ନୂତନ କୋଠାରେ ନବରଙ୍ଗପୁର ଜିଲା ଓ ଦୌରା ଅଦାଲତ କାର୍ଯ୍ୟାରମ୍ଭ

ନବରଙ୍ଗପୁର: ଗତ ଏପ୍ରିଲ ୧୭ ତାରିଖରେ ଓଡିଶା ହାଇକୋର୍ଟର ମୁଖ୍ୟବିଚାରପତି ଡଃ.ଏସ୍‍.ମୂରଲୀଧର ଉଦ୍‍ଘାଟନ କରିଥିବା ବହୁପ୍ରତୀକ୍ଷିତ ତିନିମହଲ ବିଶିଷ୍ଟ ନୂତନ କୋଠାରେ କାର୍ଯ୍ୟାରମ୍ଭ ହେଲା ନବରଙ୍ଗପୁରର ଜିଲା ଓ ଦୈାରା ଅଦାଲତ ସମେତ ୧୧ଟି ଅଦାଲତ। ସୋମବାରଦିନ ଆନୁଷ୍ଠାନିକଭାବେ ଜିଲା ଓ ଦୌରା ବିଚାରପତି ଅଶୋକ କୁମାର ପଣ୍ଡା ପୂଜାର୍ଚ୍ଚନା କରି ନୂତନ କୋଠାରେ ପ୍ରଥମେ ପ୍ରବେଶ କରିଥିଲେ। ପରିବାର ଅଦାଲତ ବିଚାରପତି ରାଜେନ୍ଦ୍ର କୁମାର ତୋଷ୍‍, ରେଜିଷ୍ଟ୍ରର ଅପର୍ଣ୍ଣା ମହାପାତ୍ର, ଜିଲା ଆଇନସେବା ପ୍ରାଧିକରର ସମ୍ପାଦକ ପ୍ରସନ୍ନ କୁମାର ବେହେରା, ଏସଡିଜେଏମ, ଜେଏମଏଫସି, ଜିଲା ପ୍ରଶାସନ ପକ୍ଷରୁ ଜିଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ରମାକାନ୍ତ ନାୟକ, ଜିଲା ଆଇନଜୀବୀ ସଂଘ ସଭାବତି ଆଶିଷ ରଞନ ପଟ୍ଟନାୟକ ଓ ସମ୍ପାଦକ ରାମପ୍ରସାଦ ପାତ୍ର ସମେତ ସଂଘର କର୍ମକର୍ତ୍ତା ଓ ବହୁ ଆଇନଜୀବୀ ପ୍ରମୂଖ ଉପସ୍ଥିତ ଥିଲେ। ଅଦାଲତ ପରିସରରେଥିବା ଆଇନଜୀବୀ ସଂଘର ଗୃହକୁ ମଧ୍ୟ ଜିଲା ବିଚାରପତି ଶ୍ରୀପଣ୍ଡା ପୂଜାର୍ଚ୍ଚନା କରିବା ପରେ ଆଇନଜୀବୀ ମାନେ କାର୍ଯ୍ୟ ଆରମ୍ଭ କରିଥିଲେ। ବରିଷ୍ଠ ଆଇନଜୀବୀ ଝାଡେଶ୍ୱର ଖାଡଙ୍ଗା, ପ୍ରକାଶ ଚନ୍ଦ୍ର ମିଶ୍ର, ଅରବିନ୍ଦ ପ୍ରସାଦ ପଟ୍ଟନାୟକ, ସୁଧାକର ପଟ୍ଟନାୟକ, ଗଜପତି ପଟ୍ଟନାୟକ, ସଂଘର ଯୁଗ୍ମ ସମ୍ପାଦକ ସନ୍ତୋଷ ନାୟକ, କୋଷାଧ୍ୟକ୍ଷ ବିଧୁଶେଖର ତ୍ରିପାଠୀ, ସଚିଦାନନ୍ଦ ସ୍ୱାଇଁ ପ୍ରଶାନ୍ତ ପଟ୍ଟନାୟକଙ୍କର ସମେତ ବହୁ ଆଇନଜୀବୀ ଉପସ୍ଥିତ ଥିଲେ।

Comments
Loading...