ନବରଙ୍ଗପୁର : ପବିତ୍ର ଦୁର୍ଗାପୂଜା ଅବସରରେ ସମଗ୍ର ନବରଙ୍ଗପୁର ଜିଲା ଉତ୍ସବମୁଖର ହୋଇ ଉଠିଛି । ସହରର ଅଧିଷ୍ଠାତ୍ରୀଦେବୀ ମା’ଭଣ୍ଡାରଘରଣୀମନ୍ଦିରେ ନବରାତ୍ର ପାଳନ କରାଯାଉଛି । ଫଳରେ ପ୍ରତିଦିନ ସନ୍ଧ୍ୟାରେ ମା’ଙ୍କର ଦର୍ଶନ ଓ ଆଳତୀ ପାଇଁ ନାହିଁ ନଥିବା ଭିଡ ପରିଲକ୍ଷିତ ହେଉଛି । ମନ୍ଦିର ପରିସରରେ ଲୋକାରଣ୍ୟ ହୋଇପଡୁଛି । କରୋନା କାରଣରୁ ଗତ ବର୍ଷ ମନ୍ଦିରରେ ଭକ୍ତଙ୍କର ଦର୍ଶନ ବନ୍ଦ ରହିଥିଲା। ତେବେ ଚଳିତ ବର୍ଷ କରୋନା କଟକଣା କୋହଳ ହେବାପରେ ଭକ୍ତମାନେ ଭାବବିହ୍ୱଳ ହୋଇ ମା’ଙ୍କର ଦର୍ଶନ କରି ଆତ୍ମସନ୍ତୋଷ ଲାଭ କରୁଛନ୍ତି। ଏଠାରେ ପ୍ରଥମଦିନରୁ ହିଁ ୧୦୦୮ ରୁ ଅଧିକ ଅଖଣ୍ଡ ଦୀପ ଲାଗିଛି । ଭକ୍ତମାନେ ମନସ୍କାମନା କରି ଏହା ଲଗାଇଛନ୍ତି ।
ବୁଧବାର ମନ୍ଦିରରେ ମା’ଙ୍କର ମହାନବମୀ ପୂଜା କରାଯାଇଛି । ଗୁରୁବାର ଦିନ ପୂର୍ଣ୍ଣାହୁତି ଦିଆଯିବ ବୋଲି ଜଣାପଡିଛି। ପରେ ସନ୍ଧ୍ୟାରେ ଏକ ଶୋଭାଯାତ୍ରାରେ ଯାଇ ଦଶହରାପଦା ପଡିଆ ଲାଖବିନ୍ଦା ପର୍ବ ଅନୁଷ୍ଠିତ ହେବାର ପରମ୍ପରା ରହିଛି । ସେହିପରି ନବରଙ୍ଗପୁର ସହରରେ ଚଳିତବର୍ଷ ପାଞ୍ଚଟି ମେଢ କରାଯାଇ ମହା ଷଷ୍ଠି ଠାରୁ ମା’ଦୁର୍ଗାଙ୍କର ମୃଣ୍ମୟୀମୃର୍ତ୍ତୀ ପୂଜା କରାଯାଉଛି । ଆରସିଡି ଆଇସ୍କୁଲ ପଡିଆ, ମୁଖ୍ୟରାସ୍ତା ,ବାଦାମ ସାହି , ବିଦ୍ୟୁତ ବିଭାଗ, କାଠମିଲ ଠାରେ ମେଢ କରାଯାଇ ପୂଜା କରାଯାଉଛି। ଆଜି ଏହି ମେଢରେ ମହାଷ୍ଟମୀ ପୂଜା କରାଯାଇଛି। ଶୁକ୍ରବାରଦିନ ଦଶମୀରେ ପୂର୍ଣ୍ଣାହୁତି ଦିଆଯିବ । ତେବେ ଚଳିତବର୍ଷ ପୁଲିସ ବିଭାଗ ଓ ଘରୋଇ ବସ୍ମାଲିକ ସଂଘ ପକ୍ଷରୁ ମେଢ କରାଯାଇ ନାହିଁ । ଏହି ମେଢରେ ମା’ଙ୍କର ଦର୍ଶନ ପାଇଁ ସନ୍ଧ୍ୟାରେ ଭିଡ ଦେଖିବାକୁ ମିଳୁଛି । ଫଳରେ ସହରରେ ଅଧ୍ୟାତ୍ମିକ ପରିବେଶ ସୃଷ୍ଟି ହୋଇଛି ।
Comments are closed.