ମଦମୁକ୍ତ ବିହାରରୁ ୭୦ ଲକ୍ଷ ଟଙ୍କାର ମଦ ଜବତ

ପାଟଣା : ୨୦୧୬ ମସିହା ଏପ୍ରିଲ ମାସଠାରୁ ବିହାରରେ ମଦକୁ ସମ୍ପୂର୍ଣ୍ଣ ବ୍ୟାନ୍ କରାଯାଇଛି। ମାତ୍ର ମଦମୁକ୍ତ ରାଜ୍ୟ ବିହାରର ଆରାରିଆ ଜିଲ୍ଲାରୁ  ରବିବାର ୭୦ ଲକ୍ଷ ଟଙ୍କା ମୂଲ୍ୟର ମଦ ଜବତ କରାଯାଇଛି। ଅବକାରୀ ବିଭାଗ ଏବଂ ପୁଲିସ ଦ୍ୱାରା କରାଯାଇଥିବା ଏହି ମିଳିତ ଅପରେସନରେ ୭ ଜଣଙ୍କୁ ମଧ୍ୟ ଗିରଫ କରାଯାଇଛି। ପୁଲିସ୍ ପକ୍ଷରୁ ରବିବାର ଏହି ସୂଚନା ଦିଆଯାଇଛି।

ପୂର୍ବ ସୂଚନା ଆଧାରରେ, ପୁଲିସ ଏବଂ ଅବକାରୀ ବିଭାଗ ନଗର ପୁଲିସ ଷ୍ଟେସନ ଅଞ୍ଚଳରେ ଅବସ୍ଥିତ ଟୋଲ ପ୍ଲାଜାରେ ଦୁଇଟି ଟ୍ରକକୁ ଅଟକାଇଥିଲା। ଏହି ଟ୍ରକରୁ ୬୪୮ କାର୍ଟୁନ୍ ମଦ ଜବତ କରାଯାଇଛି ବୋଲି ସବ୍ ଡିଭିଜନାଲ ପୁଲିସ ଅଧିକାରୀ ପୁଷ୍କର କୁମାର କହିଛନ୍ତି।

ସେ କହିଛନ୍ତି ଯେ, ଜବତ ମଦର ମୂଲ୍ୟ ପ୍ରାୟ ୭୦ ଲକ୍ଷ ଟଙ୍କା ହେବ ବୋଲି ଆକଳନ କରାଯାଉଛି। ଟ୍ରକରୁ ଦୁଇଜଣ ଡ୍ରାଇଭର ଏବଂ କ୍ଲିନର୍ ଗିରଫ କରାଯାଇଛି। ଏହା ବ୍ୟତୀତ ଏକ ଏସୟୁଭିର ଅନ୍ୟ ଚାରି ଜଣଙ୍କୁ ମଧ୍ୟ ଘଟଣାସ୍ଥଳରୁ ଗିରଫ କରାଯାଇଛି। ପୁଲିସ ଉଭୟ ଟ୍ରକ୍ ଏବଂ ଏସୟୁଭି ମଧ୍ୟ ଜବତ କରିଛି।

ଏହି ଟ୍ରକ୍ ଗୁଡ଼ିକ ପଶ୍ଚିମବଙ୍ଗରୁ ଆସି ଆରାରିଆ ଦେଇ ମୁଜାଫରପୁର ଯାଉଥିଲେ। ପୁଲିସ ଏହି ଘଟଣାର ତଦନ୍ତ କରୁଛି।

Comments
Loading...