ବ୍ରିକ୍ସ ନେତାଙ୍କ ବୈଠକରେ ମୋଦୀ: ମାନବିକତା ପ୍ରତି ଆତଙ୍କବାଦ ସବୁଠୁ ବଡ଼ ବିପଦ

ଓସାକା: ଆତଙ୍କବାଦ ମାନବିକତା ଏବଂ ମାନବ ସମାଜ ପ୍ରତି ସବୁଠାରୁ ବଡ଼ ବିପଦ। ଏହା କେବଳ ନିରୀହ ଲୋକମାନଙ୍କୁ ମାରେ ନାହିଁ, ବରଂ ଅର୍ଥନୈତିକ ବିକାଶ ଏବଂ ସାମାଜିକ ସ୍ଥିରତାକୁ ଏହା କ୍ଷତିଗ୍ରସ୍ତ କରିଥାଏ। ତେଣୁ ଆତଙ୍କବାଦ ଏବଂ ଜାତିବାଦକୁ ସମର୍ଥନ କରୁଥିବା ସମସ୍ତ ମାଧ୍ୟମକୁ ବନ୍ଦ କରିଦେବାର ଆବଶ୍ୟକତା ରହିଛି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି। ମୋଦୀ ଜାପାନ ଗସ୍ତରେ ଯାଇଥିବାବେଳେ ଓସାକାଠାରେ ବ୍ରିକ୍ସ(ବ୍ରାଜିଲ, ରୁଷ, ଭାରତ, ଚାଇନା ଏବଂ ଦକ୍ଷିଣ ଆଫ୍ରିକା) ରାଷ୍ଟ୍ରନେତାମାନଙ୍କ ମଧ୍ୟରେ ଶୁକ୍ରବାର ଅନୁଷ୍ଠିତ ଅନୌପଚାରିକ ବୈଠକରେ ଏହା କହିଛନ୍ତି।

ଏହି ଅବସରରେ ମୋଦୀ ବ୍ରାଜିଲର ନବନିର୍ବାଚିତ ରାଷ୍ଟ୍ରପତି ଜୈର ବୋଲସୋନାରୋ ଏବଂ ଦକ୍ଷିଣ ଆଫ୍ରିକା ରାଷ୍ଟ୍ରପତି ସିରିଲ ରାମାଫୋସାଙ୍କୁ ଶୁଭେଚ୍ଛା ଜଣାଇବା ସହିତ ବ୍ରିକ୍ସ ପରିବାରକୁ ସ୍ବାଗତ କରିଥିଲେ। ମୋଦୀ ତାଙ୍କ ମନ୍ତବ୍ୟରେ ବିଶ୍ଵ ବାଣିଜ୍ୟ ସଂଗଠନକୁ ସୁଦୃଢ଼ କରିବା, ଶକ୍ତି ନିରାପତ୍ତାକୁ ନିଶ୍ଚିତ କରିବା ଏବଂ ଆତଙ୍କବାଦ ବିରୋଧରେ ଏକାଠି ଲଢ଼ିବା ଲାଗି ଆହ୍ବାନ କରିଥିଲେ। ବିଶ୍ଵ ଅର୍ଥନୀତିରେ ଅସ୍ଥିରତା ଦେଖିବାକୁ ମିଳୁଛି ଏବଂ ଏହା ନିମ୍ନଗାମୀ ହେଉଛି। ଏକପକ୍ଷୀୟତା ଏବଂ ପ୍ରତିଯୋଗିତାମୂଳକ ପରିସ୍ଥିତି ବହୁପକ୍ଷୀୟ ବ୍ୟାପାର ପ୍ରଣାଳୀ ଅଧାରିତ ନିୟମଗୁଡ଼ିକ ଉପରେ ଭାରି ପଡୁଛି ବୋଲି ମୋଦୀ କହିଥିଲେ।

Comments
Loading...