ଭୂମିକମ୍ପ: କେତେ ତୀବ୍ରତାରେ ଘଟିଥାଏ କି ପ୍ରକାର କ୍ଷତି ? ଆସନ୍ତୁ ଜାଣିବା

ଦୁନିଆରେ ଯେତେସବୁ ପ୍ରାକୃତିକ ବିପର୍ଯ୍ୟୟ ରହିଛି ସେଗୁଡ଼ିକ ମଧ୍ୟରୁ ସବୁଠୁ ଭୟଙ୍କର ହେଉଛି ଭୂମିକମ୍ପ। ଭୂକମ୍ପ ଘଟିଲେ କ୍ଷଣିକ ମଧ୍ୟରେ ସବୁକିଛି ଓଲଟ ପାଲଟ ହୋଇଯାଏ। ଗାଁ ହେଉ କି ସହର, ନିମିଷକ ମଧ୍ୟରେ ମାଟିରେ ମିଶିଯାଏ। ଏଥିରେ କ୍ଷୟକ୍ଷତିର ପରିମାଣ ବି ଅନ୍ୟ ପ୍ରାକୃତିକ ବିପର୍ଯ୍ୟୟ ତୁଳନାରେ ଢେର ଗୁଣରେ ଅଧିକ।

ବନ୍ୟା, ବାତ୍ୟା ଆସିବା ପୂର୍ବରୁ ପୂର୍ବାନୁମାନ କରାଯାଇପାରେ। ଏଥିପାଇଁ ପ୍ରାକ୍‌ ପ୍ରସ୍ତୁତି ମଧ୍ୟ କରାଯାଇଥାଏ। ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରଣ କରାଯାଇଥାଏ। କିନ୍ତୁ ଭୂକମ୍ପର ଯଥେଷ୍ଟ ପୂର୍ବରୁ ପୂର୍ବାନୁମାନ କରିବା ସମ୍ଭବ ହୋଇ ନ ଥାଏ। ସେଥିପାଇଁ ଏହାର ମୁକାବିଲା କରିବା କଷ୍ଟକର। କୌଣସି ଏକ ଅଞ୍ଚଳରେ ଭୂକମ୍ପ ହେଲେ ତାହାର ତୀବ୍ରତା କେତେ ଜାଣିବା ଲାଗି ରିକ୍ଟର ସ୍କେଲର ବ୍ୟବହାର କରାଯାଏ। ଏହି ତୀବ୍ରତା ଅନୁସାରେ କ୍ଷୟକ୍ଷତି ଘଟିଥାଏ। ଭୂକମ୍ପ ତୀବ୍ରତା ଅଧିକ ରହିଲେ କ୍ଷୟକ୍ଷତି ପରିମାଣ ବେଶୀ ହୋଇଥାଏ, କମ୍‌ ରହିଲେ କ୍ଷୟକ୍ଷତି କମ୍‌ ହୋଇଥାଏ।

ତେବେ ଆସନ୍ତୁ ଜାଣିବା କେତେ ତୀବ୍ରତାର ଭୂକମ୍ପ ହେଲେ କି ପ୍ରକାର କ୍ଷତି ଘଟିବା ଆଶଙ୍କା ରହିଥାଏ।

(ରିକ୍ଟର ସ୍କେଲରେ ତୀବ୍ରତା)

୦-୧.୯  ତୀବ୍ରତାର ଭୂକମ୍ପ ଆସିଲେ କେବଳ ସେସିମୋଗ୍ରାଫରୁ ହିଁ ଜଣାପଡ଼ିଥାଏ। ସାଧାରଣରେ ଏହାକୁ ଅନୁଭବ କରିହୁଏ ନାହିଁ।

୨-୨.୯ ତୀବ୍ରତାର ଭୂକମ୍ପ ହେଲେ ହାଲ୍‌କା କମ୍ପନ ସୃଷ୍ଟି ହୁଏ।

୩-୩.୯ ତୀବ୍ରତାର ଭୂକମ୍ପ ଆସିଲେ କୌଣସି ଟ୍ରକ ଆପଣଙ୍କ ନିକଟ ଦେଇ ଯିବା ଭଳି ଅନୁଭୂତ ହୁଏ।

୪-୪.୯ ତୀବ୍ରତାର ଭୂକମ୍ପ ଦ୍ବାରା ଘରର ଝରକା ଭାଙ୍ଗିଯାଇପାରେ। କାନ୍ଥରେ ଟଙ୍ଗାଯାଇଥିବା ଫ୍ରେମ ଖସିଯାଇପାରେ।

୫-୫.୯ ତୀବ୍ରତାର ଭୂକମ୍ପ ଆସିଲେ ଘରର ଆସବାବପତ୍ର ଦୋହଲିଥାଏ।

୬-୬.୯ ତୀବ୍ରତାର ଭୂକମ୍ପ ଯୋଗୁ ଅଟ୍ଟାଳିକାର ଆଧାରଶିଳା ବା ଫାଉଣ୍ଡେଶନରେ ଫାଟ ସୃଷ୍ଟି ହେବାର ଆଶଙ୍କା ରହିଛି। ଏହା ଦ୍ବାରା ଘରର ଉପର ମହଲା କ୍ଷତିଗ୍ରସ୍ତ ହୋଇପାରେ।

୭-୭.୯ ତୀବ୍ରତାର ଭୂକମ୍ପ ହେଲେ କୋଠା ଭୁଶୁଡ଼ି ପଡ଼ିଥାଏ ଏବଂ ମାଟି ତଳେ ଯାଇଥିବା ପାଇପ ଫାଟିଯାଇଥାଏ।

୮-୮.୯ ତୀବ୍ରତାର ଭୂକମ୍ପ ହେଲେ ଅଟ୍ଟାଳିକା ସହିତ ବଡ଼ ବଡ଼ ପୋଲ ଭୁଶୁଡ଼ିପଡ଼ିବା ସମ୍ଭାବନା ରହିଥାଏ।

୯ ଏବଂ ଏହାଠାରୁ ଅଧିକ ତୀବ୍ରତାର ଭୂକମ୍ପ ଆସିଲେ ଭୟଙ୍କର ଧ୍ବଂସଲୀଳା ସୃଷ୍ଟି କରିଥାଏ। କେହି ଯଦି ଖୋଲା ପଡ଼ିଆରେ ଛିଡ଼ା ହୋଇଥିଲେ, ତେବେ ତାଙ୍କୁ ପୃଥିବୀ ଘୂରି ବୁଲୁଥିବା ଦେଖିବାକୁ ମିଳିବ। ପାଖରେ ସମୁଦ୍ର ଥିଲେ ସୁନାମୀ ସୃଷ୍ଟି ହେବ। ସୂଚନାଯୋଗ୍ୟ ଯେ, ରିକ୍ଟର ସ୍କେଲର ପ୍ରତ୍ୟେକ ସ୍କେଲ ପୂର୍ବ ସ୍କେଲ ତୁଳନାରେ ୧୦ ଗୁଣ ଅଧିକ ଶକ୍ତିଶାଳୀ।