ଶାଶୁଘରୁ ବାଳିକା ବଧୂ ଉଦ୍ଧାର,ଯୁବକ ଅଟକ

ଚୌଦ୍ୱାର : ବେଆଇନ୍‍ ଭାବେ ବିବାହ କରାଇ ଦିଆ ଯାଇଥିବା ଜଣେ ୧୫ ବର୍ଷର ନାବାଳିକାକୁ ଟାଙ୍ଗୀ-ଚୌଦ୍ୱାର ବ୍ଲକ ବାଲ୍ୟ ବିବାହ ଟାସ୍କ ଫୋର୍ସର ସଦସ୍ୟମାନେ ଚୌଦ୍ୱାର ପୁଲିସ୍‍ ସହାୟତାରେ ଚୌଦ୍ୱାର ପୌରପାଳିକା ଅନ୍ତର୍ଗତ କପାଳେଶ୍ୱର ନୂଆ ସାହିରୁ ଉଦ୍ଧାର କରିଛନ୍ତି। ଖୋର୍ଦ୍ଧା ଜିଲା ତମାଣ୍ଡୋ ଥାନା ଅନ୍ତର୍ଗତ ପାତ୍ରପଡ଼ା ଗ୍ରାମର ଜନୈକା ନାବାଳିକାକୁ ଚୌଦ୍ୱାର ଅଞ୍ଚଳର ଜଣେ ଯୁବକ ବିବାହ କରିଥିବା କଟକ ଚାଇଲ୍ଡଲାଇନ୍‍ ଠାରୁ ଖବର ପାଇ ବ୍ଲକ୍‍ ବାଲ୍ୟ ବିହାହ ଟାସ୍କ ଫୋର୍ସ ସଦସ୍ୟ ନରୋତ୍ତମ ଦାସ, ଟାଙ୍ଗୀ ସମନ୍ୱିତ ଶିଶୁ ବିକାଶ ସୁପରଭାଇଜର ଆରତୀ ମହାନ୍ତି, ଚୌଦ୍ୱାର ଥାନା ଏସ୍‍ଆଇ ତପସ୍ୱିନୀ କାନୁନ୍‍ଗୋ, ଉଦ୍ଧାର ଫାଉଣ୍ଡେସନ୍‍ର ପ୍ରମିଳା ଓଝା, କିରଣବାଳା ନାୟକ, ଦିଲ୍ଲିପ ସାହୁ, ଶ୍ରୀକାନ୍ତ ଜେନା, ଶୁଭ୍ରଜିତ୍‍ ବିଶୋଇ ପ୍ରମୁଖ ନୂଆସାହିର ରଞ୍ଜିତ ଦତ୍ତଙ୍କ ଘରେ ପହଞ୍ଚି ବିବାହ କରିଥିବା ନାବାଳିକାକୁ ଉଦ୍ଧାର କରିବା ସହିତ ତାକୁ ସ୍ଥାନୀୟ ମନ୍ଦିରରେ ବିବାହ କରିଥିବା ରଣ୍‍ଜିତଙ୍କ ପୁଅ ଦୀପୁ(୨୪)କୁ ଥାନାକୁ ଆଣି ଅଟକ ରଖିଛନ୍ତି। ଉଦ୍ଧାର କରାଯାଇଥିବା ବାଳିକାର ପିତାମାତାଙ୍କୁ ଏସମ୍ପର୍କରେ ଖବର ଦିଆଯିବା ସହିତ ତାକୁ ବସୁନ୍ଧରା ଅନୁଷ୍ଠାନକୁ ପଠାଇ ଦିଆଯାଇଛି। ଅଭିଯୁକ୍ତ ଦୀପୁ ଏହା ପୂର୍ବରୁ ଅନ୍ୟ ଏକ ବିବାହ କରିଥିବା ଓ ପ୍ରଥମ ପତ୍ନୀକୁ ଛାଡ଼ି ଦେଇଥିବା ଜଣାପଡ଼ିଛି।

Comments
Loading...