ମୁମ୍ବଇ : ମହାରାଷ୍ଟ୍ରରେ ମୌସୁମି ବର୍ଷା ଓ ତତ୍ଜନିତ ବନ୍ୟା ବିତ୍ପାତ ମୃତ୍ୟୁ ସଂଖ୍ୟା ୧୫୫ରେ ପହଞ୍ଚିଛି। ଏବେ ସୁଦ୍ଧା ବହୁ ଦୁର୍ଗତ ବନ୍ୟା ଜଳ ଓ ଧସିଥିବା ଅତଡ଼ା ତଳେ ଚାପି ହୋଇ ରହିଛନ୍ତି। ଆହୁରି ୬୦ଜଣ ନିଖୋଜ ଥିବାବେଳେ ୮୯ଜଣ ଆହତ ହୋଇଛନ୍ତି। ଏନ୍ଡିଆରଏଫ୍, ସେନା ଏବଂ ଏସ୍ଡିଆରଏଫ୍ ପକ୍ଷରୁ ଉଦ୍ଧାର ଓ ସହାୟତା ଜାରି ରହିଛି। ସେନାର ଏହି କାର୍ଯ୍ୟକୁ ‘ଅପରେସନ୍ ବର୍ଷା’ ନାମକରଣ କରାଯାଇଛି। ମୋଟ ୯୦ ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ୯ ଜିଲାର ୮୭୫ ଗାଁରେ ସର୍ବାଧିକ କ୍ଷତି ଘଟିଛି। ୬ଜିଲାରେ ମାଟି ଅତଡ଼ା ଧସିଥିବାବେଳେ ଏଥିରେ ଅଧିକ ଜୀବନହାନି ଘଟିଛି। କୋହ୍ଲାପୁର ଓ ରାଇଗଡ଼ରେ ମୃତ୍ୟୁସଂଖ୍ୟା ଅଧିକ ରହିଛି। ପାଣିପାଗ ବିଭାଗ ପକ୍ଷରୁ ଅଧିକ ବର୍ଷା ନେଇ ରାଇଗଡ଼, ସିନ୍ଧୁଦୁର୍ଗ, ରତ୍ନଗିରି, ପୁଣେ, ସତାରା ଓ କୋହ୍ଲାପୁର ଭଳି ୬ ଜିଲା ପାଇଁ ସତର୍କତା ଜାରି କରାଯାଇଛି। ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେ ଶନିବାର ବିଭିନ୍ନ କ୍ଷତିଗ୍ରସ୍ତ ଅଞ୍ଚଳ ପରିଦର୍ଶନ ସହ ସ୍ଥିତି ସମୀକ୍ଷା କରିଛନ୍ତି। ସେ ମୃତକଙ୍କ ପିଛା ୫ଲକ୍ଷ ଟଙ୍କା ଲେକ୍ଷାଏଁ ଅନୁକମ୍ପା ରାଶି ଘୋଷଣା କରିଛନ୍ତି। ଆହତଙ୍କ ଚିକିତ୍ସା ବାବଦ ଖର୍ଚ୍ଚ ସରକାର ବହନ କରିବେ ବୋଲି ସେ କହିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରାଜ୍ୟକୁ ସମସ୍ତ ସହାୟତା ପ୍ରଦାନ କରାଯିବାର ପ୍ରତିଶ୍ରୁତି ଦେଇଛନ୍ତି।
Comments are closed.