ମ୍ୟାଜିକ୍‌ ପେନ୍ ରେ ଠକେଇ : ଜମାଖାତାରୁ ୭୬,୫୦୦ ଟଙ୍କା ଉଭାନ୍‌

ଉତ୍ତର ଭୁବନେଶ୍ୱର : ଦିନକୁଦିନ ମ୍ୟାଜିକ ପେନ୍ ରେ ଠକେଇ ବୃଦ୍ଧି ପାଉଛି। ଗତ ଦୁଇ ତିନି ଦିନ ଭିତରେ ଭୁବନେଶ୍ୱରର ବିଭିନ୍ନ ଥାନାରେ ଏପରି ଲୁଟ ଅଭିଯୋଗ ହୋଇଥିବା ବେଳେ ପୁଣି ପାହାଳ ଫାଣ୍ଡି ପୁଲିସରେ ଏପରି ଏକ ଅଭିଯୋଗ ହୋଇଥିବା ଜଣାପଡ଼ିଛି। ଅଭିଯୋଗରୁ ଜଣାପଡ଼ିଛି ଯେ ହଂସପାଳ ସିମ୍ଫୋନୀ ମଲ୍‍ ନିକଟରେ ଥିବା ଏକ ଟାୟାର ଶୋ ରୁମ୍‍ର ମାଲିକ କୃଷ୍ଣ କୁମାର ପାଢ଼ୀଙ୍କ ଆକାଉଣ୍ଟରୁ ନଗଦ ୭୬ହଜାର ୫ଶହ ଟଙ୍କା ଲୁଟିଆ ୬ତାରିଖରେ ଉଠାଇ ନେଇଥିବା ଜଣାପଡ଼ିଛି। ଏ ସଂକ୍ରାନ୍ତରେ କୃଷ୍ଣ କୁମାର ପାହାଳ ଫାଣ୍ଡିରେ ଲିଖିତ ଅଭିଯୋଗ କରିଥିବା ବେଳେ ପୁଲିସ ଏକ ମାମଲା ରୁଜୁ କରି ଖୋଳତାଡ଼ ଆରମ୍ଭ କରିଛି। ସୂଚନା ଅନୁସାରେ ଗତ ୩ ତାରିଖରେ ୮୯୦୨୨୧୧୫୨୬୯ ନମ୍ବରରୁ କୃଷ୍ଣ କୁମାରଙ୍କୁ ଏକ ଫୋନ୍‍ କଲ୍‍ ଆସିଥିଲା। ସେମାନେ ଏଚଡିଏଫସି ବ୍ୟାଙ୍କର କର୍ମଚାରୀ ବୋଲି ପରିଚୟ ଦେଇ ହୋଲି ଅବସରରେ ଅଫରରେ ଋଣ ଯୋଗାଇ ଦେବେ ବୋଲି କହିଥିଲେ। ସେହି ଅନୁସାରେ କୃଷ୍ଣ କୁମାର ତାଙ୍କ ସହିତ କଥାବାର୍ତ୍ତା କରି ୬ ତାରିଖକୁ ନିଜ ଶୋ ରୁମ୍‍ ହଂସପାଳକୁ ଡକାଇଥିଲେ। ତେବେ ଜଣେ ମାତ୍ର କୃଷ୍ଣ କୁମାରଙ୍କ ପାଖରେ ପହଞ୍ଚି ସମସ୍ତ ଆଇଡି ପ୍ରୁଫ୍‍ ସହିତ ୧୪୯ଟଙ୍କାର ଏକ ଚେକ୍‍, ସମସ୍ତ କାଗଜପତ୍ର ଆଦି ଆବଶ୍ୟକ ବୋଲି କୃଷ୍ଣ କୁମାରଙ୍କଠାରୁ ନେଇଥିଲେ। ତେବେ ​ସେହିଦିନ ଲକ୍ଷ୍ମୀସାଗର ସ୍ଥିତ ଏଚଡିଏଫସି୍‍ ବ୍ୟାଙ୍କ ଶାଖାରୁ ମ୍ୟାଜିକ ପେନ୍‍ ବଳରେ ୭୬ହଜାର ୫ଶହ ଉଠାଇ ନେଇଥିଲେ। ତେବେ ବ୍ୟକ୍ତି ଜଣକ ଟଙ୍କା ନେଇ ପଳାଇବା ପରେ ସମ୍ପୃକ୍ତ ବ୍ୟାଙ୍କ ପକ୍ଷରୁ କୃଷ୍ଣ କୁମାରଙ୍କୁ ମେସେଜ୍‍ ଆସିଥିଲା। ମେସେଜ୍‍ ପାଇ କୃଷ୍ଣ କୁମାର ଇତଃସ୍ତତ ହୋଇ ବ୍ୟାଙ୍କ ଶାଖାରେ ପହଞ୍ଚି ସମସ୍ତ ବୃତ୍ତାନ୍ତ ବର୍ଣ୍ଣନା କରିଥିଲେ।

Comments
Loading...