ୱାଶିଂଟନ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ ଆମେରିକା ଗସ୍ତ ଅବସରରେ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ସ୍କଟ ମୋରିସନ ଓ ଜାପାନ ପ୍ରଧାନମନ୍ତ୍ରୀ ୟୋସିହିଦେ ସୁଗାଙ୍କ ସହିତ ଦ୍ବିପାକ୍ଷିକ କଥାବାର୍ତ୍ତା କରିଛନ୍ତି। କ୍ବାଦ ବୈଠକ ପୂର୍ବରୁ ଗୁରୁବାର ମୋଦୀ ଏହି ଦୁଇ ନେତାଙ୍କ ସହିତ ସାକ୍ଷାତ ଆଲୋଚନା କରିଥିଲେ। ମୋଦୀଙ୍କ ସହିତ କଥାବାର୍ତ୍ତା ବେଳେ ଜାପାନ ପ୍ରଧାନମନ୍ତ୍ରୀ ସୁଗା ପ୍ରତିରକ୍ଷା, ବୈଷୟିକ ଜ୍ଞାନକୌଶଳ ଓ ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ପରସ୍ପରର ସହଯୋଗ ନେଇ ନିଜର ପ୍ରତିଶ୍ରୁତିକୁ ଦୋହରାଇଥିଲେ। ଏହା ସହିତ ଆଫଗାନିସ୍ତାନ ଓ ଅନ୍ୟ ବିଶ୍ବ ପ୍ରସଙ୍ଗକୁ ନେଇ ଦୁଇ ନେତା ପରସ୍ପରର ମତ ବିନିମୟ କରିଥିଲେ।
ଭାରତ-ଜାପାନ ମଧ୍ୟରେ ବାଣିଜ୍ୟ ଓ ସାଂସ୍କୃତିକ ସମ୍ପର୍କକୁ ନିବିଡ କରିବା ଦିଗରେ ଉଭୟ ଦେଶ ଗୁରୁତ୍ବାରୋପ କରିଥିଲେ। ଏହି ସାକ୍ଷାତ କାଳରେ ସୁଗାଙ୍କୁ ଉପହାର ସ୍ବରୂପ ମୋଦୀ ଚନ୍ଦନ କାଠରେ ନିର୍ମିତ ଭଗବାନ ବୁଦ୍ଧଙ୍କ ପ୍ରତିମୂର୍ତ୍ତି ଦେଇଥିଲେ। ସେହିପରି ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ମୋରିସନଙ୍କ ସହିତ ଦ୍ବିପାକ୍ଷିକ କଥାବାର୍ତ୍ତା କାଳରେ ମୋଦୀ ଆଞ୍ଚଳିକ ଓ ବିଶ୍ବ ପ୍ରସଙ୍ଗରେ ଆଲୋଚନା କରିଥିଲେ। ବିଶେଷକରି କୋଭିଡ୍-୧୯, ପ୍ରତିରକ୍ଷା, ସବୁଜ ଶକ୍ତି ଓ ଅନ୍ୟାନ୍ୟ ପ୍ରସଙ୍ଗରେ ଦୁଇ ଦେଶ ଆଲୋଚନା କରିଥିଲେ। ନିକଟରେ ଅଷ୍ଟ୍ରେଲିଆ-ବ୍ରିଟେନ-ଆମେରିକାକୁ ନେଇ ହୋଇଥିବା ନୂଆ ମେଣ୍ଟ ପ୍ରସଙ୍ଗରେ ମୋଦୀଙ୍କୁ ମୋରିସନ ଅବଗତ କରାଇଥିଲେ। ଏହି ନୂଆ ମେଣ୍ଟ ଅନୁଯାୟୀ ଅଷ୍ଟ୍ରେଲିଆକୁ ଦୁଇଦେଶ ଆଣବିକ ଶକ୍ତି ସମ୍ପନ୍ନ ବୁଡାଜାହାଜ ଯୋଗାଇବେ। ଅନ୍ୟପଟେ ଭାରତ ଓ ଅଷ୍ଟ୍ରେଲିଆ ସହିତ ହେବାକୁ ଥିବା ଦ୍ବିପାକ୍ଷିକ କଥାବାର୍ତ୍ତାକୁ ଫ୍ରାନ୍ସ ବାତିଲ କରିଛି। ଜାତିସଂଘ ସାଧାରଣ ପରିଷଦ ବୈଠକ ଅବସରରେ ଭାରତ-ଫ୍ରାନ୍ସ-ଅଷ୍ଟ୍ରେଲିଆ ମନ୍ତ୍ରୀସ୍ତରୀୟ ବୈଠକ ହେବାକୁ ସ୍ଥିର ହୋଇଥିଲା। ଆମେରିକା, ବ୍ରିଟେନ ସହିତ ଅଷ୍ଟ୍ରେଲିଆର ନୂଆ ମେଣ୍ଟକୁ ନେଇ କ୍ଷୁବ୍ଧ ଫ୍ରାନ୍ସ ଏହି ବୈଠକକୁ ବାତିଲ କରିଛି। ସାକ୍ଷାତ କାଳରେ ମୋଦୀ ଉପହାର ସ୍ବରୂପ ମୋରିସନଙ୍କୁ ରୁପାର ଗୁଲାବୀ ମୀନା ରଙ୍ଗ କରାଯାଇଥିବା ଏକ ଜାହାଜ ଦେଇଥିଲେ।
Comments are closed.