ଖୁଣ୍ଟା :- ଖୁଣ୍ଟା ବାଜାର ନିକଟସ୍ଥ ଶିଳଘାଟି ଗ୍ରାମର ଛପର ଘର ଓ ସଂରକ୍ଷିତ ଶାଳ ଜଙ୍ଗଲର ବ୍ୟାପକ କ୍ଷୟକ୍ଷତି ଘଟିଛି। ଆଜି ପୂର୍ବାହ୍ନରେ ଓ ଅପରାହ୍ନରେ ଦୁଇଥର କାଳବୈଶାଖୀର ତାଣ୍ଡବ ଜନ ସାଧାରଣ ଅନୁଭବ କରିଥିଲେ। ତେବେ ଦିନ ୧୧ଟାରୁ ୧୨ଟା ମଧ୍ୟରେ ପବନର ବେଗ ଅଧିକ ରହିବ ସହ ପ୍ରବଳ ବର୍ଷା ଓ କୁଆପଥର ମାଡ଼ ହୋଇଥିଲା। ଖୁଣ୍ଟାରୁ ଶିଳାଘାଟି ଛକ ମଧ୍ୟରେ ଘଞ୍ଚ ଶାଳ ଜଙ୍ଗଲର ଏକ କିଲୋମିଟର ମଧ୍ୟରେ ରାସ୍ତାର ଉଭୟ ପାର୍ଶ୍ୱରେ ବ୍ୟାପକ କ୍ଷତି ଘଟିଛି। ବାତ୍ୟା ପ୍ରଭାବରେ ଶତାଧିକ ଶାଳ ଗଛ ମଝିରୁ ଭାଙ୍ଗି ଯାଇଛି କିମ୍ବା ଉପୁଡି ପଡିଛି। ଫଳରେ ଖୁଣ୍ଟା ଜୟପୁର ପୂର୍ତ୍ତ ବିଭାଗ ସଡକ ଗମନା ଗମନ ବାଧା ପ୍ରାପ୍ତ ହୋଇଥିଲା । ଅପରାହ୍ନରେ ଅବରୋଧ ହଟାଇ ଦିଆଯାଥିଲା ବେଳେ ସ୍ଥାନୀୟ ଲୋକଙ୍କ କହିବା ଅନୁଯାୟୀ ଘଣ୍ଟାକ ମଧ୍ୟରେ ଯାହା କ୍ଷତି ହୋଇଛି ଫାଇଲିନ, ହୁଡହୁଡ କିମ୍ବା ଫନି ବାତ୍ୟା ସମୟରେ ଏଭଳି କ୍ଷତି ଘଟି ନଥିଲା। ବିଦ୍ୟୁତ ଛିଣ୍ଡି ପଡିଥିବା ଯୋଗୁ ବିଦ୍ୟୁତ ସରବରାହ ବାଧାପ୍ରାପ୍ତ ହୋଇଛି। ଶିଳାଘାଟି ଗ୍ରାମ ସମେତ ଗୋପବନ୍ଧୁ ନଗର ବ୍ଲକର ଅନ୍ୟାନ୍ୟ ଗ୍ରାମମାନଙ୍କରେ କାଳବୈଶାଖୀରେ କେତେ ସଂଖ୍ୟକ ବାସଗୃହ କ୍ଷତିଗ୍ରସ୍ତ ହୋଇଛି ତାର ସବିଶେଷ ତଥ୍ୟ ଶନିବାର ସୁଦ୍ଧା ପ୍ରାପ୍ତ ହେବ ବୋଲି ତହସିଲଦାର ସଂକଳ୍ପ ସ୍ୱସ୍ତିକ ସାହୁ କହିଛନ୍ତି। ଆବଶ୍ୟକ ସ୍ଥଳେ ପଲିଥିନ ପ୍ରଭୃତି ସହାୟତା ପ୍ରଦାନ କରାଯିବ ବୋଲି ସେ କହିଛନ୍ତି।
Comments are closed.