ଜଷ୍ଟିସ ଉଦୟ ଉମେଶ ଲଲିତ ଦେଶର ୪୯ତମ ପ୍ରଧାନ ବିଚାରପତି ନିଯୁକ୍ତ

ନୂଆଦିଲ୍ଲୀ : ଜଷ୍ଟିସ ଉଦୟ ଉମେଶ ଲଲିତ ଭାରତର ୪୯ ତମ ପ୍ରଧାନ ବିଚାରପତି ଭାବେ ନିଯୁକ୍ତ ହୋଇଛନ୍ତି । ଭାରତର ସମ୍ବିଧାନର ଧାରା ୧୨୪ର ଧାରା (୨) ଦ୍ୱାରା ଦିଆଯାଇଥିବା କ୍ଷମତାକୁ ବ୍ୟବହାର କରି ରାଷ୍ଟ୍ରପତି ସୁପ୍ରିମକୋର୍ଟର ବିଚାରପତି ଜଷ୍ଟିସ ଉଦୟ ଉମେଶ ଲଲିତଙ୍କୁ ଭାରତର ମୁଖ୍ୟ ବିଚାରପତି ଭାବେ ନିଯୁକ୍ତି ଦେଇଛନ୍ତି। ଜଷ୍ଟିସ୍ ଉଦୟ ଉମେଶ ଲଲିତ ଆସନ୍ତା ୨୭ ତାରିଖରେ ଭାରତର ୪୯ତମ ପ୍ରଧାନ ବିଚାରପତି ଭାବରେ ଦାୟିତ୍ବ  ଗ୍ରହଣ କରିବେ।

ଜଷ୍ଟିସ୍ ଉଦୟ ଉମେଶ ଲଲିତଙ୍କୁ ଭାରତର ସର୍ବୋଚ୍ଚ ନ୍ୟାୟାଳୟର ବିଚାରପତି ଭାବେ ୨୦୧୪ରେ ନିଯୁକ୍ତି ଦିଆଯାଇଥିଲା। ଜଷ୍ଟିସ୍ ଲଲିତ ଦୁଇ ଥର ସୁପ୍ରିମକୋର୍ଟ ଆଇନ ସେବା କମିଟିର ସଦସ୍ୟ ଭାବରେ କାର୍ଯ୍ୟ କରିଛନ୍ତି। ଜଷ୍ଟିସ୍ ୟୁ. ୟୁ ଲଲିତ ଅନେକ ଗୁରୁତ୍ୱପୂର୍ଣ୍ଣ ବିଚାରର ରାୟ ଶୁଣାଇଛନ୍ତି।

୧୯୫୭ ମସିହା ନଭେମ୍ବର ୯ ତାରିଖରେ ମହାରାଷ୍ଟ୍ରର ସୋଲାପୁରରେ ଜନ୍ମଗ୍ରହଣ କରିଥିବା ଜଷ୍ଟିସ ଲଲିତ ଜୁନ୍, ୧୯୮୩ରେ ମହାରାଷ୍ଟ୍ର ଏବଂ ଗୋଆ ବାର୍ କାଉନସିଲ୍ ଦ୍ୱାରା ଆଡଭୋକେଟ୍ ଭାବରେ ନାମ ପଞ୍ଜିକରଣ କରିଥିଲେ । ସେ ୧୯୮୫ ପର୍ଯ୍ୟନ୍ତ ବମ୍ବେ ହାଇକୋର୍ଟରେ ପ୍ରାକ୍ଟିସ କରିଥିଲେ।

ସେ ଅକ୍ଟୋବର ୧୯୮୬ ରୁ ୧୯୯୨ ପର୍ଯ୍ୟନ୍ତ ପ୍ରଖ୍ୟାତ ଆଇନଜ୍ଞ ସୋଲି ଜେ ସୋରାବଜୀଙ୍କ ଚାମ୍ବରରେ କାର୍ଯ୍ୟ କରିଥିଲେ। ୧୯୯୨ ରୁ ୨୦୦୨ ପର୍ଯ୍ୟନ୍ତ ସେ ଆଡଭୋକେଟ୍ ଅଫ୍ ରେକର୍ଡ ଭାବରେ ଅଭ୍ୟାସ କରିଥିଲେ ଏବଂ ଏପ୍ରିଲ୍ ୨୦୦୪ ରେ ସୁପ୍ରିମକୋର୍ଟଙ୍କ ଦ୍ବାରା ବରିଷ୍ଠ ଆଡଭୋକେଟ୍ ଭାବରେ ନିଯୁକ୍ତ ହୋଇଥିଲେ। ଜଙ୍ଗଲ, ଯାନବାହାନ ଦ୍ବାରା ପ୍ରଦୂଷଣ, ଯମୁନା ପ୍ରଦୂଷଣ ଆଦି ପ୍ରସଙ୍ଗରେ ସେ ନ୍ୟାୟ ମିତ୍ର ବା ଆମିକସ୍ କ୍ୟୁରିଆ ଭାବେ ମଧ୍ୟ ନିଯୁକ୍ତ ହୋଇଥିଲେ। ସମସ୍ତ ୨-ଜି ପ୍ରସଙ୍ଗରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ସିବିଆଇ ପାଇଁ ସ୍ୱତନ୍ତ୍ର ପବ୍ଲିକ୍ ପ୍ରସିକ୍ୟୁଟର ଭାବେ ନିଯୁକ୍ତ ହୋଇଥିଲେ।

ପୁର୍ବରୁ ସୁପ୍ରିମକୋର୍ଟର ପ୍ରଧାନ ବିଚାରପତି ଜଷ୍ଟିସ ଏନ୍‌. ଭି ରମଣା, ସୁପ୍ରିମ୍‌ କୋର୍ଟର ପରବର୍ତ୍ତୀ ପ୍ରଧାନ ବିଚାରପତି ଭାବେ ଜଷ୍ଟିସ ଲଲିତଙ୍କ ନାଁ ସୁପାରିସ କରିଥିଲେ।

 

Comments are closed.