ସୁନାବେଡ଼ା : ସେମିଳିଗୁଡ଼ା ବସ୍ଷ୍ଟାଣ୍ଡରୁ ଜଣେ ଯୁବକଙ୍କଠାରୁ ୩ଲକ୍ଷ ୨୭ହଜାର ୬ଶହ ଟଙ୍କାର ଜାଲ୍ ନୋଟ ସୁନାବେଡା ପୁଲିସ ଜବତ କରିଛି। ସୁନାବେଡ଼ା ଥାନା ଆଇଆଇସି ଭୀମସେନ ନାୟକଙ୍କ ସୂଚନା ଅନୁଯାୟୀ ଏସଟିଏଫ ଦଳ ଓ ସୁନାବେଡ଼ା ପୁଲିସ ସହଯୋଗରେ ଏହି ଜାଲ୍ ନୋଟ ଜବତ କରାଯାଇଛି। ନନ୍ଦପୁର ଥାନା ଅଞ୍ଚଳର ଲେକଡିଗୁଡାର ଅନାମ ଖିଲ(୩୩) ଏହି ଜାଲ୍ ନୋଟ ସହ ଗିରଫ ହୋଇଛନ୍ତି। ଅନାମ ଏହି ଜାଲ୍ ଟଙ୍କା ମାଳିଦୁଷୁରାର ଜଗଦୀଶ ନାମକ ବ୍ୟକ୍ତିଙ୍କଠାରୁ ଆଣି ଅନ୍ୟ କାହାକୁ ଦେବା ପାଇଁ ସେମିଳିଗୁଡ଼ା ବସଷ୍ଟାଣ୍ଡରେ ପହଞ୍ଚିଥିଲେ। ଅନାମଙ୍କୁ ପିଛା କରି ଏସଟିଏଫ ଏବଂ ସୁନାବେଡ଼ା ପୁଲିସ ଜାଲ ନୋଟ ସହ ତାଙ୍କୁ ଗିରଫ କରିବାରେ ସଫଳ ହୋଇଛି। ଅନାମଙ୍କଠାରୁ ୯୯ଟି ଦୁଇ ହଜାର ଟଙ୍କା, ୨୩୬ଟି ୫୦୦ଟଙ୍କା ଏବଂ ୧୧୬ଟି ଶହେ ଟଙ୍କାର ଜାଲ ନୋଟ ଜବତ କରାଯାଇଛି। ଅନାମଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଥିବା ଆଇଆଇସି ଶ୍ରୀ ବେହେରା ସୂଚନା ଦେଇଛନ୍ତି। ଏସଆଇ ନୀଳାଦ୍ରି କହଁର ତଦନ୍ତ କରୁଛନ୍ତି। କୋରାପୁଟ ଜିଲାରେ ଜାଲ ନୋଟ କାରବାରର ଏକ ର୍ୟାକେଟ୍ ରହିଥିବା ଅଲୋଚନା ହେଉଛି। ପୁଲିସ ବିଭାଗ ଏହାର ଫୁଙ୍ଖାନୁଫୁଙ୍ଖ ତଦନ୍ତ କରି ଲୋକଲୋଚନକୁ ଆଣିବା ଆବଶ୍ୟକତା ରହିଥିବା ଚର୍ଚ୍ଚା ହେଉଛି।
Comments are closed.