ନବରଙ୍ଗପୁର: ଥାନା ପରିସରରେ ଆତ୍ମହତ୍ୟା ଉଦ୍ୟମ କରିବା ଯୁବକଙ୍କୁ ମାହାଙ୍ଗା ପଡିଲା। ଆତ୍ମହତ୍ୟା କରିବା ଉଦ୍ୟମ ଅପରାଧ ରେ ଜେଲ ଗଲା ଯୁବକ। ନବରଙ୍ଗପୁର ଜିଲ୍ଲା ଡାବୁଗାଁ ଥାନା ପରିସରରେ ଗତକାଲି ଜଣେ ଯୁବକ ଔଷଧ ଖାଇ ଆତ୍ମହତ୍ୟା ଉଦ୍ୟମ କରିବାକୁ ଚେଷ୍ଟା କରି ନବରଙ୍ଗପୁର ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲା। ଗୁରୁତର ଅବସ୍ଥାରେ ପ୍ରଥମେ ଯୁବକକୁ ଡାବୁଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଓ ପରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ପୋଲିସ ଭର୍ତି କରିଥିଲା। ଯୁବକର ସ୍ବାସ୍ଥ୍ୟ ଅବସ୍ଥାରେ ସୁଧାର ଆସିବାରୁ ଆଜି ଡାବୁଗାଁ ପୋଲିସ ଉକ୍ତ ଯୁବକଙ୍କୁ ଦୁଇଟି କେଶରେ ଦଫା ଲଗାଇ କୋର୍ଟ ଚାଲାଣ କରିଛି। ଡାବୁଗାଁ ଅଞ୍ଚଳରେ ଏହା ଚର୍ଚାର ବିଷୟ ପାଲଟିଛି।
ପୋଲିସ ସୂତ୍ରରୁ ମିଳିଥିବା ସୂଚନା ମୁତାବକ ଯୁବକ ଜଣକ ଧୋଡରା ନିକଟ ବିଡ୍ରି ଗୁଡ଼ା ଗ୍ରାମର ମଙ୍ଗ ନାଥ ଭତରା (୨୫) ଜଣକ ଡାବୁଗାଁ ବ୍ଲକରେ କାର୍ଯ୍ୟରତ ଜଣେ ଗ୍ରାମ ରୋଜଗାର ସେବିକାଙ୍କ ସହ ପ୍ରେମ ସମ୍ପର୍କ ରଖିବାକୁ ଅନୁରୋଧ କରିବା ସହ ଉକ୍ତ ଯୁବତୀକୁ ବାହାହେବା ପାଇଁ ପ୍ରସ୍ତାବ ରଖିଥିଲା। କିନ୍ତୁ ରୋଜଗାର ସେବିକା ଜଣକ ମଂଗନାଥଙ୍କ ବାହାଘର ପ୍ରସ୍ତାବକୁ ରାଜି ନ ହେବାରୁ ଯୁବକ ଜଣକ ରୋଜଗାର ସେବିକାଙ୍କ ମୋବାଇଲ ଚଢାଇ ନେଇ ହ୍ଵାଟ୍ସଆପରେ କରିଥିବା ଚାଟିଙ୍ଗକୁ ଭାଇରଲ କରିଥିବା ନେଇ ଗତକାଲି ଯୁବତୀ ଜଣକ ଡାବୁଗାଁ ଥାନାରେ ଏତଲା ଦେଇଥିଲେ। ଏତଲା ପରେ ଯୁବକ ଜଣକ ଥାନାକୁ ଆସି ଔଷଧ ଖାଇ ଆତ୍ମହତ୍ୟା କରିବାକୁ ପ୍ରୟାସ କରିଥିଲା ଏବଂ ଗୁରୁତର ଅବସ୍ଥାରେ ନବରଙ୍ଗପୁର ମେଡିକାଲରେ ଭର୍ତି କରାଯାଇଥିଲା। ଆଜି ଯୁବକର ସ୍ୱାସ୍ଥ୍ୟ ଅବସ୍ଥାରେ ସୁଧାର ଆସିବା ପରେ ଯୁବତୀଙ୍କ ଏତଲା ଏବଂ ଆତ୍ମହତ୍ୟା ଉଦ୍ୟମ ଅପରାଧରେ ଦୁଇଟି ଦଫା ଲଗାଇ ଯୁବକଙ୍କୁ କୋର୍ଟ ଚାଲାଣ କରିଛି ଡାବୁଗାଁ ପୋଲିସ।
Comments are closed.