ପଥର ଫିଙ୍ଗାଳିଙ୍କୁ ମିଳିବନି ସରକାରୀ ଚାକିରି, ପାସପୋର୍ଟ

ଶ୍ରୀନଗର: ସୁରକ୍ଷା କର୍ମୀଙ୍କ ଉପରକୁ ପଥର ଫିଙ୍ଗିବା କିମ୍ବା ଏପରି କୌଣସି ହିଂସାରେ ଜଡିତ ଥିବା ବ୍ୟକ୍ତିଙ୍କୁ ସରକାରୀ ଚାକିରି କିମ୍ବା ବିଦେଶ ଯାତ୍ରା ଲାଗି ପାସପୋର୍ଟ ମିଳିବ ନାହିଁ। ଜାମ୍ମୁ-କାଶ୍ମୀର ହିଂସାର ପ୍ରମୁଖ ଅଂଶ ପଥର ଫିଙ୍ଗିବା। ପୂର୍ବରୁ ଏହି ହିଂସାରେ ସ୍ଥାନୀୟ ଯୁବକମାନେ ବହୁ ସଂଖ୍ୟାରେ ସାମିଲ ହୋଇ ଆତଙ୍କବାଦୀ ସଂଗଠନଗୁଡିକ ଲାଗି କାର୍ଯ୍ୟ କରୁଥିଲେ। ଏବେ ଜାମ୍ମୁ-କାଶ୍ମୀରରେ ଶାନ୍ତି ଫେରିଥିବାବେଳେ ସରକାରୀ ଚାକିରି ଲାଗି ଏହି ହିଂସାକାରୀଙ୍କୁ ସୁଯୋଗ ମିଳିବ ନାହିଁ। ସରକାରୀ ଚାକିରି ଲାଗି ପୁଲିସର ଅନୁମୋଦନ ଜରୁରୀ ଥିବାବେଳେ ଏପରି ହିଂସାକାରୀଙ୍କୁ ଅନୁମୋଦନ ନ ଦେବାକୁ ଜାମ୍ମୁ-କାଶ୍ମୀର ପୁଲିସର ସିଆଇଡି ନିଷ୍ପତ୍ତି ନେଇଛି।

ସିଆଇଡି ଏହାର ନିଷ୍ପତ୍ତି ସମ୍ପର୍କରେ ସମସ୍ତ ଥାନାକୁ ଅବଗତ କରାଇଛି। ସେହିପରି ବିଦେଶ ଯାତ୍ରା ଲାଗି ପୁଲିସର ସୁରକ୍ଷା ଅନୁମୋଦନ ଜରୁରୀ ଥିବାବେଳେ ଏହି ବର୍ଗର ଯୁବକଙ୍କୁ ଅନୁମତି ନ ଦେବାକୁ ନିଷ୍ପତ୍ତି ହୋଇଛି। ପଥର ଫିଙ୍ଗିବା ସମୟର ଦୃଶ୍ୟ-ଶ୍ରାବ୍ୟ ରେକର୍ଡ, ଫଟୋ, ସିସିଟିଭି ଫୁଟେଜ୍ ଆଧାରରେ ହିଂସାକାରୀଙ୍କୁ ଚିହ୍ନଟ କରାଯାଇ ସେମାନଙ୍କ ରେକର୍ଡ ପ୍ରତ୍ୟେକ ଥାନାକୁ ଦିଆଯାଇଛି।

Comments
Loading...