱର୍ଗତା ମହାପାତ୍ରଙ୍କୁ ଗଭୀର ଶ୍ରଦ୍ଧାଞ୍ଜଳି ଜଣାଇବାସହ ଶୋକସନ୍ତପ୍ତ ପରିବାରକୁ ସମବେଦନା ଜ୍ଞାମ୍ପନ କରିଥିଲେ। ଅନୁଷ୍ଠାନର ଆବାହକ ଶିବନାରାୟଣ ମିଶ୍ରଙ୍କ ସଂଯୋଜନାରେ ଅନୁଷ୍ଠିତ ଉକ୍ତ ଶୋକ ସଭାରେ ସ୍ଥାନୀୟ ପ୍ରାଣଯୋଗ ପ୍ରତିଷ୍ଠାନର ଅଧ୍ୟକ୍ଷ ଶିକ୍ଷାବିତ୍‍ ଚନ୍ଦ୍ରଶେଖର ମହାନ୍ତି, ବରିଷ୍ଠ ରାଜନୀତିଜ୍ଞ ବୁଦ୍ଧିନାଥ ମହାନ୍ତି, ଅଧ୍ୟାପକ ଖଗେଶ୍ୱର ମହାପାତ୍ର, ସେବାନିବୃତ ଶିକ୍ଷକ ଭରତନାରାୟଣ ସାହୁ, ବୈକୁଣ୍ଠ ସାହିତ୍ୟ ସଂସଦର ସଂଯୋଜକ ଗିରିଜା ପ୍ରସାଦ ମିଶ୍ର, ମହିମା କବି ଭକ୍ତଚରଣ ବେହେରା ପ୍ରମୁଖ ଅତିଥି ଭାବେ ଯୋଗ ଦେଇ ସ୍ୱର୍ଗତା ମହାପାତ୍ରଙ୍କ ଅଧ୍ୟାପନା, ସାହିତ୍ୟ ଓ ସଂସ୍କୃତି ଉପାସନା, ସାମ୍ବାଦିକତା ତଥା ସମାଜସେବା କ୍ଷେତ୍ରରେ ଦଶନ୍ଧି ଦଶନ୍ଧି ଧରି ଛାଡ଼ି ଯାଇଥିବା ସ୍ମୃତିବହୁଳ ସନ୍ତକର ସ୍ମୃତିଚାରଣ କରିଥିଲେ। ଓଡ଼ିଆ ଜନମାନସରେ ଡ.ମନୋରମା ଚିରସ୍ମରଣୀୟ ହୋଇ ରହିବେ ବୋଲି ଏହି ଅବସରରେ ବକ୍ତାମାନେ ମତପୋଷଣ କରିଥିଲେ।

Comments
Loading...