ଝାଡ଼ଖଣ୍ଡବାସୀଙ୍କୁ ଧନ୍ୟବାଦ : ହେମନ୍ତ ସୋରେନ

ରାଞ୍ଚି: ଝାଡ଼ଖଣ୍ଡ ବିଧାନସଭା ନିର୍ବାଚନର ଭୋଟ ଗଣତି ପ୍ରାୟତଃ ଶେଷ ପର୍ୟ୍ୟାୟରେ ପହଞ୍ଚିଛି। ଏହି ସମୟ ମଧ୍ୟରେ ଫଳାଫଳ ମଧ୍ୟ ଧୀରେ ଧୀରେ ସ୍ପଷ୍ଟ ହେବାରେ ଲାଗିଛି। ଝାଡ଼ଖଣ୍ଡ ମୁକ୍ତି ମୋର୍ଚ୍ଚା, କଂଗ୍ରେସ ଓ ଆରଜେଡି ମେଣ୍ଟକୁ ବହୁମତ ମିଳିଥିବା ଜଣାପଡ଼ିଛି। ତେବେ ଏନେଇ ଆନୁଷ୍ଠନିକ ଘୋଷଣା ବାକି ରହିଛି। ତେଣୁ ଏହି ମେଣ୍ଟ ସରକାର ଗଢିବା ନେଇ ଏକ ପ୍ରକାର ନିଶ୍ଚିତ ହୋଇଛି। ତେବେ ଝାଡ଼ଖଣ୍ଡର ପଞ୍ଚମ ମୁଖ୍ୟମନ୍ତ୍ରୀ ତଥା ଝାଡ଼ଖଣ୍ଡ ମୁକ୍ତି ମୋର୍ଚ୍ଚାର କାର୍ଯ୍ୟକାରୀ ସଭାପତି ତଥା ପୂର୍ବତନ କେନ୍ଦ୍ରମନ୍ତ୍ରୀ ଓ ଆଦିବାସୀ ନେତା ଶିବୁ ସୋରେନଙ୍କ ପୁଅ ହେମନ୍ତ ସୋରେନ ଝାଡ଼ଖଣ୍ଡର ଆଗାମୀ ମୁଖ୍ୟମନ୍ତ୍ରୀ ହେବା ନିଶ୍ଚିତ ହୋଇଛି। ଯାହାକୁ ନେଇ ସେ ଖୁସି ଜାହିର କରିବା ସହିତ ଝାଡ଼ଖଣ୍ଡବାସୀଙ୍କୁ ଧନ୍ୟବାଦ ଜଣାଇଛନ୍ତି।
ଏନେଇ ହେମନ୍ତ ସୋରେନ ସାମ୍ବଦିକ ସମ୍ମିଳନୀରେ କହିଛନ୍ତି ଯେ, ଝାଡ଼ଖଣ୍ଡ ମୁକ୍ତି ମୋର୍ଚ୍ଚା, କଂଗ୍ରେସ ଓ ଆରଜେଡି ମେଣ୍ଟକୁ ବହୁମତ ଦେଇଥିବାରୁ ଝାଡ଼ଖଣ୍ଡବାସୀଙ୍କୁ ମୋର ଧନ୍ୟବାଦ। ଏବେ ରାଜ୍ୟରେ ଅଲଗା ରାଜ୍ୟ ଗଠନର ଉଦେଶ୍ୟ ପୂରଣ ହେବ। ଆଜି ଦିନ ଆମପାଇଁ ସଙ୍କଳ୍ପ ନେବାର ଦିନ ଏବଂ ଆଜି ଆମ ରାଜ୍ୟ ପାଇଁ ଏକ ଉତ୍ସାହର ଦିନ। ଏହା ସହିତ ଏନେଇ ସେ ଲାଲୁ ଯାଦବ ଓ ସୋନିଆ ଗାନ୍ଧୀଙ୍କୁ ମଧ୍ୟ ଧନ୍ୟବାଦ ଜଣାଇଛନ୍ତି।

Comments
Loading...