ବରେଇପାଲିର ହତ୍ୟାକାଣ୍ଡ ଘଟଣା, ୩ ଗିରଫ

ସମ୍ବଲପୁର: ସ୍ଥାନୀୟ ବରେଇପାଲିର ମଖନାପଡା ନିବାସୀ ରାଜକୁମାର ପ୍ରଧାନଙ୍କ ପୁତ୍ର ରୋସନ ଓରଫ ପପୁନର ହତ୍ୟାକାଣ୍ଡ ଘଟଣାରେ ଅଇଁଠାପାଲି ପୁଲିସ ଜଣେ ନାବାଳକଙ୍କ ସମେତ ସମୁଦାୟ ୪ ଜଣ ଅଭିଯୁକ୍ତଙ୍କୁ ଧରିଛି। ସଦର ଏସଡିପିଓ ତପନ କୁମାର ମହାନ୍ତିଙ୍କ ସୂଚନାନୁଯାୟୀ, ଗତ ସୋମବାର ମଖନାପଡା ନିବାସୀ ସୁରୁଚୀ ପ୍ରଧାନ ତାଙ୍କର ପୁତ୍ର ରୋସନ (୨୫) ରବିବାର ଠାରୁ ଘରକୁ ଫେରି ନ ଥିବାର ଅଭିଯୋଗ ଅଇଁଠାପାଲି ଥାନାରେ କରିଥିଲେ। ପ୍ରାୟ ରାତ୍ରି ୮ଟା ପର୍ଯ୍ୟନ୍ତ ଫେରିଆସୁଥିବା ରୋସନ ଘରକୁ ଫେରି ନ ଥିବାରୁ ତାଙ୍କର ମାଁ ଅନେକ ଖୋଜାଖୋଜି ପରେ ଥାନାରେ ଅଭିଯୋଗ କରିଥିଲେ। ତେବେ ସେ ଅଭିଯୋଗ କରିବାରୁ କିଛି ସମୟ ପରେ ବରେଇପାଲି ଛକ ସ୍ଥିତ ଏକ କିରାନା ଦୋକାନର ପଛ ପାର୍ଶ୍ବରେ ରହିଥିବା ପରିତ୍ୟକ୍ତ ଗଳିରୁ ରୋଶନର ମୃତଦେହ ଉଦ୍ଧାର କରାଯାଇଥିଲା।

ପାରିପାଶ୍ୱିକ ସ୍ଥିତିରୁ ଏହା ଏକ ହତ୍ୟାକାଣ୍ଡ ବୋଲି ପ୍ରତିତ ହେବାରୁ ମାମଲା ନଂ ୧୮୪/୨୦୨୧ ରୁଜୁ କରାଯାଇ ଶବ ବ୍ୟବଚ୍ଛେଦ କରାଯିବା ପରେ ପରିବାରବର୍ଗ ଦ୍ୱାରା ଅନ୍ତିମ ସଂସ୍କାର କରାଯାଇଥିଲା। ଏହା ପରେ ତୁରନ୍ତ ଥାନାଧିକାରୀ ଯୋଗେଶ ପଣ୍ଡାଙ୍କ ନେତୃତ୍ୱରେ ଗଠିତ ୩ଟି ସ୍ୱତନ୍ତ୍ର ଦଳ ବିଭିନ୍ନ ସୁତ୍ରରୁ ସୂଚନା ସଂଗ୍ରହ କରି ବିଭିନ୍ନ ସ୍ଥାନରେ ଚଢ଼ଉ ଅଭିଯାନ କରିଥିଲେ। ତଦନ୍ତ ସମୟରେ ଏହି ଭୟଙ୍କର ଓ ନୃଶଂସ ହତ୍ୟାକାଣ୍ଡ ମାମଲାରେ ପଡୋଶୀ ଜିଲାରୁ ବରେଇପାଲି ନିବାସୀ ଶିବନାଥ ଓରାମ (୨୪), ରାନୀବଗିଚା (ବରେଇପାଲି) ନିବାସୀ ବିକାଶ ମୁଣ୍ଡା (୧୯), କରମଟୁଲି ନିବାସୀ କୁନୁ ବାଗ (୨୯) ଏବଂ ଜଣେ ନାବାଳକଙ୍କୁ ଧରିଥିଲା। ଅଭିଯୁକ୍ତ ମାନଙ୍କ ନିକଟରୁ ଏହି ହତ୍ୟାକାଣ୍ଡରେ ବ୍ୟବହୃତ ଏକ ରକ୍ତ ଲଗା ଛୁରୀ ଓ ବାଡି ଜବତ କରିଛି। ତେବେ ହତ୍ୟାର କାରଣ ପୁଲିସ ସ୍ପଷ୍ଟ କରି ନ ଥିବା ବେଳେ ଅସମର୍ଥିତ ସୂତ୍ରରୁ ପ୍ରକାଶ ଯେ ଏଥି ପଛରେ ପ୍ରେମ ଜନିତ ସର୍ମ୍ପକ ରହିଥିବାର କୁହାଯାଉଛି। ଶୁକ୍ରବାର ଅଭିଯୁକ୍ତ ମାନଙ୍କୁ କୋର୍ଟ ଚାଲାଣ କରାଯିବ ବୋଲି ଜଣାପଡିଛି।

ସୁଚନାଯୋଗ୍ୟ ଯେ, ବ୍ୟସ୍ତବହୁଳ ବରେଇପାଲି ଛକ ସଂଲଗ୍ନ ଏକ ଦୋକାନ ପଛରେ ଥିବା ପରିତ୍ୟକ୍ତ ଗଳି ମଧ୍ୟରୁ ନିଖୋଜ ଥିବା ମଖନାପଡା ନିବାସୀ ପୁପୁନ ପ୍ରଧାନଙ୍କ କ୍ଷତାକ୍ତ ଶବ ଅଖା ବସ୍ତା ମଧ୍ୟରେ ଭର୍ତ୍ତି କରାଯାଇଥିବା ଅବସ୍ଥାରେ ମିଳିଥିଲା। ଦୋକାନ ପଛରେ ରହିଥିବା ପରିତ୍ୟକ୍ତ ଗଳିରୁ ସୋମବାର ସନ୍ଧ୍ୟାରେ ଦୁର୍ଗନ୍ଧ ଆସିବାରୁ ସ୍ଥାନୀୟ ଲୋକେ ପୁଲିସକୁ ଖବର ଦେଇଥିଲେ। ସେହି ସମୟରେ ଛକରେ ଚେକିଂରେ ବ୍ୟସ୍ତ ପୁଲିସ କର୍ମଚାରୀ ମାନେ ତୁରନ୍ତ ଘଟଣାସ୍ଥଳକୁ ଯାଇ ଦେଖିବାରୁ ଜଣେ ଯୁବକଙ୍କ କ୍ଷତାକ୍ତ ମୃତଦେହ ଅଖା ବସ୍ତା ଓ ଜରି ମଧ୍ୟରେ ରହିଥିବାର ଦେଖିବାକୁ ପାଇଥିଲେ।

Comments
Loading...