ଗ୍ରାମାଞ୍ଚଳ ବିକାଶରେ ଗ୍ରାମ୍ୟ ଉନ୍ନୟନ ବିଭାଗ ଯନ୍ତ୍ରୀମାନେ ସାମିଲ ହେବା ଜରୁରୀ

ଭୁବନେଶ୍ୱର : ଗ୍ରାମାଞ୍ଚଳର ବିକାଶ କ୍ଷେତ୍ରରେ ଗ୍ରାମ୍ୟ ଉନ୍ନୟନ ବିଭାଗରେ କାର୍ୟ୍ୟ କରୁଥିବା ଯନ୍ତ୍ରୀଙ୍କ ଭୂମିକା ଗୁରୁତ୍ବପୂର୍ଣ୍ଣ। ବିଭାଗରେ ଅବସ୍ଥାପିତ ଯନ୍ତ୍ରୀମାନେ ଗ୍ରାମାଞ୍ଚଳରେ ଗୁଣାତ୍ମକ ମାନର କାର୍ୟ୍ୟ କରିବା ଏବଂ ବିକାଶ କାର୍ୟ୍ୟରେ ସାମିଲ ହେବା ଆବଶ୍ୟକ। ଗ୍ରାମ୍ୟ ଉନ୍ନୟନ ବିଭାଗ ଉପରେ ଗଠିତ ସ୍ଥାୟୀ କମିଟି ବୈଠକରେ ବିଭାଗର ଯନ୍ତ୍ରୀମାନଙ୍କୁ ବିଧାୟକ ତଥା କମିଟି ସଦସ୍ୟ ପ୍ରୀତିରଞ୍ଜନ ଘଡ଼ାଇ ଏହି ପରାମର୍ଶ ଦେଇଛନ୍ତି । ବିଧାୟକ ଦେବୀ ପ୍ରସାଦ ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା, ବିଜୁ ସେତୁ, ମୁଖ୍ୟମନ୍ତ୍ରୀ ସଡ଼କ ଯୋଜନା ଏବଂ ସରକାରୀ ସାହାଯ୍ୟପ୍ରାପ୍ତ ହାଇସ୍କୁଲଗୁଡ଼ିକର ମରାମତି ଓ ରକ୍ଷଣାବେକ୍ଷଣ କାର୍ୟ୍ୟ ଉପରେ ବିସ୍ତୃତ ଆଲୋଚନା ହୋଇଥିଲା। ଆଲୋଚନା ବେଳେ ବିଧାୟକ ଶ୍ରୀ ଘଡ଼ାଇ କହିଥିଲେ, ଗ୍ରାମ୍ୟ ଉନ୍ନୟନ ବିଭାଗ ଗ୍ରାମାଞ୍ଚଳରେ ସଡ଼କ ଯୋଗାଯୋଗ ବ୍ୟବସ୍ଥା ଦାୟିତ୍ବରେ ଅଛି। ଗ୍ରାମାଞ୍ଚଳକୁ ଗୁରୁତ୍ବ ଦେଇ ସେସବୁ କାର୍ୟ୍ୟ ଦକ୍ଷତାର ସହ କରାଯିବା ଆବଶ୍ୟକ। ବୈଠକରେ ବିଧାୟକ ଅଶୋକ କୁମାର ବଳ, ସନ୍ତୋଷ ସିଂହ ସାଲୁଜା, ସାଲୁଗା ପ୍ରଧାନ, ସୁକାନ୍ତକୁମାର ନାୟକ ଏବଂ ଗ୍ରାମ୍ୟ ଉନ୍ନୟନ ବିଭାଗର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।

Comments
Loading...