ଜଙ୍ଗଲ ଜମି ଜବରଦଖଲକାରୀକୁ ଉଚ୍ଛେଦ ଦାବିରେ ୨୪ରେ ଅଡ଼ବା ବନ୍ଦ ସହ ଜାତୀୟ ରାଜପଥ ଅବରୋଧ

ମୋହନା : ଗଜପତି ଜିଲ୍ଲା ମୋହନା ବ୍ଲକ ଅନ୍ତର୍ଗତ ଅଡ଼ବା ଗ୍ରାମରେ ଥିବା ମା’ ଠାକୁରାଣୀ ମନ୍ଦିର ପାର୍ଶ୍ୱରେ ଅଡ଼ବା ମୌଜା ପ୍ଲାଟ ନଂ୬୯୯କୁ ଦମାଦୁଆ ପଞ୍ଚାୟତର ଘୋଡ଼ାପଙ୍କା ଗ୍ରାମର କାମେଲ ନାୟକ ଜୋର ଜବରଦସ୍ତି କରି କିଛି ମୁଲ୍ୟବାନ ଗଛକୁ କାଟି ବିକ୍ରି କରି କୁଡ଼ିଆ କରି ରହିଛନ୍ତି। ଏପରିକି ଉକ୍ତ ଜାଗାରେ ପୂର୍ବରୁ ଅଡ଼ବା ଗ୍ରାମବାସୀ ବନ ବିଭାଗର ସାହାଯ୍ୟରେ ସେଠାରେ ଚାରା ରୋପଣ କରି ଆସୁଥିଲେ । କିଛି ମାସ ହେଲା ନାୟକ ଗଛ ଗୁଡିକୁ କାଟି ଜଙ୍ଗଲ ନଷ୍ଟ କରି ସେଠାରେ ଘର ତିଆରି କରି ରହୁଛନ୍ତି । ଏହା ଜାଣିବା ପରେ ଅଡ଼ବା ଗ୍ରାମବାସୀ ବନ ବିଭାଗ ଏବଂ ମୋହନା ତହସିଲଦାରଙ୍କୁ ଲିଖିତ ଅଭିଯୋଗ ଜଣାଇଥିଲେ । ଏହା ପରେ ଘଟଣା ସ୍ଥଳରେ ମୋହନା ତହସିଲଦାର ସାରଦା ପ୍ରଶନ୍ନ ପଣ୍ଡା ଓ ଅତିରିକ୍ତ ତହସିଲଦାର ଆଶିଷ କୁମାର ପ୍ରଧାନ, ଅଡ଼ବା ଥାନା କର୍ମଚାରୀଙ୍କ ଉପସ୍ଥିତିରେ ଉକ୍ତ ଜାଗାକୁ ଖାଲି କରିବା ପାଇଁ କାମେଲ ନାୟକଙ୍କୁ ଅଧିକାରୀମାନେ କହିଥିଲେ । କିନ୍ତୁ ଏହା ମଧ୍ୟରେ କିଛି ମାସ ବିତିଯାଇଥିଲେ ମଧ୍ୟ ସେ ସେହି ସ୍ଥାନ ଖାଲି ନ କରିବାରୁ ଅଡ଼ବା ଗ୍ରାମବାସୀ ଜିଲ୍ଲାପାଳ, ତହସିଲଦାର, ଥାନାକୁ ଏକ ଦାବି ପତ୍ର ପ୍ରଦାନ କରିଛନ୍ତି। ୨୩ତାରିଖ ସୁଦ୍ଧା ଉକ୍ତ ସ୍ଥାନରୁ କାମେଲ ନାୟକ ଙ୍କୁ ଉଛେଦ କରାନଗଲେ ଆସନ୍ତା ୨୪ରେ ଜାତୀୟ ରାଜପଥ ୩୨୬କୁ ଅବରୋଧ କରାଯିବା ସହ ଅଡ଼ବା ଗ୍ରାମରେ ଦୋକାନ ବଜାର ସକାଳ ୬ରୁ ସନ୍ଧ୍ୟା ୬ଟା ପର୍ୟ୍ୟନ୍ତ ବନ୍ଦ କରାଯିବ ବୋଲି ଗ୍ରାମ୍ୟ କମିଟି ନିଷ୍ପତି ନେଇଛି ।

Comments are closed.