MEllora 950×100

ମୁଦ୍ରାସ୍ଫୀତି ହ୍ରାସ ପାଇବ: ଅର୍ଥମନ୍ତ୍ରୀ

ନୂଆଦିଲ୍ଲୀ: ରାଜ୍ୟ ତଥା ଦେଶରେ ସମସ୍ତ ଜିନିଷର ଦରଦାମ ବଢି ଚାଲିଛି। ଫଳରେ ସାଧାରଣ ଜନତା ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଖାସ କରି ଖାଇବା ତେଲ, ପନିପରିବା ଏବଂ ପେଟ୍ରୋଲ, ଡିଜେଲର ଦର ବୃଦ୍ଧି ଖାଉଟିଙ୍କୁ ଚିନ୍ତାରେ ପକାଇଛି। ଖରିଫ ଫସଲ ଆସିବା ସହିତ ଆସନ୍ତା କିଛି ମାସ ମଧ୍ୟରେ ମୁଦ୍ରାସ୍ପୀତି ହ୍ରାସ ପାଇବ ବୋଲି ଆଶା କରାଯାଉଛି। ଏଥିସହିତ ବ୍ୟବସାୟରେ ମଧ୍ୟ ଉନ୍ନତି ହେବାର ସମ୍ଭାବନା ରହିଛି ବୋଲି ମାସିକ ଅର୍ଥନୈତିକ ରିପୋର୍ଟରେ ଅର୍ଥମନ୍ତ୍ରୀ ନିର୍ମଲା ସୀତାରମଣ ପ୍ରକାଶ କରିଛନ୍ତି। ଅର୍ଥମନ୍ତ୍ରୀଙ୍କ ସୂଚନା ଅନୁଯାୟୀ,ଅକ୍ଟୋବର ମାସରେ ଖୁଚୁରା ମୁଦ୍ରାସ୍ଫୀତି ହାର ୬.୭୭ ପ୍ରତିଶତକୁ ଖସି ଆସିଛି।

ଯାହାକି ସେପ୍ଟେମ୍ବର ତୁଳନାରେ କମ୍। ଚଳିତ ଆର୍ଥିକ ବର୍ଷର ଚତୁର୍ଥ ତ୍ରୟମାସିକ ଖୁଚୁରା ମୁଦ୍ରାସ୍ଫୀତି ହାର ୬ ପ୍ରତିଶତ ତଳକୁ ଖସିବ ବୋଲି ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ପକ୍ଷରୁ ଆଶା କରାଯାଉଥିଲା। ତେବେ ସେପ୍ଟେମ୍ବର ତୁଳନାରେ ଅକ୍ଟୋବରରେ ମୁଦ୍ରାସ୍ଫୀତି ହାର କମ୍ ରହିଛି । ଏହି ହ୍ରାସ ଆଗକୁ ଆହୁରି ବଢିବାର ସମ୍ଭାବନା ମଧ୍ୟ ରହିଛି। ଅନ୍ତର୍ଜାତୀୟ ଦ୍ରବ୍ୟର ମୂଲ୍ୟରେ ହ୍ରାସ ଏବଂ ବଜାରରେ ଖରିଫ ଫସଲ ଆସିବା କାରଣରୁ ମୁଦ୍ରାସ୍ଫୀତି ହ୍ରାସ ପାଇପାରେ। ଅର୍ଥ ମନ୍ତ୍ରଣାଳୟ କହିଛି; ବିଶ୍ୱ ଅର୍ଥନୀତିର ହ୍ରାସ ରପ୍ତାନି ଉପରେ ପ୍ରଭାବ ପକାଇବ। ଅକ୍ଟୋବରରେ ବାଣିଜ୍ୟ ନିଅଣ୍ଟ ବୃଦ୍ଧି ପାଇ ୨୬.୯୧ ବିଲିୟନ ଡଲାରରେ ପହଞ୍ଚିଛି ।

ସେପ୍ଟେମ୍ବରରେ ୨୫.୭୧ ବିଲିୟନ ଡ଼ଲାର ଥିଲା। ଆସନ୍ତା ବର୍ଷରେ ଭାରତରେ ଭଲ ଅଭିବୃଦ୍ଧି ଆଶା କରାଯାଉଛି। ଏହା ବ୍ୟତୀତ ଚାକିରିରେ ବୃଦ୍ଧି ହେବାର ଆଶା ମଧ୍ୟ ଅଛି । କରୋନା ମହାମାରୀ ମଧ୍ୟରେ ପ୍ରତିବନ୍ଧକ ହଟାଇବା ହେତୁ ଖୁଚୁରା ବିକ୍ରିରେ ବହୁ ଅଭିବୃଦ୍ଧି ରେକର୍ଡ କରାଯାଉଛି ା ଆଗାମୀ ଦିନରେ ଏହି କ୍ଷେତ୍ରରେ ନିଯୁକ୍ତି ସୁଯୋଗ ସୃଷ୍ଟି ହେବ ବୋଲି ଅର୍ଥମନ୍ତ୍ରଣାଳୟ ସୂଚନା ଦେଇଛି।

Comments are closed.