ଚୌଦ୍ୱାର : ଚୌଦ୍ୱାର ଜେଲରେ ରହୁଥିବା ଅନ୍ତେବାସୀଙ୍କ ସୁଧାର ପାଇଁ ଜେଲ ତରଫରୁ ଆଉଏକ ପଦକ୍ଷେପ ଗ୍ରହଣ କରାଯାଇଛି । ଅନ୍ତେବାସୀଙ୍କ ମଧ୍ୟରେ ଆଧ୍ୟାତ୍ମିକ, ସାମାଜିକ ଓ ସାଂସ୍କୃତିକ ଚେତନା ଜାଗୃତି ପାଇଁ ଜେଲ ସଭା ଗୃହରେ ‘ଗିରିଜା ଜ୍ଞାନ ଭଣ୍ଡାର’ ନାମରେ ଏକ ପାଠାଗାର ଖୋଲା ଯାଇଛି । ଚଣ୍ଡିପ୍ରସାଦ ଫାଉଣ୍ଡେସନ୍ ଟ୍ରଷ୍ଟ ଓ ମାଷ୍ଟର ଗିରିଜା ରୋଡ଼ ସେଫ୍ଟି ଫାଉଣ୍ଡେସନ୍ ତରଫରୁ ଏହି ପାଠାଗାରକୁ ପ୍ରବନ୍ଧ, ଗଳ୍ପ, ଆଧ୍ୟାତ୍ମିକ ଜ୍ଞାନ,କବିତା ପୁସ୍ତକ, ଗୀତା, ଭାଗବତ, ରାମାୟଣ ଆଦି ବହୁ ପୁସ୍ତକ ସହିତ ବିଭିନ୍ନ ପତ୍ରପତ୍ରିକା ଯୋଗାଇ ଦିଆଯାଇଛି । ଆଗାମୀ ଦିନରେ ଏହି ପାଠାଗାରକୁ ପର୍ଯ୍ୟାପ୍ତ ଉପାଦେୟ ପୁସ୍ତକ ଯୋଗାଇ ଦିଆଯିବ ବୋଲି ଟ୍ରଷ୍ଟ ଅଧ୍ୟକ୍ଷା ଅମୀୟବାଳା ପରିଡ଼ା ପ୍ରତିଶ୍ରୁତି ଦେଇଥିଲେ। ଜେଲ୍ ଅଧିକ୍ଷକ ସତ୍ୟ ପ୍ରକାଶ ସ୍ୱାଇଁ, ଜେଲର ବିଭୁଦେନ୍ଦୁ ଭୁୟାଁ, କାରା ମଙ୍ଗଳ ଅଧିକାରୀ ଅଧିକାରୀ ରାମକୃଷ୍ଣ ଦାସ, ଉଦ୍ଧାର ଫାଉଣ୍ଡେସନ୍ ସଭାପତି ନରୋତ୍ତମ ଦାସ, ଗୀତିକାର ଜୟଶ୍ରୀ ଧଳ, ବିନୋଦ କୁମାର ପ୍ରଧାନ ଓ ସାମୁଏଲ ବେହେରା ପ୍ରମୁଖ କାର୍ଯ୍ୟକ୍ରମରେ ଅଂଶ ଗ୍ରହଣ କରିଥିଲେ ।
Comments are closed.