କାଠ ପୋଲ ଚଢି ଉପାନ୍ତ ଗାଁକୁ ପହଞ୍ଚିଲେ ମନ୍ତ୍ରୀ

ଟିଟିଲାଗଡ଼ : କାଠ ପୋଲ ଚଢି ଉପାନ୍ତ ଗାଁକୁ ପହଞ୍ଚିଲେ ମନ୍ତ୍ରୀ । ବଲାଙ୍ଗୀର ଜିଲା ଟିଟିଲାଗଡ଼ ବ୍ଲକ ଅନ୍ତର୍ଗତ ଦୁର୍ଗମ ଅରଣ୍ୟ ମଧ୍ୟରେ ରହିଥିବା ଉପାନ୍ତ ଗାଁ କୁଟରାକେନ ଗ୍ରାମକୁ ଶନିବାର ରାଜ୍ୟ ମହିଳା ଓ ଶିଶୁ ବିକାଶ ଏବଂ ମିଶନ ଶକ୍ତି ମନ୍ତ୍ରୀ ଟୁକୁନି ସାହୁ ପହଞ୍ଚିଛନ୍ତି ।
୧୯୮୪ରେ ବଡ଼ମାଲ ଠାରେ ଗୋଳାବାରୁଦ କାରଖାନା ନିର୍ମାଣ ନେଇ ବିସ୍ଥାପିତ ୬୦ ପରିବାର  ଏଠାରେ ବସବାସ କରୁଛନ୍ତି  । ଗ୍ରାମବାସୀଙ୍କୁ ସରକାରଙ୍କ ଜଙ୍ଗଲ ଜମି ଅଧିକାର ଆଇନରେ ଜମି ପଟ୍ଟା ମଧ୍ୟ ପ୍ରଦାନ କରିଛନ୍ତି  । ହେଲେ ଗାଁକୁ କୌଣସି ସ୍ଥାୟୀ ରାସ୍ତା ନାହିଁ, ଟିଟିଲାଗଡ଼ ମୁରିବାହାଲ ଆରଡ଼ି ବିଭାଗ ରାସ୍ତାରୁ ପ୍ରାୟ ୪ କିଲୋମିଟର ଗ୍ରାମକୁ ଯାଇଥିବା ରାସ୍ତାଟି ଯାତାୟାତ ଦୃଷ୍ଟିରୁ ଦୁର୍ଗମ ହୋଇପଡିଛି  । ଏହି ରାସ୍ତାରେ ୩ଟି ନାଳ ମୁଖ୍ୟ ସମସ୍ୟା ରହିଛି  । ଗ୍ରାମବାସୀଙ୍କ ଅନେକ ଦାବି ପରେ ମଧ୍ୟ ରାସ୍ତା କିମ୍ବା ପୋଲ ନିର୍ମାଣ ହୋଇପାରିନି  ।
ଚଳିତ ବର୍ଷ ଗ୍ରାମବାସୀ ନାଳରେ ନିଜସ୍ୱ ଉଦ୍ୟମରେ କାଠ ପୋଲ ନିର୍ମାଣ କରିଛନ୍ତି । ପୂର୍ବରୁ ଏସମ୍ପର୍କରେ ‘ସମାଜ’ରେ ବିସ୍ତୃତ ଖବର ପ୍ରକାଶ ପାଇଥିଲା । ପୋଲ ନିର୍ମାଣ ପାଇଁ ରାଜ୍ୟ ମହିଳା ଓ ଶିଶୁ ବିକାଶ ଏବଂ ମିଶନ ଶକ୍ତି ମନ୍ତ୍ରୀ ,ବଲାଙ୍ଗୀର ଆରଡ଼ି ବିଭାଗ ଏସ ଇ ଦେବେନ୍ଦ୍ର ସେଠ, ଟିଟିଲାଗଡ଼ ନିର୍ବାହୀ ଯନ୍ତ୍ରୀ ସଞ୍ଜୀବ ଦାଶ, ସରପଞ୍ଚ ଇନ୍ଦ୍ରାଣୀ ପୁଞ୍ଜି ପ୍ରମୁଖଙ୍କ ସହ ଚାଲିଚାଲି କାଠ ପୋଲ ପାର ହୋଇ ଗାଁକୁ ଯାଇଥିଲେ  । ଏଥର ନିଶ୍ଚୟ ପୋଲ ହେବ ବୋଲି ପ୍ରତିଶୃତି ଦେଇଛନ୍ତି । ଏନେଇ ଗାଁରେ ଉତ୍ସବର ମାହୋଲ ସୃଷ୍ଟି ହୋଇଛି । ଗ୍ରାମବାସୀ ମୁଖ୍ୟମନ୍ତ୍ରୀ ଏବଂ ମନ୍ତ୍ରୀ ଶ୍ରୀମତୀ ସାହୁଙ୍କୁ ଧନ୍ୟବାଦ ଜ୍ଞାପନ କରିଛନ୍ତି ।

Comments
Loading...