ପାହାଡ଼ୀ ଝିଅର ସାହସିକତା

ହିମାଚଳ ପ୍ରଦେଶର ଏକ ଛୋଟ ଗାଁର ଝିଅ ହେଉଛନ୍ତି ସୀମା ଠାକୁର। ହେଲେ ତାଙ୍କ ସାହସିକତା ପାଇଁ ଆଜି ସେ ପୂରା ଦେଶରେ ଚର୍ଚ୍ଚିତ। ସ୍ଥାନୀୟ ଲୋକ ସୀମାଙ୍କ ପାଇଁ ଗର୍ବିତ ବୋଲି କହି ବୁଲୁଛନ୍ତି। କରୋନା ମହାମାରୀ ସମୟରେ ସେଠାକାର ପୁରୁଷ ବସ୍ ଡ୍ରାଇଭର୍‌ମାନେ ଘରୁ ଗୋଡ଼ କାଢ଼ିବାକୁ ସାହସ ଜୁଟାଇ ପାରିନଥିଲେ। ଏଭଳି ସମୟରେ ସୀମା ନିଜ କର୍ତ୍ତବ୍ୟକୁ ଅଗ୍ରାଧିକାର ଦେଇ ପ୍ରଶଂସାର ପାତ୍ର ହୋଇଛନ୍ତି। ହିମାଚଳ ପ୍ରଦେଶ ରୋଡ୍ ଟ୍ରାନ୍ସପୋର୍ଟ କର୍ପୋରେସନ୍‌‌ର ତଥ୍ୟ ଅନୁସାରେ ମୋଟ୍ ୮,୮୧୩ ଜଣ କର୍ମଚାରୀଙ୍କ ମଧ୍ୟରୁ ସୀମା ହେଉଛନ୍ତି ଏକମାତ୍ର ମହିଳା ବସ୍ ଡ୍ରାଇଭର୍, ଯିଏ ମହାମାରୀ ସମୟରେ କାମ କରିବାକୁ ପଛଘୁଞ୍ଚା ଦେଇନଥିଲେ।

ଡାକ୍ତର, ସେବିକା, ପୁଲିସ୍ କର୍ମଚାରୀଙ୍କୁ ଯଥା ସମୟରେ ଗନ୍ତବ୍ୟ ସ୍ତଳରେ ପହଞ୍ଚାଇବାର ଦାୟିତ୍ବ ସୀମା ନେଇଥିଲେ। ୨୦୧୬ ମେ ୫ରେ ସେ ମହିଳା ବସ୍ ଡ୍ରାଇଭର୍ ଭାବେ ନିଯୁକ୍ତି ପାଇଥିଲେ। ନିଜ କାମରେ ତାଙ୍କୁ ଆତ୍ମସନ୍ତୋଷ ମିଳୁଥିବାବେଳେ ମହାମାରୀର ଲକଡାଉନ୍‌ ସମୟରେ ସେ ତୁଲାଇଥିବା ଦାୟିତ୍ବ ପାଇଁ ଗର୍ବିତ ଥିବାର ସୀମା କହିଛନ୍ତି। ଘରେ ତାଙ୍କର ବୃଦ୍ଧ ବାପା, ମା ଓ ଭାଇ। କରୋନାର ଭୟାବହତା ଦେଖି ସେମାନେ ମଧ୍ୟ ଚାହୁଁନଥିଲେ, ଝିଅ ତାଙ୍କର ଏଭଳି ସମୟରେ କାମ କରୁ। ହେଲେ ସୀମା ସମସ୍ତଙ୍କୁ ବୁଝାଇ କାମ​‌ରେ ଯୋଗ ଦେଇଥିଲେ। ପାହାଡ଼ୀ ଝିଅର ଏଇ ସାହସିକତାକୁ ବିଭିନ୍ନ ମହଲରେ ସାବାସି ଦିଆଯାଇଛି।

Comments
Loading...