ବିରାଟଙ୍କୁ ନେଇ ଏପରି ମନ୍ତବ୍ୟ ଦେଲେ ଇଂଲଣ୍ଡର ପୂର୍ବତନ ସ୍ପିନର ମଣ୍ଟି ପାନେସର

ନୂଆଦିଲ୍ଲୀ: ଇଂଲଣ୍ଡର ପୂର୍ବତନ ବୋଲର ମଣ୍ଟି ପାନେସର ଟିମ୍‌ ଇଣ୍ଡିଆ ଅଧିନାୟକ ବିରାଟ କୋହଲିକୁ କଡ଼ା ସମାଲୋଚନା କରିଛନ୍ତି। ଯଦି ଭାରତ ଟି-୨୦ କିମ୍ବା ଦିନିକିଆ ବିଶ୍ଵକପ୍‌ ଜିତିବାରେ ସଫଳ ନ ହୁଏ, ତେବେ ବିରାଟ ଅଧିନାୟକ ପଦ ଛାଡ଼ିଦେବା ଉଚିତ। ସ୍ପୋର୍ଟ୍ସକୀଡ଼ା ନ୍ୟୁଜ ୱେବସାଇଟ୍‌ ସହ ଆଲୋଚନା ବେଳେ ପାନେସର ଏହା କହିଛନ୍ତି।

ସେ କହିଥିଲେ, ଅଧିନାୟକ ଭାବେ ବିରାଟ କୋହଲି ଯଦି ଦିନିକିଆ କିମ୍ବା ଟି-୨୦ ବିଶ୍ଵକପ ମଧ୍ୟରୁ କୌଣସି ଗୋଟିଏକୁ ଜିତିପାରିବେ ନାହିଁ, ତେବେ ତାଙ୍କୁ ଅଧିନାୟକ ପଦରୁ ହଟିବାକୁ ବି ପଡ଼ିପାରେ। କୋହଲି ଏଥିରେ ବିଫଳ ହେଲେ ତାଙ୍କ ଅଧିନାୟକତ୍ଵ ଉପରେ ଅନେକ ପ୍ରଶ୍ନବାଚୀ ସୃଷ୍ଟି ହେବ।

ସୂଚନାଯୋଗ୍ୟ, ୨୦୨୧ରେ ଟି-୨୦ ବିଶ୍ଵକପ୍‌ ଏବଂ ୨୦୨୩ରେ ଦିନିକିଆ ବିଶ୍ଵକପ ଭାରତରେ ଆୟୋଜନ ହେବ। ଏପରି ସ୍ଥିତିରେ ପାନେସରଙ୍କ କହିବା ଅନୁସାରେ, ଭାରତ ଦୁଇଟି ବିଶ୍ଵକପରୁ କୌଣସି ଗୋଟିଏ ଟୁର୍ନାମେଣ୍ଟ ଜିତିବା ଦରକାର। କୋହଲି ଜଣେ ଭଲ ଅଧିନାୟକ। କିନ୍ତୁ ଅଧିନାୟକ ଭାବେ ସେ କୌଣସି ଗୋଟିଏ ବିଶ୍ଵକପ ବିଜୟୀ ହେବା ଜରୁରୀ।

ପାନେସର ଆହୁରି କହିଛନ୍ତି, ବର୍ତ୍ତମାନ ସମୟରେ ଭାରତୀୟ ଟିମ୍‌ର ଅଧିନାୟକ ପରିବର୍ତ୍ତନ କରିବାର କୌଣସି ଆବଶ୍ୟକତା ନାହିଁ। ଉଲ୍ଲେଖ ଯେ, ଆଜିଙ୍କ୍ୟ ରାହାଣେଙ୍କ ନେତୃତ୍ଵରେ ଟିମ୍‌ ଇଣ୍ଡିଆ ଅଷ୍ଟ୍ରେଲିଆରେ ବର୍ଡର-ଗାଭାସ୍କର ଟ୍ରଫିକୁ ୨-୧ରେ ଜିତିବା ପରଠାରୁ କୋହଲିଙ୍କ ଅଧିନାୟକତ୍ଵ ଉପରେ ଅନେକ ପ୍ରଶ୍ନ ଉଠିଛି।

Comments are closed.