ଲାଞ୍ଜିଗଡ଼ : କଳାହାଣ୍ଡି ଜିଲା ଲାଞ୍ଜିଗଡ ବ୍ଲକରେ ଦିନକୁ ଦିନ ଦାଦନ ସମସ୍ୟା ବୃଦ୍ଧି ପାଉଥିବା ବେଳେ କାମଧନ୍ଦା ଅଭାବରୁ ଅନେକ ଯୁବକ ଯୁବତି କାମ ଅନ୍ୱେଶଣରେ ବାହାର ରାଜ୍ୟକୁ ଯାଇ ଦାଦନ ଖଟୁଛନ୍ତି । କିଛିଦିନ କାମ କଲାପରେ କିଏ ପଙ୍ଗୁ ହୋଇ ଫେରୁଛିତ କିଏ ଶବ ହୋଇ ଫେରୁଛି । ଆଉ କିଏ ବିଭିନ୍ନ ରୋଗରେ ପିଡୀତ ହୋଇ ମୃତ୍ୟୁ ବରଣ କରୁଛନ୍ତି । ଗତ କିଛିଦିନ ତଳେ ଲାଞ୍ଜିଗଡ ବ୍ଲକର ଘୋଡାପୋଖେର ଗ୍ରାମର ଜଣେ ଯୁବକ ରଇବାରୁ ଜାଲ କେରଳରେ ମୃତ୍ୟୁ ବରଣ କରିଥିବାବେଳ ଏବେ ପୁଣି ଜଣେ ଯୁବତୀ ମୃତ୍ୟୁ ବରଣ କରିଛି ।
ପରିବାର ଲୋକଙ୍କ କହିବା ଅନୁସାରେ, କାନକୁଟ୍ରୁ ପଞ୍ଚାୟତ ବଚ୍ଚକା ଗ୍ରାମର ନଫିସା ହରିଜନ(୨୫) ବିଜେପୁର ଗ୍ରାମର କାର୍ତ୍ତିକ ନାଏକଙ୍କୁ ବିବାହ କରିଥିଲା । କିଛିଦିନ ସେମାନେ ଖୁସିବାସିରେ ପରିବାର ଲୋକଙ୍କ ସହିତ ଜୀବନ ଯାପନ କରୁଥିବା ବେଳେ ଗ୍ରାମରେ କୈାଣସି କାମଧନ୍ଦା ନପାଇ ବାଧ୍ୟ ହୋଇ ସ୍ୱାମୀ ଓ ସ୍ତ୍ରୀ ଦୁହେଁ ସୁଦୁର କେରଳ ରାଜ୍ୟକୁ କାମ ଅନ୍ୱେଶଣରେ ଯାଇଥିଲେ । ସେଠାରେ ତ୍ରୀଶୁର ଜିଲାର ଏକ କାରଖାନାରେ ସ୍ୱାମୀ କାର୍ତ୍ତିକ କାମ କରୁଥିବା ବେଳେ ସ୍ତ୍ରୀ ନଫିସା ଘରେ ରହୁଥିଲେ । ଗତକାଲି ହଠାତ୍ ନଫିସାକୁ ଜ୍ୱର ହୋଇଥିଲା ସ୍ୱାମୀ ଔଷଧ ଆଣି ଦେଲା ପରେ ମଧ୍ୟ ଠିକ୍ ହୋଇନଥିଲା ନଫିସା । ଶେଷରେ ନଫିସା ଅତ୍ୟଧିକ ଗୁରୁତର ହେବାରୁ ତ୍ରୀଶୁରର ଆତାନି ମେଡକାଲ କଲେଜରେ ଚିକିତ୍ସା ପାଇଁ ନିଆ ହୋଇଥିଲା ଚିକିତ୍ସା ସମୟରେ ନଫିସାର ମୃତ୍ୟୁ ହୋଇଥିଲା । ଏହି ମୃତ୍ୟୁ ଘଟଣାର ଖବର ପାଇବା ପରେ ନଫିସାର ପରିବାର ଲୋକେ ଲାଞ୍ଜିଗଡ ବିଡିଓ ଜିତେନ୍ଦ୍ର କୁମାର ମିଶ୍ରଙ୍କ ପାଖରେ ନଫିସାର ମୃତଦେହ ଆଣିବା ପାଇଁ ଗୁହାରୀ ଜଣାଇଥିଲେ । ଲାଞ୍ଜିଗଡ ବିଡିଓ ଶ୍ରୀ ମିଶ୍ର ତତକ୍ଷଣାତ ଜିଲା ଶ୍ରମ ଅଧିକାରୀଙ୍କୁ ଫୋନ ଯୋଗେ ମୃତଦେହ ଆଣିବା ପାଇଁ ଜଣେଇଥିବା ବେଳେ ଅତିରିକ୍ତ ଶ୍ରମ ଅଧିକାରୀ ପ୍ରଦିପ କୁମାର ମହାନ୍ତି ତାଙ୍କ ଫଣ୍ଡରେ କୈାଣସି ଟଙ୍କା ନ ଥିବା ଦର୍ଶାଇ ଥିଲେ । ପରେ ଲାଞ୍ଜିଗଡ ବ୍ଲକ ଅଧ୍ୟକ୍ଷ ଇଂ.ଫକୀର ମୋହନ ମାଝୀ ଜିଲ୍ଲାପାଳଙ୍କୁ ଫୋନ କରିବାରୁ ଶବ ଆଣିବାର ବ୍ୟବସ୍ଥା କରାଯିବ ବୋଲି କହିଛନ୍ତି ।
Comments are closed.